Roselyn Sánchez

Roselyn Sánchez (folút: Roselyn Milagros Sánchez Rodríguez; San Juan, 2 april 1973) is in Portorikaansk aktrise, sjongster, dûnseresse, model, presintatrise, filmprodusinte en lietsjeskriuwster. Hja is it bekendst wurden mei har rollen as Elena Delgado yn 'e plysjesearje Without a Trace en as Carmen Luna yn 'e komeedzjedramarige Devious Maids. Sánchez hat ek yn ferskate films spile, lykas Rush Hour 2, Boat Trip, The Game Plan en Act of Valor.

Roselyn Sánchez
akteur
persoanlike bysûnderheden
echte namme	Roselyn Milagros Sánchez    Rodríguez
nasjonaliteit	Portorikaansk
berne	2 april 1973
berteplak	San Juan (Porto Riko)
etnisiteit	Portorikaansk
jierren aktyf	1992 – no
offisjele webside
Roselyn Sánchez op Twitter

N.B.: Dit is in Spaanske namme. De (inkele of gearstalde) foarnamme is Roselyn Milagros. De earste efternamme (fan heitekant) is Sánchez, en de twadde efternamme (fan memmekant) is Rodríguez. As dizze persoan oantsjut wurdt mei de efternamme, moat de foarm Sánchez of oars Sánchez Rodríguez brûkt wurde.

Libben en karriêre

Jonkheid en oplieding

Sánchez waard yn 1973 berne yn 'e Portorikaanske haadstêd San Juan. Se groeide op yn in húshâlding mei trije âldere bruorren en folge leger en fuortset ûnderwiis oan skoallen yn har berteplak. Al hiel jong hie se belangstelling foar sawol aktearjen as dûnsjen en fersoarge se shows foar har famylje. Nei't se slagge wie foar har eineksamens skreau Sánchez har yn oan 'e Universiteit fan Porto Riko, dêr't se marketing studearre, krekt as har heit en bruorren foar har. Nei trije jier briek se har oplieding lykwols ôf. Yn 1991, doe't se achttjin jier wie, ferfear Sánchez nei New York, dêr't se in oplieding folge yn dûnsjen, aktearjen en sjongen. Yn 1992 makke se har debút as aktrise yn 'e film Captain Ron, dy't foar in diel opnommen waard op Porto Riko.

Karriêre

Yn har heitelân krige Sánchez bekendheid as dûnseresse yn en ko-presintatrise fan 'e tillefyzjerevu Qué Vacilón. Yn 1993 wûn se de Miss Puerto Rico Petite-skientmewedstryd, yn 1994 folge troch de ynternasjonale titel fan Miss American Petite. Yn 1996 en 1997 wie Sánchez foar it earst op 'e Amerikaanske tillefyzje te sjen mei de weromkearende rol fan Pilár Domingo yn 'e soapsearje As the World Turns. Yn 1997 en 1998 hie se in fêste rol yn 'e dramasearje Fame L.A. Nei gastrollen yn 'e dramasearje Ryan Caulfield: Year One (1999) en de plysjesearje Nash Bridges (2000) en in lyts roltsje yn 'e film Held Up (1999), waard se yn 2001 cast yn 'e rol fan 'e Secret Service-aginte Isabella Molina yn 'e aksjefilm Rush Hour 2. Dy rol, wêrby't se de tsjinspylster fan 'e Hongkongske aksjeheld Jackie Chan wie, betsjutte har trochbraak as aktrise.

Yn 'e folgjende jierren spile Sánchez yn films as Boat Trip (2002), Nightstalker (2002) en Basic (2003), en hie se gastrollen yn tillefyzjesearjes as In-Laws en The Drew Carey Show. Yn 2003 spile se mei Sofia Vergara yn 'e film Chasing Papi. Datselde jiers krige se in weromkearende rol as resjersjeur yn trije ôfleverings fan 'e tillefyzjesearje L.A. Dragnet. Oare films dêr't Sánchez mids 2000-er jierren yn te sjen wie, wiene Larceny (2004), State Property 2 (2005), Underclassmen (2005), Edison (2005), Shooting Gallery (2005) en de Portorikaanske Spaansktalige film Cayo (2005). Yn 2005 hie se in weromkearende rol as ofsier fan justysje yn 'e remake fan 'e plysjesearje Kojak. Bûten de Feriene Steaten rekke Sánchez bekend as FBI-aginte Elena Delgado, yn 'e plysjesearje Without a Trace, in rol dy't se fan 2005 oant 2009 fiif seizoenen lang fertolke. Yn 2008 waard har foar dy rol in ALMA Award takend.

Yn 2003 brocht Sánchez har earste album as sjongster út, mei as titel Borinqueña, dat "Portorikaanse" betsjut, fan Borikén, de namme dy't de oarspronklike bewenners oan Porto Riko joegen. De earste single fan dat album, Amor, Amor, krige in protte omtinken yn 'e media fanwegen in nominaasje foar de Latin Grammy yn 'e kategory bêste fideoklip. Ek wurke Sánchez (as aktrise) mei oan 'e fideoklips fan 'e nûmers Hidden Agenda en Personal fan Craig David en Make Me Better fan Fabolous. Yn 2006 komponearre se de muzyk foar de musicalfilm Yellow, oer in sjongster/dûnseresse/aktrise dy't út Porto Riko wei giet om it te meitsjen yn New York. Yn dy sterk autobiografyske film spile se ek de haadrol.

Roselyn Sánchez (3e f. rj.) mei oare leden fan 'e cast fan Devious Maids yn 2013.

