Barry Atsma

Barry Atsma (Londen, 29 desimber 1972) is in Nederlânsk film- en tillefyzje-akeur, dy't behalven de Nederlânske ek de Britske nasjonaliteit hat. Hy waard bekend troch syn rol as Bob Ensink yn 'e dramasearje Rozengeur & Wodka Lime en wûn yn 2010 sawol in Gouden Keal as in Rembrandt Award foar syn haadrol yn 'e film Komt een Vrouw bij de Dokter. Oare bekende rollen fan sines binne Vincent van Gogh yn Van Gogh: Een Huis voor Vincent, Wigbolt Ripperda yn Kenau, Johan de Witt yn Michiel de Ruyter en Hugo Warmond yn Knel.

Barry Atsma
akteur
persoanlike bysûnderheden
echte namme	Barry Atsma
nasjonaliteit	Nederlânsk Britsk
berne	29 desimber 1972
berteplak	Londen (Ingelân)
etnisiteit	Nederlânsk
jierren aktyf	1993 – no
prizen	Gouden Keal 2010 Rembrandt Award 2010
offisjele webside
www.barryatsma.nl

Libben en karriêre

Jonkheid en oplieding

Atsma waard yn 1972 berne yn 'e Londenske wyk Bromley, dêr't syn âlden doe wennen om't syn heit foar de multinational Unilever wurke. Fanwegen syn berteplak hat Atsma behalven de Nederlânske ek de Britske nasjonaliteit. Om't it gesin omreden fan it wurk fan syn heit gauris ferhúzje moast, brocht Atsma syn jonkheid troch yn ferskate lannen, wêrûnder net allinnich Ingelân en Nederlân, mar ek Grikelân en Brazylje. Nei't er de middelbere skoalle ôfrûne hie, begûn er mei in rjochtestúdzje, mar hy stapte al rillegau oer nei in oplieding oan 'e Hegeskoalle foar de Keunsten Utert, dêr't er yn 1996 ôfstudearre.

Aktearkarriêre

Atsma sette yn 1993 útein mei in wurkpaad as akteur mei in weromkearende rol as Philip Harinxma yn 'e soapsearje Goede Tijden, Slechte Tijden. Fierders spile er ier yn syn karriêre Bob Voskuil jr. yn Bureau Kruislaan en hied er gastrollen yn 'e plysjesearje Baantjer en yn 'e komeedzjesearje Ben Zo Terug. Atsma briek troch mei de rol fan Bob Ensink, dy't er fan 2001 oant en mei 2005 fertolke yn 'e dramasearje Rozengeur & Wodka Lime. Fan 2002 oant 2012 makke er diel út fan 'e Toanielgroep Amsterdam, dêr't er net inkeld foar aktearre, mar ek regisearre.

Op 'e tillefyzje hie Atsma yn 2005-2006 de rol fan Felix Waltz yn 'e dramarige Waltz, oer in sirkusfamylje, en yn 2007-2008 de rol fan Jeffrey Woesthoff yn 'e dramasearje Voetbalvrouwen. Hy spile yn 2006 yn 'e minysearje Fok Jou! en hie yn 2007 weromkearende rollen as de tenniscoach yn acht ôfleverings fan Willemspark en as Stag Hartman yn trije ôfleverings fan Gooische Vrouwen. Yn 'e minysearje De Prins en het Meisje, ek út 2007, fertolke Atsma de rol fan prins Constantijn fan Oranje-Nassau fan Amsberg, en yn 'e minysearje Van Gogh: Een Huis voor Vincent, út 2013, spile er keunstskilder Vincent van Gogh. Fierders wied er te sjen yn û.m. Hart tegen Hard (2011) en Het Sinterklaasjournaal (2016), en yn tillefyzjefilms as HannaHannah (2007), Ooit (2008) en Amsterdam (2009).

