Chanel West Coast

Chanel West Coast (wiere namme: Chelsea Dudley; Los Angeles, 1 septimber 1988) is in Amerikaansk presintatrise, model, aktrise, rapper, lietsjeskriuwster en realitystjer. Hja waard fan 2009 ôf bekend troch har gearwurking mei presintator, realitystjer, tillefyzjeprodusint, akteur en profesjoneel skateboarder Rob Dyrdek, earst yn it realitytillefyzjeprogramma Rob Dyrdek's Fantasy Factory, en sûnt 2011 yn 'e ynternetfilmkesrubryk Ridiculousness.

Chanel West Coast
tillefyzje- en/of radiopersoanlikheid
Chanel West Coast yn 2013
persoanlike bysûnderheden
echte namme	Chelsea Dudley
nasjonaliteit	Amerikaansk
berne	1 septimber 1988
berteplak	Los Angeles (Kalifornje)
etnisiteit	Iersk Ingelsk Russysk
wurkpaad
wurksum as	presintatrise, model, rapper, lietsjeskriuwster, aktrise, realitystjer
medium	tillefyzje
wurksum by	MTV
bekend fan	Ridiculousness
jierren aktyf	2009 – no
offisjele webside
www.iamchanelwestcoast.com

Libben en karriêre

Jonkheid en oplieding

West Coast waard yn 1988 berne yn Los Angeles, yn 'e Amerikaanske steat Kalifornje. Yn twa ôfleverings fan Ridiculousness fertelde se sels dat dat se fan Iersk en Russysk etnysk komôf is. Neffens oare boarnen is se (ek) fan etnysk Ingelsk komôf. Se groeide op as bern fan skieden âlden, en libbe in diel fan 'e tiid by har mem yn 'e Los Anzjelynske wyk North Hollywood en in oar diel by har heit yn 'e New York. Har heit wurke as live-DJ, en naam West Coast al mei acht jier mei nei nachtklubs. Hja folge al ier sjong- en dûnslessen, en die mei oan ferskate talintejachten en dûnswedstriden.

Karriêre

Muzyk

Yn 2009 wurke West Coast mei oan it nûmer Melting Like Ice Cream, fan Tiffanie Anderson, en it jiers dêrop oan it nûmer Tramp, fan Somaya Reece. Letter wie se ek belutsen by it liet PHAMOUS, fan Planet Hollywood, wêrfoar't se gearwurke mei Midi Mafia. Yn 2011 befêstige West Coast dat se in kontrakt tekene hie mei it platelabel Zone 4, fan Polow Da Don, mar letter ferliet se dy maatskippij sûnder der materiaal útbrocht te hawwen. Dat die se neitiid wol op eigen manneboet, en sa ûntstie it nûmer I Love Money, dat útbrocht waard as in fergese download.

Yn 2012 tekene West Coast in kontrakt mei it platelabel Young Money, fan rapper Lil Wayne, dêr't se yn 2013 de mixtape Now You Know útbrocht. Dêroan wurken û.m. Snoop Dogg en Robin Thicke mei. West Coast promoate har wurk mei twa grutte toernees troch de Feriene Steaten, de Punch Drunk Love Tour en de Now You Know Tour. Se brocht ek in fideoklip út foar it nûmer Been On, dêr't French Montana oan meiwurke. Fierders wurke se gear mei in oare froulike rapper, Shanell, oan it nûmer Hittin' Like, foar it sammelalbum Young Money: Rise of an Empire, dat yn 2014 de BET Award foar bêste groepsalbum wûn.

Yn 2014 sei West Coast dat se úteinset wie mei de opnamen fan har eigen debútalbum. De earste beide singles, Blueberry Chills en New Feeling, waarden yn jannewaris 2014 útbrocht, en de trêde, mei as titel Miles and Miles, yn novimber fan dat jier. Yn 2015 kaam de fjirde single út, dy't Bass in the Trunk hiet.

Tillefyzje

Yn 2008 kaam West Coast fia mienskiplike freonen yn 'e kunde mei presintator, realitystjer, tillefyzjeprodusint, akteur en profesjoneel skateboarder Rob Dyrdek. Koarte tiid letter bea dy har in baan oan as resepsjoniste, en sa rekke hja yn 2009 belutsen by Dyrdek syn realitytillefyzjeprogramma Rob Dyrdek's Fantasy Factory, dy't seis seizoenen lang útstjoerd waard op MTV.

Yn 2011 makke West Coast har akteardebút as Sheila yn in ôflevering fan 'e MTV-searje The Hard Times of RJ Berger. Datselde jiers frege Dyrdek har om yn 'e mande mei himsels en Steelo Brim de ynternetfilmkesrubryk Ridiculousness te presintearjen. Dat waard in grut súkses, dy't West Coast foar it earst ek bûten de Feriene Steaten bekendheid brocht. Dêrnjonken wurket se fan 2012 ôf as stimaktrise mei oan 'e tekenfilmrige Wild Grinders, in oar projekt fan Dyrdek, wêrfoar't se har stim lient oan it personaazje Flipz.

Priveelibben

Yn 2012 frege West Coast har eigen fajisemint oan, mei't se $543 oan creditcardskulden hie, in skuld fan $1.000 foar kabeltillefyzje en noch ien fan $9.000 op it mêd fan abbekatekosten. Yn 2013 waard se troch de rjochter ûntlêste fan dy skulden, mar yn 2014 frege se fannijs fajisemint oan. West Coast hat in Pommeraner dy't fan Weezy hjit, en dy't yn in ôflevering fan Ridiculousness ferskynde.

Keppelings om utens

• (in) Offisjele webside fan Chanel West Coast
• (in) Folsleine filmografy fan Chanel West Coast yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.