Yn 2007 spile Sánchez de rol fan balletleararesse Monique Vasquez yn 'e sportkomeedzjefilm The Game Plan, mei Dwayne Johnson as tsjinspiler. Datselde jiers hie se ek in cameo yn Rush Hour 3, mar dy sêne waard lykwols út 'e film snien, en Sánchez is sadwaande inkeld te sjen yn it bonusmateriaal op 'e dvd. Yn 2009 spile se yn it neo-noirdrama The Perfect Sleep. Oare films dêr't se yn spile, wiene Venus & Vegas (2010), Act of Valor (2012), Mothers and Daughters (2016) en Traffik (2018).

Yn deselde snuorje hie Sánchez gastrollen yn 'e komeedzjedramasearje Royal Pains (2009), de plysjesearje Rizzoli & Isles (2011) en de soapsearje Desperate Housewives (2012). Ien fan har bekendste rollen spile se fan 2013 oant en mei 2016 as Carmen Luna yn 'e komeedzjedramarige Devious Maids. Ek wie se yn 2014 yn in fêste rol te sjen yn 'e searje Familia en Venta. Fierders hie se gastrollen yn 'e searjes Telenovela (2016), Grand Hotel (2016) en The Rookie (2020). Yn 'e tillefyzjefilm Death of a Vegas Showgirl, út 2016, fertolke Sánchez de rol fan it (echte) moardslachtoffer út 2010 Debbie Flores-Narvaez. Fierders spile se mei yn 'e tillefyzjefilm A Taste of Summer, út 2019.

Priveelibben

Sánchez troude op 9 augustus 1998 mei de Ingelske akteur en eardere bokser Gary Stretch. Dat houlik einige op 15 april 2001 yn in skieding. Neitiid begûn Sánchez om te gean mei de Portorikaanske salsasjonger Victor Manuelle. Yn desimber 2005 makke se lykwols bekend dat sy Manuelle harren relaasje beëinige hiene en as freonen útinoar gien wiene.

Yn desimber 2007 ferloofde Sánchez har mei akteur Eric Winter nei't se twa jier mei him omgien hie. Se trouden op 29 novimber 2008 yn San Juan. Sánchez en Winter krigen twa bern: in dochter, Sebella (berne yn jannewaris 2012), en in soan, Dylan (berne yn novimber 2017).

Sánchez is wurdfierster foar de Fundación de Niños San Jorge, in Portorikaanske stifting dy't sike bern út earme gesinnen helpt.

Diskografy

albums

• 2003 – Borinqueña

singles

• 2003 – Amor, Amor (mei Tego Calderón)
• 2003 – Noche de Verano (mei Victor Manuelle)

Filmografy

Filmografy as aktrise
jier	titel	rol of funksje	opmerkings
films
1992	Captain Ron	Clarise
1999	Held Up	Trina
2001	Rush Hour 2	Secret Service-aginte Isabella Molina
2002	Boat Trip	Gabriella
2002	Nightstalker	Gabriella Martinez
2003	Basic	Nuñez
2003	Chasing Papi	Lorena
2004	Larceny	Angela
2005	State Property 2	ofsier fan justysje
2005	Underclassman	Karen López
2005	Cayo	de jonge Julia
2005	Edison	Maria
2005	Shooting Gallery	Jezebel Black	direkt-op-fideo útbrocht
2006	Yellow	Amaryllis Campos	ek senarioskriuwster en filmprodusinte
2007	The Game Plan	Monique Vasquez
2007	Rush Hour 3	Secret Service-aginte Isabella Molina	cameo; allinnich yn it bonusmateriaal op 'e dvd
2009	The Perfect Sleep	Porphyria
2010	Venus & Vegas	Kristen
2012	Act of Valor	Morales
2016	Mothers and Daughters	Jessica
2018	Traffik	Malia
tillefyzje
1996–1997	As the World Turns	Pilar Domingo	weromkearende rol
1997–1998	Fame L.A.	Lili Arguelo	fêste rol, 21 ôfl.
1999	Ryan Caulfield: Year One	Kim Veras	weromkearende rol; 2 ôfl.
2000	Nash Bridges	Belinda Cruz	weromkearende rol; 2 ôfl.
2002	Miss Miami	ûnbekend	pilotôflevering
2002	In-Laws	Dani	gastrol; ôfl. If You Can't Stand the Heat
2002	The Drew Carey Show	Maria	gastrol; ôfl. Drew Tries Hot Salsa
2003–2004	L.A. Dragnet	resjersjeur Elana Macias	weromkearende rol; 3 ôfl.
2005	Kojak	ofsier fan justysje Carmen Warrick	fêste rol; 10 ôfl.
2005–2009	Without a Trace	FBI-aginte Elena Delgado	fêste rol; 89 ôfl.
2009	Royal Pains	Sofia Santos	gastrol; ôfl. Crazy Love
2011	Rizzoli & Isles	ofsier fan justysje Valerie Delgado	gastrol; ôfl. Can I Get a Witness?
2012	Desperate Housewives	Carmen Luna	cameo; ôfl. Finishing the Hat
2013–2016	Devious Maids	Carmen Luna	fêste rol; 49 ôfl.
2014	Familia en Venta	Lili	fêste rol
2016	Telenovela	ferslachjouster	cameo; ôfl. The Harricane
2016	Death of a Vegas Showgirl	Debbie Flores-Narvaez	tillefyzjefilm
2019	A Taste of Summer	ûnbekend	tillefyzjefilm
2019	Grand Hotel	Gigi Mendoza	fêste rol; 13 ôfl.
2020	The Rookie	Valerie Castillo	gastrol; ôfl. The Overnight
2021	Fantasy Island	Elena Roarke
2022	’Til Jail Do Us Part	Sofía

Keppelings om utens

• (in) Roselyn Sánchez op Twitter
• (in) Folsleine filmografy fan Roselyn Sánchez yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Roselyn Sánchez fan Wikimedia Commons.