Coen Flink

Coen Flink (folút: Coenraad Flink; Amsterdam, 24 april 1932 – Blaricum, 29 juny 2000) wie in Nederlânsk toaniel-, tillefyzje- en filmakteur, dy't yn 'e 1950-er en 1960-er jierren namme makke mei grutte rollen yn it teäter en ek meiwurke oan ferskate harkspullen op 'e radio. Fan 'e jierren tachtich ôf wied er benammen te sjen yn komeedzjesearjes op 'e tillefyzje. In protte minsken sille him fral noch kenne as ien fan 'e pakes yn 'e searje Oppassen!!!, dy't útstjoerd waard troch de VARA.

Coen Flink
akteur
Coen Flink (m.) mei Caro van Eyck (l.) en Sigrid Koetse (rj.) yn Ritmeester Buat (1968).
persoanlike bysûnderheden
echte namme	Coenraad Flink
nasjonaliteit	Nederlânsk
berne	24 april 1932
berteplak	Amsterdam (Noard-Hollân)
stoarn	29 juny 2000
stjerplak	Blaricum (Noard-Hollân)
etnisiteit	Nederlânsk
jierren aktyf	1953 – 2000
offisjele webside
Coen Flink yn 'e IMDb

Libben en karriêre

Jonge jierren

Flink waard yn 1932 yn Amsterdam berne as de soan fan 'e akteurs Richard Flink en Mieke Verstraete. Hy folge in oplieding oan 'e Amsterdamske Toanielskoalle, dêr't er yn 1953 ôfstudearre. Yn 1959 boaske er oan Ellen fan Hemert, de dochter fan regisseur Willy van Hemert.

Karriêre

Oan it begjin fan syn karriêre spile Flink benammen yn it teäter; sa wurke er by toanielselskippen as de Haachske Komeedzje en by it Nij Rotterdamsk Toaniel. Dêrby makke er namme yn grutte rollen, lykas yn 'e toanielstikken De Keapman fan Feneesje, Julius Caesar en Antonius en Kleopatra fan Shakespeare. Teffens spile er yn ferskate harkspullen foar de radio.

Yn 1966 swarde Flink it toaniel lykwols ôf, en begûn er mei syn frou, dy't sels oerstapt wie fan aktearjen nei skilderjen, oan in frij libben. Yn 1976 kearde er noch ien kear werom yn it teäter, om mei syn neef Jules Croiset de frije produksje Grote Bek en Grote Buik te spyljen. Troch it toanielspyljen op te sizzen, moast Flink finansjeel frijwat ynleverje, en bestie er sels in hoart fan 'e bystân, mar hy ferkeas earmoede boppe de swierrichheden dy't mank giene mei maatskiplik súkses. Yn dy tiid reizge er yn 'e mande mei syn frou en harren trije bern Margje, Jesse en Jeroen yn twa caravans troch Jeropa.

Nei jierren omswalke te hawwen, fêstige Flink him úteinlik yn it Goai. Neitiid fertsjinne er syn lean mei it ynsprekken fan reklamespotsjes foar radio en tillefyzje. Teffens waard er yn 'e 1980-er jierren almar aktiver as tillefyzje-akteur. Ien fan syn bekendste rollen wie datoangeande dy fan buorman Buys yn 'e VARA-tillefyzjesearje Zeg 'ns Aaa, fan 1989 oant 1993. Dêr kaam letter ek de noch bekendere rol fan pake Henry Buys yn 'e komeedzjerige Oppassen!!! út fuort, in searje dy't makke waard troch deselde produsinten.

Fierders wie Flink ek wurksum as stimakteur, wêrby't er meiwurke oan 'e Nederlânsktalige neisyngronisearrings fan in grut tal Disney-tekenfilms, lykas The Jungle Book (Baloo), Robin Hood (Lytse Jan), Snow White and the Seven Dwarfs (Grumpy) en The Lion King (Mufasa).

Ferstjerren

Coen Flink kaam yn 2000 yn 'e âlderdom fan 68 jier yn syn wenplak Blaricum te ferstjerren oan alfleisklierkanker. Hoewol't syn famylje en neiste freonen fan syn sykte ôfwisten, hied er it foar de bûtenwrâld fierders stil holden, sadat it berjocht fan syn ferstjerren foar in protte minsken as in folsleine en ûnoangename ferrassing kaam. Flink waard yn besletten fermidden kremearre op deselde deis dat syn dea bekendmakke waard.

