Disney Studios Australia

De Disney Studios Australia binne in studiokompleks yn Sydney, yn 'e Australyske steat Nij-Súd-Wales. It bedriuw waard yn 1998 oprjochte troch de Amerikaanske filmstudio 20th Century Fox en stie 24 jier lang bekend as Fox Studios Australia. Nei de oername fan 20th Century Fox troch The Walt Disney Company yn 2019 krige it studiokompleks yn 2022 syn hjoeddeistige namme. Yn 'e Disney Studios Australia binne in grut tal films en tillefyzjesearjes opnommen, wêrûnder de trije dielen fan 'e Star Wars-prequeltrilogy, The Matrix, Mad Max: Fury Road en Thor: Love and Thunder. Ek is der de produksje fersoarge fan tekenfilms en tekenfilmsearjes, lykas Star Wars: The Clone Wars en The Simpsons.

Disney Studios Australia
algemien
nasjonaliteit	Austraalje
type	privaat
sektor	tillefyzje- en filmyndustry
fêstige yn	Sydney (Nij-Súd-Wales)
oprjochte	1998
oprjochter	20th Century Fox
eigner	The Walt Disney Company
mem	Walt Disney Studios Operations
offisjele webside
www.disneystudiosaustralia.com
kaart
Lokaasje yn Sydney.

Skiednis

De Disney Studios Australia steane op it plak dêr't earder de Sydney Showground wie yn 'e wyk Moore Park. Dêr waard foarhinne 116 jier efterinoar de Keninklike Peaskeshow holden, it grutste evenemint fan Austraalje. Dat waard nei de edysje fan 1997 ferhuze nei in oar plak, sadat de Sydney Showground frijkaam.

De grûn waard oankocht troch News Corporation, it bedriuw fan 'e Australyske mediamagnaat Rupert Murdoch. Der ferriisde doe in nij, hypermodern film- en tillefyzjestudiokompleks, dat Fox Studios Australia kaam te hjitten. Fan novimber 1999 oant 2001 wie op it backlot fan it kompleks in ferdivedaasjepark fêstige, dat nei't it skynt basearre wie op Universal Studios Hollywood, Universal Studios Florida en Disney's Hollywood Studios. Dat kost $261 miljoen om te bouwen, mar it wie blykber gjin súkses.

De yngong fan it studiokompleks.

Yn 2012 kundige Rupert Murdoch oan dat er besletten hie om News Corporation op te spjalten yn twa aparte bedriuwen. Dat krige yn 2013 syn beslach. Dêrby waarden alle belangen yn 'e tillefyzje- en filmyndustry ûnderbrocht by it nije 21st Century Fox, wylst alle útjouwerijen byinoarbrocht waarden yn it nije News Corp. Dy splitsing waard sa beävensearre dat 21st Century Fox foar de wet in fuortsetting wie fan 'e âlde News Corporation, wylst News Corp in folslein nij bedriuw wie. Fox Studios Australia kaam op dy manear yn 'e hannen fan 21st Century Fox, dat yn 2019 oernommen waard troch The Walt Disney Company. Nei't de stofwolken fan 'e mega-oername wat lizzen gien wiene, waard Fox Studios Australia op 10 oktober 2022 omneamd ta Disney Studios Australia.

Bestjoer

De Disney Studios Australia binne yn it bedriuwekonglomeraat fan Disney yndield by Walt Disney Studios Operations (foarhinne en no noch wol bekend as Disney Studio Services), in ôfdieling fan 'e difyzje Walt Disney Studios dy't oer it behear fan studiokompleksen giet. Behalven de Disney Studios Australia hat dy ôfdieling ek de Walt Disney Studios (Burbank), de Prospect Studios, KABC7 Studio B en de Golden Oak Ranch op 'e noed.

Fasiliteiten

De Disney Studios Australia steane op in perseel mei in oerflak fan 12,8 ha, dat foar it meastepart út backlot bestiet. It studiokompleks omfettet 8 soundstages, mei dêropta fasiliteiten foar preproduksje en postproduksje, kantoarromte, wurkplakken (foar de produksje fan dekôrstikken) en mear as 60 selsstannige bedriuwkes dy't tsjinsten leverje lykas ferhier fan ark en reau en swier materieel, transport, casting, postproduksjetsjinsten en special effects.

Produksjes

Films

In seleksje fan films dy't alteast foar in diel yn 'e Disney Studios Australia opnommen of produsearre binne:

• Babe: Pig in the City (1998)
• The Matrix (1999)
• Star Wars: Episode I – The Phantom Menace (1999)
• Mission: Impossible 2 (2000)
• Moulin Rouge! (2001)
• Star Wars: Episode II – Attack of the Clones (2002)
• The Matrix Reloaded (2003)
• The Matrix: Revolutions (2003)
• Star Wars: Episode III – Revenge of the Sith (2005)
• Son of the Mask (2005)
• Superman Returns (2006)
• Star Wars: The Clone Wars (film) (2008)
• Australia (2008)
• X-Men Origins: Wolverine (2009)

• Happy Feet Two (2011)
• The Great Gatsby (2013)
• The Wolverine (2013)
• Mad Max: Fury Road (2015)
• Gods of Egypt (2016)
• Hacksaw Ridge (2016)
• Alien: Covenant (2017)
• Peter Rabbit (2018)
• Pacific Rim: Uprising (2018)
• The Invisable (2020)
• Peter Rabbit 2: The Runaway (2021)
• Shang-Chi and the Legend of the Ten Rings (2021)
• Thor: Love and Thunder (2022)
• Kingdom of the Planet of the Apes (2024)

Tillefyzje

In seleksje fan tillefyzjesearjes dy't alteast foar in diel yn 'e Disney Studios Australia opnommen of produsearre binne:

• The Simpsons (fan 1998 ôf)
• Australian Idol (2003–2009)
• Star Wars: The Clone Wars (tillefyzjesearje) (2008–2014 & 2020)
• Star Wars: Clone Wars (2003–2005)
• The X Factor (2010–2016)

• The Voice (fan 2012 ôf)
• So You Think You Can Dance Australia (2014)
• Star Wars: Rebels (2014–2018)
• Dancing with the Stars (fan 2019 ôf)
• The Masked Singer (fan 2019 ôf)

Keppelings om utens

• (in) Offisjele webside fan 'e Disney Studios Australia

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.