Op it wite doek makke Atsma yn 2003 syn debút yn De Passievrucht. Letter spile er û.m. yn films as Ik Omhels Je met 1000 Armen (2006), nei it boek mei deselde namme fan Ronald Giphart, Nachtrit (2006), Morrison Krijgt een Zusje (2008) en De Storm (2009). Foar syn haadrol as Stijn yn Komt een Vrouw bij de Dokter (2009), nei de bestseller mei deselde namme fan Raymond van de Klundert, ûntfong Atsma yn 2010 in Gouden Keal en in Rembrandt Award, beide yn 'e kategory bêste akteur. Neitiid spile er yn films as Loft (2010) en Taped (2012), en hied er de rol fan Dennis yn Mannenharten (2013), wêrmei't er syn twadde Rembrandt Award foar bêste akteur wûn.

Yn 'e histoaryske oarlochsfilm Kenau, út 2014, fertolke Atsma de rol fan Wigbolt Ripperda, de kommandant fan it oranjesinnige garnizoen ûnder it Belis fan Haarlim (1572-1573). Datselde jiers spile er ek de rollen fan Jaap van Hoensbroeck yn 'e film Lucia de B. en fan Michael yn 'e Britsk-Dútsk-Kanadeesk-Súdafrikaanske film Hector and the Search for Happiness. Yn 2015 wie Atsma as de Hollânske riedpinsjonaris Johan de Witt te sjen yn 'e histoaryske spektakelfilm Michiel de Ruyter, oer de santjinde-iuwske Nederlânske seeheld mei dy namme, en teffens spile er dat jier jitris de rol fan Dennis, yn 'e ferfolchfilm Mannenharten 2.

Yn 2016 spile Atsma yn Knielen op een Bed Violen, de ferfilming fan 'e bestseller mei deselde namme fan Jan Siebelink. Yn 2017 hied er in rol yn 'e Amerikaanske aksjekomeedzje The Hitman's Bodyguard. Yn 2018 wied er te sjen yn 'e titelrol as fersetsman Walraven van Hall, yn 'e film Bankier van het Verzet. Njonken syn aktearwurk die Atsma yn 2010 voice-overs as de stjoerderstim fan Net 5, en ek presintearre er de dokumintêrerige Down voor Dummies (2014) oer trije famkes mei it syndroom fan Down. Yn 2017 en 2018 hie Atsma ien fan 'e haadrollen yn 'e dramasearje Klem, as belestingynspekteur Hugo Warmond, in widner mei twa dochters, dy't tsjin wil en tank by de ûnderwrâld belutsen rekket.

Priveelibben

Atsma hie fan 1994 oant 2011 in relaasje mei aktrise Izaira Kersten, mei wa't er twa dochters krige. Neitiid sette er him nei wenjen yn Utert en sûnt novimber 2015 hat er in nije relaasje mei aktrise Noortje Herlaar. Atsma is ambassadeur fan it Diabetes Fûns en it Wilhelmina Bernesikehûs. Ek set er him yn foar bern mei it syndroom fan Down.