Filmografy

As live action-akteur

Filmografy as live action-akteur
jier	titel	rol of funksje	opmerkings
films
1957	De Vliegende Hollander	?
1975	Flanagan	?
1978	Pastorale 1943	Hammer
1987	Havinck	Bork
1988	Honneponnetje	Desiderius
1993	De Tussentijd	Felix
2001	Storm in Mijn Hoofd	Lucas Bron	postúm útbrocht
tillefyzje
1959	Die Jongen van Winslow	Dickie Winslow	tillefyzjefilm
1961	De Dood van een Handelsreiziger	Biff	tillefyzjefilm
1962	De Vuurtorenwachter	Streeter	tillefyzjefilm
1967	Adieu Richard	Clotaire	tillefyzjefilm
1968	Ritmeester Buat	ritmaster Buat	tillefyzjesearje
1970	De Kleine Waarheid	Jos Boswinkel	tillefyzjesearje
1971	Karakter	mr. De Gankelaar	tillefyzjesearje
1971	Klatergoud	Gilles	tillefyzjesearje
1974	Pipo in Marobia	keizer Kalief	tillefyzjesearje
1977	Hollands Glorie	kaptein Sjemonov	tillefyzjesearje
1985	De Appelgaard	Jan Blom	tillefyzjesearje
1987	Moordspel	ynspekteur Maarschalk	tillefyzjekwis mei toaniel
1988–1990	Laat Maar Zitten	Jack de Noorman	tillefyzjesearje
1989–1993	Zeg 'ns Aaa	buorman Buys	tillefyzjesearje
1991–2000	Oppassen!!!	pake Henry Buys	tillefyzjesearje; behalven de haadrol fan pake Henry Buys spile Flink ek de weromkearende rol fan omke Eugène
1991	Bij Nader Inzien	Paul	tillefyzjesearje
1992	Op Afbetaling	Grewestein	tillefyzjefilm
1993	Kinderen voor Kinderen 14	omke Harrie	presintator fan in tillefyzjespecial
1998	Het Jaar van de Opvolging	Willem Rahusen	tillefyzjesearje

As stimakteur

N.B.: De jiertallen ferwize nei it jier dat Flink de neisyngronisearring ynspriek. Yn ferskate gefallen bestie de film doe as desennia.

Filmografy as stimakteur
jier	titel	rol of funksje	opmerkings
harkspullen
1952	De Familie Doorsnee	Fred de winkelbetsjinde
1973	Michael Strogoff, Koerier van de Tsaar	?
1977	Zomaar een Breimachine	?
1988	Asterix in Indus-land	Obelix
films
1959	Sleeping Beauty	prins Philip	Nederlânsktalige titel: Doornroosje
1963	The Sword in the Stone	sir Ector	Nederlânsktalige titel: Merlijn de Tovenaar
1967	The Jungle Book	Baloo (Baloe)	Nederlânsktalige titel: Jungle Boek
1972	Deputy Dawg	brigadier Dog	Nederlânsktalige titel: Brigadier Dog
1972	Tintin et le Lac aux Requins	kaptein Haddock	Nederlânsktalige titel: Kuifje en het Haaienmeer
1973	Robin Hood	Lytse Jan	Nederlânsktalige titel: Robin Hood
1975	Trapito	kaptein Houtpoot	Nederlânsktalige titel: Trapito
1976	La Flûte à Six Schtroumpfs	Matthijs Voddezak	Nederlânsktalige titel: De Fluit met de Zes Smurfen
1982	The Last Unicorn	kening Haggard	Nederlânsktalige titel: De Laatste Eenhoorn
1982	Heidi's Song	pake
1984	Snow White and the Seven Dwarfs	Grumpy	Nederlânsktalige titel: Sneeuwwitje en de Zeven Dwergen
1985	The Black Cauldron	de hoarnde kening	Nederlânsktalige titel: Taran en de Toverketel
1987	The Wind in the Willows	meneer Pad	Nederlânsktalige titel: De Wind in de Wilgen
1994	The Lion King	Mufasa	Nederlânsktalige titel: De Leeuwenkoning
1996	The Adventures of Pinocchio	Geppetto	Nederlânsktalige titel: De Avonturen van Pinokkio
1997	Hercules	Seus	Nederlânsktalige titel: Hercules
tillefyzjesearjes
1971	Animal Treasure Island	kaptein Long John Silver	Nederlânsktalige titel: De Vrolijke Piraten van Schateiland; oarspronklike Japansktalige titel: Dōbutsu Takarajima
1985	The Wuzzles	Dwark	Nederlânsktalige titel: De Wuzzels
1986	An American Tail	Tijger	Nederlânsktalige titel: Een Avontuur met een Staartje
1984	Seabert	Zuurmeijer	Nederlânsktalige titel: Seabert
1984–1988	Snorks	gûverneur Nathals	Nederlânsktalige titel: De Snorkels
1985–1991	Adventures of the Gummi Bears	Gruffi	Nederlânsktalige titel: Gummi Beren
1986–1987	De Bluffers	Berezoet Slimpie de foks Dans de knyn
1988	Oliver & Company	Fagin	Nederlânsktalige titel: Oliver & Co.

Keppelings om utens

• (in) Folsleine filmografy fan Coen Flink yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: Externe links, op dizze side.