Aya Cash

Aya Cash (folút: Aya Rachel Cash; San Francisco, 13 july 1982) is in Amerikaansk toaniel-, film- en tillefyzje-aktrise. Hja is benammen bekend fan 'e komeedzjesearjes You're the Worst en Welcome to Flatch.

Aya Cash
akteur
persoanlike bysûnderheden
echte namme	Aya Rachel Cash
nasjonaliteit	Amerikaansk
berne	13 july 1982
berteplak	San Francisco (Kalifornje)
etnisiteit	Ingelsk Joadsk
jierren aktyf	2006 – no
offisjele webside
Aya Cash yn 'e IMDb

Libben en karriêre

Jonkheid en oplieding

Cash waard yn 1982 berne yn San Francisco, yn 'e Amerikaanske steat Kalifornje, dêr't se ek opgroeide. Hja is de dochter fan 'e romanskriuwster Kim Addonizio en de boedistyske preker Eugene Cash, en it bernsbern fan Wimbledon-tenniskampioene Pauline Betz Addie en sportpublisist Bob Addie. Cash is fan mingd Ingelsk-Joadsk etnysk komôf. Se beskôget harsels as Joadinne om't se joadsk grutbrocht waard, mar se praktisearret de religy net mear.

Cash genoat in oplieding oan 'e San Francisco School of the Arts, en behelle letter in bachelorstitel yn 'e skiene keunsten oan it Guthrie Theater Actor Training Program fan 'e Universiteit fan Minnesota.

Aktearkarriêre

Yn 2006 sette Cash útein mei in karriêre as aktrise, wêrby't se ferskate gastrollen ferfolle yn bekende tillefyzjesearjes, lykas de plysjesearjes Law & Order, Law & Order: Criminal Intent en Law & Order: SVU, de komeedzjesearje Modern Family en de dramasearje The Good Wife. Yn 2011 hie se in fêste rol yn 'e komeedzjesearje Traffic Light, dy't ien seizoen rûn.

Fan 2008 ôf spile Cash ek yn films, wêrby't se lytse roltsjes fertolke yn û.m. Off Jackson Avenue (2008), Deception (2008), Winter of Frozen Dreams (2009), The Bits in Between (2009), The Oranges (2011), The Happy House (2013) en Begin Again (2013). Har bekendste filmroltsje hie se as Janet, de assistinte fan Jordan Belfort (spile troch Leonardo DiCaprio) yn The Wolf of Wall Street (2013). Yn 2014 spile Cash ek ien fan 'e haadrollen yn it toanielstik Trudy and Max in Love, dat off-Broadway op 'e planken brocht waard.

Yn 2014 waard Cash as Gretchen Cutler cast yn ien fan 'e haadrollen fan 'e komeedzjesearje You're the Worst, dy't rûn oant en mei 2019. Foar dy rol waard har troch de tillefyzjekritisy rûnom lof taswaaid. De webside The A.V. Club omskreau de fertolking fan har rol yn it twadde seizoen as "de bêste aktearprestaasje fan 2015". Yn 2016 waard Cash foar har rol fan Gretchen Cutler nominearre foar de Critics' Choice Television Award foar bêste aktrise yn in komeedzjesearje.

Cash waard yn 2019 cast as de superheldinne Stormfront yn it twadde seizoen fan 'e swarte komeedzje-dramasearje The Boys, dat fan septimber 2020 ôf beskikber kaam fia streamingtsjinst Prime Video. Ek yn 2020 spile Cash sjoernaliste Cheryl Peterson yn 'e nije komeedzjesearje Welcome to Flatch, dy't útstjoerd waard troch Fox.

Priveelibben

Cash mette senarioskriuwer en tillefyzjeprodusint Josh Alexander doe't se in servearster wie yn in restaurant dêr't er gauris del kaam. Se giene sân jier mei-inoar om foar't se yn 2012 trouden. Se wenje yn New York. Cash is ambassadrise foar INARA, in non-gûvernemintele organisaasje dy't yn 'e boargeroarloch ferwûne rekke bern út Syrje medyske help jout.

