Vengaboys

Vengaboys (útspr.: "bengaboys") is in Nederlânske dancegroep dy't oan 'e ein fan 'e jierren njoggentich grutte hits skoarde mei û.m. Boom, Boom, Boom, Boom!! en We're Going to Ibiza. Yn 2004 waard de groep opdoekt, mar fanôf 2006 treden se wer op, en yn 2010 makken se sels in lytse comeback. It 'gesicht' fan Vengaboys is sjongster Kim Sasabone. De muzyk fan 'e band kin ûnderbrocht wurde by de sjenres dance, eurodance en/of eurohouse. Vengaboys stiet bekend om dûbelsinnige (of ûndûbelsinnige) ferwizings nei geslachtsferkear yn harren lietteksten en titels, lykas Up and Down, Boom, Boom, Boom, Boom!! en Rocket to Uranus.

Vengaboys
band
De Vengaboys by in optreden yn 2013.
algemiene ynformaasje
nasjonaliteit	Nederlânsk
sjongtaal	Ingelsk
sjenre	dance
bestean	1997 – 2004 & 2006 – no
label(s)	Breakin' Records/Violent Music
prizen	World Music Award 2001
webside	www.vengaboys.com
besetting
leden	Kim Sasabone Denise van Rijswijk Robin Pors Donny Latupeirissa
âld-leden	Roy den Burger Yorick Bakker Mark Jong-A-Pin Lynn Allien J.J. van Zon

Skiednis

De earste single fan 'e Vengaboys hiet fan Parada de Tettas en waard yn 'e simmer fan 1997 útbrocht. It ferhaal waard yn omgong brocht dat twa live-discjockeys, DJ Delmundo en Danski, mei in âlde skoalbus de Spaanske baaiplakken ûnfeilich meitsje soene. Underweis hiene se fjouwer sjongers en dûnsers oppikt, dy't elts út in oar wrâlddiel ôfkomstich wiene. Under de yllegale optredens soe boppedat geregeldwei gaos ûntstean om't der jild yn it publyk smiten waard, en de plysje soe de groep efter de hakken sitte om't de mastertapes stellen wiene. Dat bliek neitiid allegear ûnsin dy't optocht wie om publisiteit te krijen.

Pas in pear singles letter waard dúdlik dat efter DJ Delmundo en Danski de Nederlânske dj's Wessel van Diepen en Dennis van den Driesschen beskûlgiene. Ek de sjongers/dûnsers blieken gewoan Nederlanners te wêzen. Alle fjouwer hiene dy in fêst kostúm. De orizjinele besetting bestie út Kim Sasabone (Armygirl), Denise van Rijswijk (Doll), Robin Pors (Sailorboy) en Roy den Burger (Cowboy). De besetting fan Doll, Sailorboy en Cowboy ûndergie meitiid ferskate feroarings, mar de rol fan Armygirl is nea ferfolle troch immen oars as Sasabone.

Parada de Tettas en de twadde single To Brazil waarden beskieden hits. De trochbraak kaam mei Up & Down, dat yn it foarjier fan 1998 de top 10 helle. Itselde barde dat jiers mei de nûmers We Like to Party! en Boom, Boom, Boom, Boom!!, dy't ek ynternasjonaal trochbrieken. Yn 1999 folge in trêde grutte ynternasjonale hit mei We're Going to Ibiza. Nei't yn 1999 noch Kiss (When the Sun Don't Shine) en yn 2000 Shalala Lala en Uncle John from Jamaica beskieden hits waarden, gie it stadichoan berchôf mei Vengaboys. Wol wûnen se yn 2001 noch de World Music Award foar bêstferkeapjende dance-groep fan it jier. Uteinlik waard yn 2004 besletten om 'e groep op te doeken.

Lykwols begûnen oardel jier letter de oanfragen foar nije optredens binnen te streamen. Yn Ingelân kamen feesten mei jierren 90-muzyk yn 'e moade, en dêrwei wreide dy raazje him út oer it kontinint. De Vengaboys, dy't ûnderwilens allegear in nije karriêre begûn wiene, fûnen dat se sok goed jild net lizze litte koene. Dat se besleaten om it der gewoan 'by' te dwaan, ien- of twaris yn 'e moanne. Dat waard lykwols al gau 80 kear yn 't jier. Noch altyd giet it mei Vengaboys as it spoar. Yn 2010 makken se sels in lytse comeback mei in 21e plak yn 'e hitlisten mei it nûmer Rocket to Uranus.

Besetting

Hjoeddeiske besetting

• Kim Sasabone (Armygirl): 1997-2004, 2006-no
• Denise van Rijswijk (Doll): 1997-2002, 2006-no
• Robin Pors (Sailorboy): 1997-1999, 2009-no
• Donny Latupeirissa (Cowboy): 2006-2011, 2012-no

Eardere besetting

• Roy den Burger (Cowboy): 1997-2004
• Yorick Bakker (Sailorboy): 1999-2002, 2006-2009
• Mark Jong-A-Pin (Sailorboy): 2002-2004
• Lynn Allien (Doll): 2002-2004
• J.J. van Zon (Cowboy): 2012

Diskografy

Albums

Jier	Titel	Resultaat
1998	Up & Down – The Party Album!	Nederlân: goud
	Greatest Hits, Part 1 (alternative namme: The Party Album)	Nij-Seelân: 5x platina Kanada: 3x platina Austraalje: 2x platina Grut-Brittanje: 2x platina Nederlân: 2x platina Feriene Steaten: goud    Switserlân: goud
2000	The Platinum Album

Singles

jier	titel	heechste posysje yn 'e Ned. hitlisten	resultaat
1997	Parada de Tettas	14
	To Brazil	22
1998	Up and Down	5	Grut-Brittanje: goud
	We Like to Party!	2	Austraalje: platina Grut-Brittanje: goud Nederlân: goud
	Boom, Boom, Boom, Boom!!	1 (4 wiken)	Nederlân: 2x platina Austraalje: platina Dútslân: goud Grut-Brittanje: goud
1999	We're Going to Ibiza	1 (3 wiken)	Nederlân: platina Austraalje: goud Grut-Brittanje: goud
	Kiss (When the Sun Don't Shine	2	Grut-Brittanje: sulver
2000	Shalala Lala	2	Dútslân: platina Austraalje: goud    Switserlân: goud Grut-Brittanje: sulver
	Uncle John from Jamaica	7
	Cheekah Bow Bow (That Computer Song) (mei Cheekah)	32
	Forever as One	77
2010	Rocket to Uranus	21
2013	Hot, Hot, Hot	29
2014	2 Brazil	52

Keppelings om utens

• (in) Offisjele webside fan Vengaboys

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Vengaboys fan Wikimedia Commons.