Bubba Smith

Bubba Smith (wiere namme: Charles Aaron Smith; Orange (Teksas), 28 febrewaris 1945 – Los Angeles, 3 augustus 2011) wie in Amerikaansk sporter en akteur fan Afro-Amerikaansk etnysk komôf. Hy waard yn syn heitelân yn syn studintejierren bekend as Amerikaansk fuotbalspiler, en spile letter as profesjoneel sportman foar ferskate foaroansteande Amerikaansk fuotbaltiims. Nei't er syn sportkarriêre beëinige hie, boude er in twadde libben op as akteur, wêrby't er benammen (en ek om utens) bekend waard yn 'e rol fan plysjeman Moses Hightower yn 'e earste seis Police Academy-films.

Bubba Smith
akteur
persoanlike bysûnderheden
echte namme	Charles Aaron Smith
nasjonaliteit	Amerikaansk
berne	28 febrewaris 1945
berteplak	Orange (Teksas)
stoarn	3 augustus 2011
stjerplak	Los Angeles (Kalifornje)
etnisiteit	Afro-Amerikaansk
jierren aktyf	1978 – 2011
offisjele webside
n.f.t.

Libben en karriêre

Jonkheid en oplieding

Smith waard yn 1945 berne yn it plak Orange, yn 'e steat Teksas, as de soan fan Amerikaansk fuotbaltrener Willie Ray Smith sr. en dy syn frou Georgia Oreatha Curl. Hy groeide op yn 'e stêd Beaumont, net fier fan 'e kust fan 'e Golf fan Meksiko. Op 'e middelbere skoalle, oan 'e Charlton-Pollard High School yn Beaumont, kaam er yn it Amerikaansk fuotbaltiim fan syn heit te spyljen. Smith ûntjoech him neitiid ta ien fan 'e bêste middelbere-skoalspilers fan Amerikaansk fuotbal dy't Teksas ea fuortbrocht hat.

Sportkarriêre

Doe't er slagge wie foar syn middelbere-skoaldiploma, liet Smith him ynskriuwe oan 'e Steatsuniversiteit fan Michigan, dêr't er as defensive end yn it Amerikaansk fuotbaltiim fan 'e Michigan State Spartans spile. Dêr toande Smith syn kapasiteiten en hied er û.m. in wichtige rol yn 'e saneamde 'Wedstryd fan 'e Iuw', yn 1966, tsjin it tiim fan 'e Universiteit fan Notre Dame, dy't einige yn in 10-10 gelykspul. Yn 1988 waard Smith ynhuldige as lid fan 'e College Football Hall of Fame.

Nei't er de universiteit ferlitten hie, spile Smith njoggen jier lang as profesjoneel Amerikaansk fuotbalspiler by ferskate tiims: fan 1967 oant 1971 by de Baltimore Colts; fan 1973 oant 1974 by de Oakland Raiders en fan 1975 oant 1976 by de Houston Oilers. By de Colts wied er lofter-defensive end, en spile er yn sawol 1969 as 1971 yn 'e Super Bowl, it Amerikaanske kampioenskip. De twadde kears wûn er mei de Colts dy wedstryd. Hoewol't er 2.01 m meat en goed 120 kg weage, stie Smith yn syn sportjierren bekend om syn grutte faasje en linigens, sadat it rivalisearjende tiim ornaris twa spilers ynsetten om him te dekken.

Aktearkarriêre

Doe't er syn sportkarriêre beëinige hie, sette Smith ein jierren santich útein mei aktearjen. Hy begûn mei lytse roltsjes yn B-films en op 'e tillefyzje, en wurke himsels stadichoan op nei gruttere rollen. Hoewol't er troch syn sportkarriêre yn 'e Feriene Steaten al bekend wie, briek er yn it bûtenlân pas troch as akteur, mei de rol fan plysjeman Moses Hightower yn 'e komeedzje Police Academy, út 1984. Dat waard sa'n trochslaand súkses dat der noch in grut tal ferfolgen makke waarden. Smith kearde werom yn 'e rol fan Hightower yn fiif dêrfan: Police Academy 2: Their First Assignment (1985), Police Academy 3: Back in Training (1986), Police Academy 4: Citizens on Patrol (1987), Police Academy 5: Assignment: Miami Beach (1988) en Police Academy 6: City under Siege (1989). Allinich yn Police Academy: Mission to Moscow, út 1994, spile Smith net mei.

