Reichenau (eilân)

Reichenau is in kleastereilân yn de Bodensee yn Dútslân. De gemeente falt ûnder de dielsteat Baden-Wuertemberch. It gemeentehûs stiet yn it grutste doarp Mittelzell. Op it eilân lizze de trije doarpen Oberzell, Niederzell en Mittelzell. Mittelzell is wat ynwenners oanbelanget it grutste doarp.

Loftôfbyld fan Reichenau

Skiednis

It eilân waard al troch Romeinen beboud en bewenne. Oant yn de jierren 1830 hearde de grûn by de abdij fan Reichenau of stiftingen, dy't de grûn as lien oan boeren joegen. Yn 'e jierren 1830 kaam der in ein oan it lienstelsel.

Yn 'e simmer fan 1945 waard twatredde fan de bewenners fan it eilân foar twaëninheale moanne fan it eilân helle om plak te meitsjen foar likernôch 3000 Frânske finzenen út it konsintraasjekamp Dachau, dy't dêr karantêne hâlde moasten ear't hja werom gyngen nei Frankryk.

Sûnt 1838 hat it eilân in daam mei it fêstelân. Yn juny-july 1999 wie de daam nei it eilân foar ferkear wikenlang troch heechwetter ôfsletten. It eilân moast doe troch de Bundeswehr befoarriede wurde.

Geografy

It eilân is ûnderdiel fan de gemeente Reichenau. Njonken it eilân heart ek in diel fan it fêstelân by de gemeente.

Reichenau leit yn it westlike diel fan de Bodensee tusken Konstanz en Radolfzell. It heechste punt fan it eilân leit op 438,7 meter boppe de seespegel en likernôch 43 meter boppe de Bodensee.

It eilân is 4,5 kilometer lang, 1,5 kilometer breed en hat in oerflak fan 4,3 km². Wat oerflak oanbelanget is it eilân it grutste eilân fan de hiele Bodensee en mear as seis kear sa grut as it eilân Lindau. De doarpen hawwe in ferstruide bebouwing en gjin echte kearn.

Abdij

Abdijtsjerke

Petrus en Paulustsjerke

De benediktynske abdij fan Reichenau is stifte yn 724 troch Sint-Pirminius en opheft yn de 18e iuw. De abdij is ferneamd om de ylluminaasjes dy't dêr makke waarden yn de karolingyske tiid.

Elts fan de trije doarpen op it eilân hat in midsiuwske abdijtsjerke:

• Oberzell mei de 9e-iuwske Sint-Joaristsjerke
• Niederzell mei de 10e-iuwske Hh. Petrus en Paulustsjerke
• Mittenzell mei de 11e-iuwske abdijtsjerke Marije en Markus.

Sûnt 2000 stiet it eilân Reichenau op de list fan it wrâlderfgoed fan UNESCO.

Musea

• Reichenauer Museum (streekmuseum)
• Museum Reichenau (oer de kleasterskiednis)
• Skatkeamer yn de munstertsjerke fan Marije en Markus

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: de:Reichenau (Insel). Commons Wikimedia Commons  Ofbylden dy't by dit ûnderwerp hearre, binne te finen yn de kategory Reichenau fan Wikimedia Commons.