De 1200 Roe

De 1200 Roe is in poldermûne yn Amsterdam oan 'e Haarlemmerweg. De namme fan 'e mûne ferwiist nei de ôfstân dy't de mûne hat ta de Haarlimmerpoarte. Dy waard eartiids mei roeden oantsjut. Yn it gefal fan 'e mûne is dat goed fjouwer kilometer.

De 1200 Roe
mûne / mole
lokaasje
provinsje	Noard-Hollân
plak	Amsterdam
adres	Haarlemmerweg 701
koördinaten	52°23' N 4°48' E
bysûnderheden
type mûne	muonts
funksje	poldermûne
flecht	26,40 m
boujier	1632
oare ynformaasje
eigner	Stadsherstel Amsterdam
monumintale status	ryksmonumint
monumintnûmer	1443
Webside
FB side
Kaart

De 1200 Roe is in mealreeë mûne, mar hat gjin funksje mear en wurdt ynklamme troch heechbou en de Haarlimmerdyk. Wol wurdt de mûne regelmjittich op frijwillige basis oan it draaien set.

Skiednis

De bou fan 'e mûne sil ferbân holden ha mei it oanlizzen fan 'e Haarlimmertrekfeart yn 1631. Dy nije feart snie de âlde polder midstwa, sadat it súdlike diel, de likernôch 595 ha grutte Osdorper Binnenpolder, gjin ôfwettering mear hie. Yn 1632 waard de 1200 Roe boud om dat gebiet op de nije trekfeart te bemeallen. Oarspronklik hie de mûne in skeprêd, mar yn 1871 waard it rêd troch in fizel ferfongen. Yn 1931 waard in elektromotor yn 'e mûne set.

De 1200 Roe yn 1961 mei skier op 'e eftergrûn de 1100 Roe.

Yn 1951 ferlear de mûne syn funksje mei't in grut part fan 'e polder ûnder it sân fan 'e Amsterdamske útwreiding Westelike Tuinsteden ferdwûn en de hiele omjouwing fan 'e mûne folslein feroare. De gemeente waard eigner fan 'e mûne. Plannen om de mûne te ferhûzjen nei it doarp Sloten binne net trochgien en de mûne bleau oars as de 1100 Roe op syn histoaryske lokaasje.

Yn 1971 waarden de roeden ferwidere mar fierder feroare der neat. Yn 'e jierren 1977-1979 waard de mûne hielendal restaurearre.

Sûnt 2003 krige de mûne in nije bewenner, dy't de mûne wer regelmjittich draaie liet. De mûne is net te besichtigjen en de hjoeddeiske eigner is Stadsherstel Amsterdam.

Keppeling om utens

• Feriening De Hollânske Mûne.

Boarnen, noaten en referinsjes

Boarnen, noaten en/as referinsjes:

Mûnedatabase. Commons Wikimedia Commons  Ofbylden dy't by dit ûnderwerp hearre, binne te finen yn de kategory De 1200 Roe, Amsterdam fan Wikimedia Commons.