Behalven yn 'e Police Academy-rige wie Smith ek te sjen yn 'e tillefyzjefilm Fighting Back: The Rocky Bleier Story (1982). Yn 1983 spile er mei Burt Reynolds, Ned Beatty en Loni Anderson yn 'e film Stroker Ace. Fierders hied er byrollen yn films as Black Moon Rising (1986), The Wild Pair (1987), The Naked Truth (1993), The Silence of the Hams (1994), Full Clip (2006) en Blood River (2010). Yn Gremlins 2: The New Batch (1992) spile er himsels. Fierders wie Smith op 'e tillefyzje te sjen yn in fêste rol yn 'e searje Open All Night, dy't yn 1981 en 1982 mar ien seizoen rûn. Ein jierren tachtich spile er yn 'e aksjesearje Blue Thunder. Ek ferskynde er yn gastrollen yn searjes as Married... with Children, Tales of the Golden Monkey, Good Times, The Odd Couple, Taxi, Macgyver en Family Matters.

Ferstjerren

Smith waard op 3 augustus 2011 yn syn hûs yn Los Angeles dea oantroffen troch syn húshâldster. In lykskôging wiisde út dat er stoarn wie oan akute medisinale fergiftiging en in hertoandwaning. It middel dat him fataal wurden wie, hiet fentermine, en wurdt brûkt om fluch gewicht te ferliezen. Dat guod liket tefolle fan syn sike hert frege te hawwen; by de autopsy die bliken dat Smith syn hert mear as twaris sa grut wie as dat fan in sûne minske. Bubba Smith waard 66 jier âld.

Filmografy

Filmografy as akteur
jier	titel	rol of funksje	opmerkings
films
1979	A Pleasure Doing Business	Joe Marsh
1981	Escape from DS-3	Mac
1983	Stroker Ace	Arnold
1984	Police Academy	Moses Hightower
1985	Police Academy 2: Their First Assignment	Moses Hightower
1986	Black Moon Rising	Johnson
1986	Police Academy 3: Back in Training	Moses Hightower
1987	Police Academy 4: Citizens on Patrol	Moses Hightower
1987	The Wild Pair	Benny Avalon
1988	Police Academy 5: Assignment Miami Beach	Moses Hightower
1989	Police Academy 6: City Under Siege	Moses Hightower
1990	Gremlins 2: The New Batch	himsels
1992	My Samurai	dûmny George
1992	The Naked Truth	plysjeman
1993	Fist of Honor	resjersjeur Johnson
1994	The Silence of the Hams	Olaf
1995	Drifting School	Peter Jackson
2000	Down 'n Dirty	resjersjeur Jerry Cale
2000	The Flunky	himsels
2004	The Coach	Hulk Referee	koarte film
2006	Full Clip	Sleepy
2010	Blood River	Harold
2016	DaZe: Vol. Too (sic) - NonSeNse	himsels
tillefyzje
1980	Vega$	Peter Bridges	gastrol; ôfl. A Deadly Victim
1982	Taxi	Lucius Franklin	gastrol; 1 ôfl.
1984	Blue Thunder	Lyman 'Bubba' Kelsey	fêste rol; 11 ôfl.
1991	Married... with Children	"Spare Tire" Dixon	gastrol; ôfl. s5e16 All Night Security Dude
1993	Family Matters	Bones	gastrol; ôfl. s4e5 Money out the Window
1994	Married... with Children	himsels	gastrol; ôfl. s9e10 Dud Bowl
2008	Breaking the Huddle: The Integration of College Football	himsels	tillefyzjefilm

Keppelings om utens

• (in) Folsleine filmografy fan Bubba Smith yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Bubba Smith fan Wikimedia Commons.