Molly Ephraim

Molly Ephraim (Philadelphia, 22 maaie 1986) is in Amerikaansk toaniel-, musical-, film- en tillefyzje-aktrise. Hja is it bekendst wurden mei har rollen yn 'e films College Road Trip (2008), Paranormal Activity 2 (2010), Paranormal Activity: The Marked Ones (2014) en The Front Runner (2018), en as leechhollige dochter Mandy Baxter yn 'e komeedzjesearje Last Man Standing (2011-2017).

Molly Ephraim
akteur
Molly Ephraim yn 2018
persoanlike bysûnderheden
echte namme	Molly Ephraim
nasjonaliteit	Amerikaansk
berne	22 maaie 1986
berteplak	Philadelphia (Pennsylvania)
etnisiteit	Joadsk
jierren aktyf	2002 – no
offisjele webside
Molly Ephraim yn 'e IMDb

Libben en karriêre

Jonkheid en oplieding

Ephraim waard yn 1986 berne yn Philadelphia, yn 'e Amerikaanske steat Pennsylvania, as de dochter fan âlden fan etnysk Joadsk komôf, William Ephraim en Nina Zebooker. Hja groeide op yn Bucks County, op it plattelân fan Pennsylvania. As bern trede se al op yn it Bucks County Playhouse, en as teenager die se mei oan profesjonele toanielproduksjes yn it Prince Music Theater en by de Arden Theatre Company yn Philadelphia.

Ephraim studearre en behelle in bachelorstitel yn religieuze stúdzjes oan 'e Universtiteit fan Princeton, yn Princeton yn Nij-Jersey. Under har stúdzjetiid spile se mei yn en goreografearre se ferskate optredens fan 'e toanielselskippen Princeton University Players en Theatre Intime.

Molly Ephraim yn 2012 by de presintaasje fan 'e nije komeedzjesearje Last Man Standing.

Aktearkarriêre

Yn 2002 makke Ephraim har debút op Broadway, as Readkapke yn 'e revival fan Into the Woods. Foar dy rol waard se nominearre foar in Drama League Award. Yn 2004 spile se wer op Broadway, diskear yn in revival fan Fiddler on the Roof, as Bielke. Off-Broadway spile Ephraim û.o. Rachel Stein in End Days en Olive yn The 25th Annual Putnam County Spelling Bee. Ek hat se Anne Frank spile yn it stik The Diary of Anne Frank, yn it Westport Country Playhouse yn Westport yn 'e steat Connecticut. Yn Los Angeles stie se yn 2015 yn it Geffen Playhouse op 'e planken as Daphna Feygenbaum yn it toanielstik Bad Jews fan Joshua Harmon.

Ephraim spile har earste filmrol yn 2008 yn College Road Trip, as Wendy Greenhut. Datselde jiers wie se ek foar it earst op 'e tillefyzje te sjen, mei in gastrol yn in ôflevering fan 'e plysjesearje Law & Order. Fierders spile hja Ali Rey yn 'e films Paranormal Activity 2 (2010) en Paranormal Activity: The Marked Ones (2014), en yn 2009 wie hja te sjen yn 'e ôflevering It's Like Jamais Vu All Over Again fan 'e rige Royal Pains.

By it grutte publyk briek Ephraim fan 2011 ôf troch mei har fêste rol yn 'e komeedzjesearje Last Man Standing. Dêryn spile se de rol fan Mandy Baxter, de leechhollige en gauris egoïstyske middelste dochter fan 'e personaazjes fan Tim Allen en Nancy Travis. De searje rûn ynearsten oant en mei 2017 seis seizoenen by tillefyzjenetwurk ABC, mar doe't er yn 2018 fannijs opstart waard by Fox, keas Ephraim derfoar om net mear yn har âlde rol werom te kearen. Dy waard doe oernommen troch Molly McCook.

Neitiid hie Ephraim weromkearende rollen yn 'e tillefyzjesearjes Brockmire, Halt and Catch Fire en Casual en in gastrol yn in ôflevering fan 'e komeedzjesearje Modern Family. Yn 2018 fertolke se in byrol yn 'e politike biografyske film The Frontrunner, wêryn't se op 'e nij gearwurke mei Kaitlyn Dever, dy't de jongste dochter spile yn Last Man Standing. Fierders hie Ephraim yn 2019 in gastrol as de abbekate fan Gypsy Rose Blanchard yn 'e rige The Act, op Hulu. Yn 2020 spile se Hazel Prystock, de lesbyske minneresse fan sekretaresse Della Street yn 'e remake fan 'e rjochtbankdramasearje Perry Mason.

Filmografy

Filmografy as aktrise
jier	titel	rol of funksje	opmerkings
tillefyzje
2003	Hench at Home	Ally Hench	ûnferkochte pilotôflevering
2008	Law & Order	Anne-Marie Liscomb	gastrol; ôfl. Tango
2009	Royal Pains	Beth Samuels	gastrol; ôfl. It's Like Jamais Vu All Over Again
2010	The Wonderful Maladys	emofanke	ûnferkochte pilotôflevering
2011–2017	Last Man Standing	Mandy Baxter	fêste rol; 130 ôfl.
2017	Brockmire	barkeeper	weromkearende rol; 5 ôfl.
2017	Halt and Catch Fire	Alexa Vonn	weromkearende rol; 5 ôfl.
2018	Casual	Jess	weromkearende rol; 3 ôfl.
2019	The Act	Kate	gastrol; ôfl. Free
2019	Modern Family	Libby	gastrol; ôfl. Snapped
2020	Perry Mason	Hazel Prystock	weromkearende rol; 5 ôfl.
2021	Pretty Smart	Margot	gastrol; ôfl. Did you hear?! Chelsea ran into Margot!
films
2008	College Road Trip	Wendy Greenhut
2010	Paranormal Activity 2	Ali Rey
2014	Paranormal Activity: The Marked Ones	Ali Rey
2018	The Front Runner	Irene Kelly

Keppelings om utens

• (in) Folsleine filmografy fan Molly Ephraim yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.