Haadmenu iepenje

Tim Allen (skûlnamme fan Timothy Alan Dick; Denver (Kolorado), 13 juny 1953) is in Amerikaansk komyk en akteur, dy't benammentlik bekend wurden is troch syn rollen yn 'e komeedzjesearjes Home Improvement en Last Man Standing en de films The Santa Clause en Galaxy Quest. Hy fersoarge ek de stim fan it personaazje Buzz Lightyear yn 'e Toy Story-tekenfilms.

Tim Allen
Filmklapper.png akteur
Tim Allen 2012.jpg
persoanlike bysûnderheden
echte namme Timothy Alan Dick
nasjonaliteit Flag of the United States.svg Amerikaansk
berne 13 juny 1953
berteplak Denver (Kolorado)
etnisiteit Flag of the United States.svg Angelsaksysk Amerikaansk
jierren aktyf 19751979 & 1981 – no
prizen Golden Globe 1994
offisjele webside
timallen.com

Ynhâld

Libben en karriêreBewurkje

Jonkheid en opliedingBewurkje

Tim Allen waard yn 1953 berne yn Denver, yn 'e steat Kolorado, as de soan fan makeler Gerald M. Dick (1923-1964), en Martha Katherine Fox, in maatskiplik wurkster. Hy wie de middelste fan fiif bruorren. Doe't er alve jier wie, kaam syn heit om by in auto-ûngemak dat feroarsake waard troch ien dy't dronken efter it stjoer siet. Twa jier dêrnei wertroude Allen syn mem mei in man dêr't se yn har skoaltiid ferkearing mei hân hie, en dy't tsjin dy tiid in súksesfol sakeman wie. Se ferhuze doe mei har fiif soannen nei Michigan, en loek dêr yn Birmingham, in foarstêd fan Detroit, by har nije man en dy syn trije bern út in earder houlik yn.

Allen gie yn Birmingham nei de middelbere skoalle, dêr't er syn earste aktearûnderfining opdie by de skoaltoanielklub. Neitiid studearre er oan 'e Universiteit fan Sintraal Michigan, yn Mount Pleasant, mar stapte yn 1974 oer nei de Universiteit fan Westlik Michigan, yn Kalamazoo. Dêr wurke er by it universiteitsradiostasjon WIDR en behelle er yn 1976 in bachelorstitel yn kommunikaasjekunde mei in spesjalisaasje yn radio- en tillefyzjeproduksje en de byfakken filosofy en design.

KarriêreBewurkje

Yn 1975 sette Allen útein mei in karriêre as komyk, doe't er nei dêrta útdage te wêzen troch in maat fan him, meidie oan in komeedzjejûn yn in nachtklub yn Royal Oak, in foarstêd fan Detroit. Dêrtroch krige er de smaak te pakken en die er faker mei oan sokke jûnen. Ek wurke er mei oan ferskate reklamespotsjes op 'e regionale tillefyzje. Nei ferrin fan tiid ferfear er nei Los Angeles, dêr't er stand-up comedy begûn te dwaan yn ferskate klubs en ek yn praatprogramma's op 'e tillefyzje. Sa wist er him de hiele tachtiger jierren troch aardich te bedrippen. Hy briek lykwols pas troch doe't er him talei op aktearjen.

 
Tim Allen (m.) mei syn mei-akteurs út 'e searje Last Man Standing, Héctor Elizondo (l.) en Christoph Sanders (rj.).

Nei eigen sizzen hat Allen in beheind aktearfermogen; yn in fraachpetear seid er: "Ik kin in rol allinnich mar spylje as ik út persoanlike ûnderfining putte kin, en dy boarne kin nuvere hurd opdrûgje." Nettsjinsteande dat rekke er wrâldferneamd mei syn rol fan Tim "The Tool-Man" Taylor, yn 'e populêre komeedzjesearje Home Improvement, dy't rûn fan 1991 oant 1999. Syn nije faam late derta dat er ek foar filmrollen frege waard, en sa spile er yn 1994 yn The Santa Clause in man dy't troch by fersin de krystman út 'e ljochten te helpen sels krystman wurde moat. It wie net in djipdollend ferhaal, mar likegoed waard de film in grut súkses en der waarden noch twa ferfolgen fan makke: The Santa Clause 2, út 2002, en The Santa Clause 3: The Escape Clause, út 2006.

Fierders spile Allen ek yn û.m. de Star Trek-parody Galaxy Quest, út 1999, en fertolke er de stim fan it personaazje Buzz Lightyear yn 'e tige súksesfolle Toy Story-tekenfilms. Sûnt 2011 is er wer op 'e tillefyzje te sjen, mei de haadrol yn 'e komeedzjesearje Last Man Standing, as tsjinspiler fan Nancy Travis. Allen spilet yn dy searje Mike Baxter, in man dy't fan echte manljusdingen hâldt, lykas sport en houthakjen en dingen deasjitten, mar dy't himsels steande sjen moat te hâlden yn hûs fol froulju.

PriveelibbenBewurkje

Op 2 oktober 1978 waard Allen arrestearre op it Kalamazoo/Battle Creek International Airport om't er goed 650 g kokaïne yn syn bagaazje hie. Neitiid trof er in skikking mei de iepenbier oanklager, wêrby't ôfpraat waard dat Allen oare drugsdealers oanjaan soe en skuld bekenne soe op it mêd fan drugssmokkel. Yn ruil dêrfoar soed er dan in selstraf krije fan trije oant sân jier ynstee fan libbenslang, wat ek ta de mooglikheden hearde. Allen siet dêrnei twa jier en fjouwer moannen út, fan febrewaris 1979 oant juny 1981, yn in tichthûs yn Sandstone, yn Minnesota.

Yn 1997 waard Allen yn Birmingham (Michigan) fannijs arrestearre, no om't er dronken efter it stjoer siet. Yn dizze saak krige er in jier ûnder betingst en in troch de rjochter oplein ferbliuw yn in ôfkickklinyk foar alkoholisten.

Allen is twaris yn it houliksboatsje stapt. Fanôf 7 april 1984 wied er troud mei Laura Diebel, mei wa't er yn 1989 in dochter, Katherine, krige. Hy en syn earste frou giene yn 1999 útinoar, en skieden formeel yn 2003. Op 7 oktober 2006 wertroude Allen mei aktrise Jane Hajduk yn Grand Lake, nei't se al fiif jier mei-inoar omgien wiene. Yn 2009 krigen se in dochter, Elizabeth.

Keppelings om utensBewurkje

Boarnen, noaten en referinsjesBewurkje

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.