Op har rêch hat Cash in tatoeaazje fan in hauk om't har altyd ferteld wie dat "aya" (איה) it Hebriuwske wurd foar "hauk" is. Doe't se Israel besocht, kaam se der lykwols efter dat aya dan in argaysk wurd foar hauk wêze mei, mar dat it yn it modern Hebriuwsk it wurd is foar "hunichfalk", in oar soarte rôffûgel.

Filmografy

Filmografy as aktrise
jier	titel	rol of funksje	opmerkings
tillefyzje
2006	Law & Order	Janine Lesko	gastrol; ôfl. Kingmaker
2006	Law & Order: Criminal Intent	Lori	gastrol; ôfl. Weeping Willow
2007	Brotherhood	Martha Danners	gastrol; ôfl. Shelter from the Storm (dûbele ôfl.)
2007	Spellbound	Chrissy	nea útstjoerde pilotôfl.
2009	Law & Order: Special Victims Unit	Katrina Lychkoff	gastrol; ôfl. Hothouse
2010	Mercy	Bliss Edlestein	gastrol; ôfl. Too Much Attitude and Not Enough Underwear
2010	Strange Brew	Lizzy	nea útstjoerde pilotôfl.
2011	Traffic Light	Callie	haadrol; 13 ôfl.
2012	Friday Night Dinner	Lizzy	nea útstjoerde pilotôfl.
2012	A Gifted Man	Trish Sulloway	gastrol; ôfl. In Case of Heart Failure
2013	The Newsroom	Shelly Wexler	weromkearende rol; 3 ôfl.
2013	We Are Men	Claire	weromkearende rol; 5 ôfl.
2014–2019	You're the Worst	Gretchen Cutler	haadrol; 62 ôfl.
2015	Modern Family	Vanessa	gastrol; ôfl. Rash Decisions
2015	The Good Wife	Amber Audrey	gastrol; ôfl. Don't Fail
2015	Sirens	Cindy	gastrol; ôfl. Let Pythons Be Pythons
2015	The Walker	ûnbekend	weromkearende rol; 2 ôfl.
2016	American Dad!	Jody de servearster	as stimaktrise; gastrol; ôfl. The Unincludeds
2016–2019	Easy	Sherri	weromkearende rol; 4 ôfl.
2019	Fosse/Verdon	Joan Simon	minysearje
2019	Will & Grace	Olivia Walker	gastrol; ôfl. The Scales of Justice
2020–2022	The Boys	Klara Risinger / Stormfront / Liberty	haadrol (seiz. 2); weromkearende rol (seiz. 3); 10 ôfl.
2020–2022	Welcome to Flatch	Cheryl Peterson	haadrol
2021	Family Guy	ûnbekend	as stimaktrise; gastrol; ôfl. Peterschmidt Manor
2022	Robot Chicken	ferskaat	as stimaktrise; gastrol; ôfl. May Cause Internal Diarrhea
2022	The Girl from Plainville	Katie Rayburn	minysearje
2022	The First Lady	Shirley Liebowitz	weromkearende rol; 2 ôfl.
films
2008	Off Jackson Avenue	Olga
2008	Deception	sekretaresse #2
2009	Winter of Frozen Dreams	prostituee
2009	The Bits in Between	Suzy
2011	The Oranges	Maya
2012	Sleepwalk with Me	Hannah
2013	The Happy House	Wendy
2013	Begin Again	Jenny
2013	The Wolf of Wall Street	Janet
2014	Loitering with Intent	Jesse
2016	10 Crosby	Aya	koarte film
2016	All Exchanges Final	Dom	koarte film
2017	Village People	Barbara
2017	Mary Goes Round	Mary
2018	Brand New Old Love	Hannah Becker
2018	Game Over, Man!	Cassie
2018	Social Animals	Jane
2020	Scare Me	Fanny
2021	We Broke Up	Lori

Keppelings om utens

• (in) Folsleine filmografy fan Aya Cash yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Aya Cash fan Wikimedia Commons.