Jong-Feintepartij

De Jong-Feintepartij is in keatswedstryd dy't elts jier op 'e fjirde woansdei fan 'e moanne july holden wurdt yn it Fryske doarp Easterein. It is in partij foar jongfeinten fan 17 oant 21 jier (junioaren). De Jong-Feintepartij wurdt organisearre troch it KNKB. It is in saneamde 'ôfdielingswedstryd', dêr't eltse by it KNKB oansletten keatsferiening ien of mear partoeren foar ynskriuwe mei.

Jong-Feintepartij
plak en tiid
lân	Nederlân
provinsje	Fryslân
gemeente	Súdwest-Fryslân
plak	Easterein
holden yn	sportpark De Skoalleseize
datum	4e woansdei fan july
bysûnderheden
soarte evenemint	sport (keatsen)
bestean	2005 – no
org. troch	KNKB
offisjele webside
www.kfeasterein.nl/.../ynformaasje

Skiednis en beskriuwing

De Jong-Feintepartij waard yn 2005 foar it earst ferkeatst, op inisjatyf fan 'e Keatsferiening Easterein, mei as doel om in brêge te slaan tusken de kategoryen fan 'e jonges en de senioaren. De KNKB en pleatslike ôfdielings kampten nammentlik al jierren mei it probleem dat jonge keatsers dy't te âld wiene om mei te dwaan oan 'e Freulepartij yn Wommels, mar noch te jong om by de senioaren te keatsen, ôfheakken om't der foar harren in gat fan fjouwer jier bestie dêr't neat te winnen wie. Foar de earste edysje fan 'e Jong-Feintepartij, op 27 july 2005, skreaune 26 partoeren har yn.

It winnende partoer is in jier hâlder fan 'e wikselpriis de "Sulveren Leest", dy't beskikber steld waard troch Jan Hiemstra fan Frjentsjer, in âld-lid fan Keatsferiening Easterein en de skriuwer fan 'e jubileumboeken Bûkelje en Boppeslaan en Fol Faasje Fierder. Njonken de wikselpriis binne der bykommende prizen yn 'e foarm fan sulverne keatsballen en in slûf mei prizejild. Yn totaal omfettet de prizepot mear as €3.300,– wêrfan't it meastepart troch sponsoring byinoar brocht is.

Winnerslist

Dit is in opsomming fan 'e winnende partoeren fan 'e Jong-Feintepartij.

• 2005 - Wytmarsum
• 2006 - Wytmarsum
• 2007 - Makkum
• 2008 - Holwert
• 2009 - Holwert
• 2010 - Tsjummearum
• 2011 - Frjentsjer
• 2012 - Tsjummearum
• 2013 - Sint-Anne
• 2014 - Seisbierrum-Pitersbierrum
• 2015 - Boalsert
• 2016 - Seisbierrum-Pitersbierrum
• 2017 - Frjentsjer
• 2018 - Berltsum

Keppelings om utens

• (fy) Offisjele webside fan Jong-Feintepartij

Boarnen, noaten en referinsjes

Boarnen, noaten en/as referinsjes:

Walda, Wim, Jong-Feintepartij yn Easterein op 25 July, yn: Groot Sneek, 6 july 2018. ――, Fjirtjinde Edysje Jong-Feintepartij, yn: Op 'e Skille, 11 july 2018, s. 3. ――, Veertiende Editie van Jong-Feintepartij, yn: van Wad tot Stad, 10 july 2018, s. 23.