Kommando

In kommando is in soldaat út in karkloft fan 'e lichte ynfantery of fan in spesjale ienheid fan 'e lânmacht (of soms fan oare kriichsmachtûnderdielen). Sokken hawwe in swiere trening ûndergien en kinne dêrtroch ûnder alle omstannichheden en mei alle middels út 'e fuotten. Spesjaliteiten binne gauris dingen as amfibyske lâningsoperaasjes, parasjutespringen, abseilen en skerpsjitten.

In kamûflearre lid fan 'e Kommando Spezialkräfte fan 'e Dútske Lânmacht.

Dizze side giet oer kommando yn 'e sin fan in lid fan in militêre elite-ienheid. Foar oare betsjuttings, sjoch: kommando (betsjuttingsside).

Taken

De taken fan kommando's binne:

• operaasjes yn fijannich gebiet (efter de linys fan 'e fijân), lykas:
  • militêre ferkenning;
  • it útskeakeljen fan wichtige fijannige ofsieren;
  • de boel by de fijân yn ûnstjoer bringe;
  • it befrijen fan kriichsfinzenen;
• operaasjes op it mêd fan anty-terrorisme;
• it ûnderstypjen fan 'e reguliere ynfantery.

Kommando's kinne faak weromkend wurde oan harren griene baret; kommandotroepen wurde dêrom ynformeel ek wol de 'Griene Baretten' neamd.

Skiednis

Oarspronklik waard ûnder 'in kommando' in soarte fan gefjochtsienheid fan 'e lichte ynfantery ferstien, ynstee fan in yndividueel lid fan sa'n ienheid. It wurd komt út it Afrikaansk, en waard yn 'e tiid fan 'e Twadde Boere-oarloch (1899-1902) brûkt foar mobile ynfantery-ienheden fan 'e Súdafrikaanske Republyk en de Oranje Frijsteat, dy't in guerrilja-oarloch fierden tsjin 'e Britten. It liket wierskynlik dat it Afrikaansk it wurd oernommen hat fan it Portegeesk, dat yn 'e oan 'e Súdafrikaanske Republyk grinzgjende Portegeeske koloanje Mozambyk sprutsen waard. Minder foar de hân lizzend, mar ek mooglik is dat it Afrikaansk it wurd oernommen hat út it Dútsk, dat sprutsen waard yn it oan 'e Kaapkoloanje grinzgjende Dútsk-Súdwest-Afrika (no Namybje). Neffens dy teory soe it Dútsk it dan yn 'e santjinde iuw wer oan it Italjaansk ûntliend hawwe.

Kommandokorpsen

Nederlân beskikt oer ien kommando-ienheid: it Korps Kommandotroepen (KCT). Oare foarbylden fan kommando-ienheden binne de British Commandos en de Special Air Service (SAS) út it Feriene Keninkryk en de Kommando Spezialkräfte (KSK) fan Dútslân. De Feriene Steaten hawwe gjin kommando-ienheden dy't as sadanich beneamd wurde, mar de Army Rangers fan it Amerikaanske Leger, de Marine Raiders fan it Amerikaanske Marinierskorps en de Navy SEALs fan 'e Amerikaanske Marine kinne as kommando-ienheden beskôge wurde.

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Commando fan Wikimedia Commons.