Sarah Gilman

Sarah Gilman (Los Angeles, 18 jannewaris 1996) is in Amerikaansk tillefyzje- en filmaktrise, dy't benammen bekend wurden is mei har rol as Delia yn 'e tillefyzjesearje I Didn't Do It, fan it Disney Channel.

Sarah Gilman
akteur
persoanlike bysûnderheden
echte namme	Sarah B. Gilman
nasjonaliteit	Amerikaansk
berne	18 jannewaris 1996
berteplak	Los Angeles (Kalifornje)
etnisiteit	Angelsaksysk Amerikaansk
jierren aktyf	2011 – no
offisjele webside
Sarah Gilman op Twitter

Libben en karriêre

Jonkheid en oplieding

Gilman waard yn 1996 berne yn Los Angeles, yn 'e Amerikaanske steat Kalifornje. Se gie nei de middelbere skoalle op 'e Flintridge Preparatory School, dêr't se yn ferskate sporten aktyf wie, wêrûnder follybal, wetterpolo, basketbal, softbal en fuotbal. Ek makke se as iennichste famke op har skoalle it swiere treningsprogramma ôf dat nedich wie om kâns te meitsjen op in plak yn it Amerikaansk fuotbalteam. Op 1 juny 2014 slagge se foar har eineksamens, wêrnei't se yn septimber fan dat jier úteinsette mei in stúdzje filmproduksje, senarioskriuwen en toaniel oan 'e Universiteit fan Súdlik Kalifornje.

Aktearkarriêre

Gilman begûn har aktearkarriêre as bern op it toaniel, en spile haadrollen yn musicals as Narnia, Alice en You're a Good Man, Charlie Brown. Yn 2011 makke se mei fyftjin jier har debút op it wite doek yn 'e koarte film Hold for Laughs, dêr't se de haadrol yn fertolke fan Margaret, in trettjinjierrich famke dat narre wurdt op in roomske skoalle foar fuortset ûnderwiis.

Op 'e tillefyzje wie Gilman foar it earst te sjen yn 2012, yn in gastrol yn 'e ôflevering Baby Fever fan 'e searje Up All Night. Oare gastrollen hie se yn searjes as Marvin Marvin (2013), Kroll Show (2014) en Jessie (2015). Fan 2012 ôf wie Gilman ek te sjen yn in weromkearende rol yn njoggen ôfleverings fan 'e komeedzjesearje Last Man Standing, as Cammy, de bêste freondinne fan jongste dochter Eve (spile troch Kaitlyn Dever), dy't op in stuit lesbysk blykt te wêzen en fereale is op Eve.

Gilman waard lykwols it bekendst mei har fêste rol as Delia Delfano yn 'e komeedzjesearje I Didn't Do It, dy't útstjoerd waard op it Disney Channel. Dy rige rûn twa seizoenen, fan 2014 oant 2015. Fierders spile Gilman yn 2018 de rol fan Velma Dinkley (it fanke mei de bril yn Scooby Doo) yn 'e film Daphne & Velma, dy't lykwols net yn 'e bioskopen te sjen wie, mar streekrjocht op fideo útbrocht waard. Yn 2018 krige Gilman ek de fêste rol fan Wynn taparte yn seizoen 4 fan 'e tillefyzjesearje Foursome.

Filmografy

Filmografy as aktrise
jier	titel	rol of funksje	opmerkings
films
2011	Hold for Laughs	Margaret	koarte film
2018	Daphne & Velma	Velma Dinkley	direkt-op-fideo útbrocht
tillefyzje
2012	Up All Night	Jamie	gastrol; ôfl. Baby Fever
2012–2017	Last Man Standing	Cammy Harris	weromkearende rol; 9 ôfl.
2013	Marvin Marvin	Hailey	gastrol; ôfl. Double Date
2014	Kroll Show	dochter fan Cardoni	gastrol; ôfl. Sponsored by Stamps
2014–2015	I Didn't Do It	Delia Delfano	fêste rol
2015	Jessie	Delia Delfano	gastrol; ôfl. The Ghostest with the Mostest
2018	Foursome	Wynn	fêste rol yn seizoen 4

Keppelings om utens

• (in) Sarah Gilman op Twitter
• (in) Folsleine filmografy fan Sarah Gilman yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.