Korda Filmstúdió

De Korda Filmstúdió of Korda Studio's binne in studiokompleks yn Hongarije, dat 26 km bewesten de haadstêd Boedapest yn it wynboudoarp Etyek stiet. It wurdt dêrom soms ek wol by túltsjes oantsjut as Etyekwood (in ferwizing nei de filmyndustry fan Hollywood). It kompleks waard yn 2007 oprjochte en omfiemet hypermoderne soundstages en oare fasiliteiten. Der binne ferskate grutte Westerske films en tillefyzjesearjes yn 'e Korda Filmstúdió opnommen.

Korda Filmstúdió
De Korda Stúdió (op 'e heuvel yn 'e fierte).
algemien
nasjonaliteit	Hongaarsk
type	privaat
sektor	tillefyzje- en filmyndustry
fêstige yn	Etyek (Hongarije)
oprjochte	2007
offisjele webside
kordastudio.hu
kaart
Lokaasje yn Hongarije.

Skiednis

De Korda Filmstúdió waarden yn 2007 oprjochte. It kompleks waard ferneamd nei de histoaryske Hongaarske (en letter Britske) filmprodusint, regisseur en senarioskriuwer sir Alexander Korda (1893-1956). De blaudrukken foar it studiokompleks waarden ûntwurpen troch Bastien and Associates, Inc., in Amerikaansk arsjitekteburo dat spesjalisearre is yn it ûntwerpen fan soundstages. It ûntwerp waard neitiid oanpast oan 'e Hongaarske boufergunnings en dêrnei útfierd troch Iparterv Épülettervező Zrt. út Boedapest. De bou koste €90 miljoen. It hiele projekt waard finansierd út private ynvestearrings, mei as wichtichste oandielhâlders de Hongaarske sakeman Sándor Demján, de Amerikaanske filmprodusint Andrew G. Vajna, de Kanadeeske ynvestearder Peter Munk en de Britske finansier Nathaniel Philip Rothschild.

Fasiliteiten

It kompleks fan 'e Korda Filmstúdió omfettet 6 hypermoderne soundstages mei in mienskiplik oerflak fan likernôch 14.500 m²:

• Studio 1 – 1.946 m²
• Studio 2 – 1.769 m²
• Studio 3 – 1.769 m²
• Studio 4 –    961 m²
• Studio 5 – 2.205 m²
• Studio 6 – 5.856 m²

Fral Studio 1 en Studio 6 binne bysûnder. Studio 1 beskikt oer in ynterne wettertank fan 10 by 10 m mei in djipte fan 4 m. Studio 6 is net inkeld ien fan 'e grutste soundstages fan 'e wrâld, mar der passe dekôrstikken fan 20 m heech yn. Njonken de soundstages beskikke de Korda Filmstúdió ek oer 2.800 m² kantoarromte en fasiliteiten foar preproduksje en postproduksje en krapoan 7.000 m² oan berchromte en wurkplakken foar de produksje fan dekôrstikken.

Fierders is der in backlot mei in oerflak fan 25 ha. Dêrfan is 10 ha beboud mei trije grutte fêste filmsets: New York, Renêssânse en Midsiuwen. De restearjende 15 ha binne ûnbeboud en beskikber foar it pleatsen fan tydlike filmsets.

• De fêste set fan New York beslacht in hiel stedsblok mei dêrfoarlâns in strjitte fan 120 m lang mei gevels fan fjouwer ferdjippings heech oan beide kanten en sydstrjitten fan 60 m lang oan 'e beide úteinen. De breedte fan 'e befluorre strjitte is 14¹/₂ m, mei oan wjerskanten trottoirs fan nochris 3 oant 4 m breed. Om't de set omjûn wurdt troch lege romte, is it mooglik om him yn alle rjochtings te ferlingjen as dat nedich wêze mocht.
• De fêste set fan 'e Renêssânse waard ûntwurpen troch François Seguin en Jonathan McKinstry foar de dramasearje The Borgias. Hy omfettet gebouwen yn ferskate boustilen út in stikmannich ferskillende kriten fan it Itaalje út 'e Renêssânse, fan it Fatikaan oant Florâns. De set hat in oerflak fan mear as 1 ha, en omfettet behalven gebouwen ek poarten, binnenplakken, pleinen, stegen en ynterieurs.
• De fêste set fan 'e Midsiuwen waard oarspronklik boud foar de minysearje World Without End. Hy beslacht 1,2 ha en leit yn in natuerlik om-en-by, njonken in wâld en in mar. De set stelt in stedsje út 'e trettjinde of fjirtjinde iuw foar, mei ferskate huzen, in fortifisearre stedsmuorre en in sintraal plein mei in pyldergong. De measte huzen hawwe ek ynterieurs.

Produksjes

Films

In seleksje fan films dy't alteast foar in diel yn 'e Korda Filmstúdió opnommen binne:

• Hellboy II: The Golden Army (2008)
• Season of the Witch (2011)
• The Martian (2015)
• Inferno (2016)

Tillefyzje

In seleksje fan tillefyzjesearjes dy't alteast foar in diel yn 'e Korda Filmstúdió opnommen binne:

• The Borgias (2011-2013)
• World Without End (2012)
• Marco Polo (2014-2016)
• The Last Kingdom (2015-2022)
• The Terror (2018-2019)

Keppelings om utens

• (in) Offisjele webside fan 'e Korda Filmstúdió

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side, en ûnder Hivatkozások, op dizze side Commons Wikimedia Commons  Ofbylden dy't by dit ûnderwerp hearre, binne te finen yn de kategory Etyekwood fan Wikimedia Commons.