Filmografy

Filmografy as akteur
jier	titel	rol of funksje	opmerkings
tillefyzje
1993	Bureau Kruislaan	Bob Voskuil jr.	gastrol; 2 ôfl.
1993	Goede Tijden, Slechte Tijden	Philip Harinxma	weromkearende rol; 4 ôfl.
1999	Baantjer	Jelle van Delft	gastrol; ôfl. De Cock en de Pianomoord
2000	Ben Zo Terug	Rick	gastrol; ôfl. Positief Denken
2001–2005	Rozengeur & Wodka Lime	Bob Ensink	fêste rol; 52 ôfl.
2002	Baantjer	Vincent	gastrol; ôfl. De Cock en de Moord in Club Exotica
2005–2006	Waltz	Felix Waltz	minysearje
2006	Fok Jou!	Frans	minysearje
2006	De Afdeling	Anton	gastrol; ôfl. A Perfect Match
2007	Willemspark	tenniscoach	weromkearende rol; 8 ôfl.
2007	Gooische Vrouwen	Stag Hartman	weromkearende rol; 3 ôfl.
2007	De Prins en het Meisje	Constantijn fan Oranje-Nassau fan Amsberg	minysearje
2007	HannaHannah	Wim	tillefyzjefilm nom. Gouden Keal foar bêste byrol fan in akteur
2007–2008	Voetbalvrouwen	Jeffrey Woesthoff	fêste rol; 16 ôfl.
2008	Ooit	Jos	tillefyzjefilm
2009	Amsterdam	pedofyl	direkt-op-fideo útbrocht
2010	n.f.t.	voice-over	stjoerderstim fan Net5
2011	Het Gordijnpaleis van Ollie Hartmoed	Dimitri	gastrol; ôfl. De Vlinderworp
2011	Hart tegen Hard	Paul Smit	fêste rol; 12 ôfl.
2013	Van Gogh; Een Huis voor Vincent	Vincent van Gogh	minysearje
2014	Down voor Dummies	as presintator	dokudrama oer 3 famkes mei it syndroom fan Down
2014	Penoza	Maik Kneefel	weromkearende rol; 7 ôfl.
2014	Alles muß raus: Eine Familie rechnet ab	Oskar Etsch	minysearje
2014	Göttliche Funken	Jan	tillefyzjefilm
2015	Tatau	Dries	weromkearende rol; 7 ôfl.
2015	Begierde: Mord im Zeichen des Zen	Richard Landen	tillefyzjefilm
2015	Episodes	Arjen van der Linden	weromkearende rol; 2 ôfl.
2016	Sinterklaasjournaal	ûnderwizer	gastrol; ôfl. 16.12
2017	Die letzte Spur	Mark Reeve	tillefyzjefilm
2017–2020	Klem	Hugo Warmond	fêste rol; 30 ôfl.
2018–2019	The Split	Christie Carmichael	fêste rol; 17 ôfl.
2018–2020	Bad Banks	Gabriel Fenger	Dútsk-Lúksemboarchske searje
2019	Tatort	Maarten Jansen	gastrol; ôfl. Das Monster von Kassel
2020	Lieve Mama	Lex van der Ven	minysearje
2021	Du sollst nicht lügen	Hendrik Voss	minysearje
2021	Make Up Your Mind	Bobbi Bambam	dragshow
2021	Blackout	Axel Kjær	minysearje
2022	The Serpent Queen	Oane fan Montmorency	fêste rôl; 8 ôfl.
films
2002	Rita Koeling	Freddy	koarte film
2003	De Passievrucht	skilder
2004	Bos is Back	Triple W
2004	Le Ciambelle	gasthear	koarte film
2005	Lepel	Max
2006	Ik Omhels Je met 1000 Armen	barkeeper
2006	Nachtrit	resjersjeur Nijdam
2007	Hotel Paradijs	Christiaan	koarte film
2008	Morrison Krijgt een Zusje	Steven
2009	De Storm	Aldo Hendriks	nom. Rembrandt Award foar bêste Nederlânske akteur
2009	Nagelaten	Erik
2009	Komt een Vrouw bij de Dokter	Stijn	Gouden Keal foar bêste akteur Rembrandt Award foar bêste Nederlânske akteur
2009	Remains	Erik	koarte film
2010	Zwart Water	Paul
2010	Loft	Matthias Stevens	nom. Rembrandt Award foar bêste Nederlânske akteur
2012	Taped	Johan
2012	Quiz	Leo
2013	Mannenharten	Dennis	Rembrandt Award foar bêste Nederlânske akteur
2014	Kenau	Wigbolt Ripperda
2014	Lucia de B.	Jaap van Hoensbroeck
2014	In Jouw Naam	Ton
2014	Hector and the Search for Happiness	Michael
2015	Michiel de Ruyter	Johan de Witt
2015	Mannenharten 2	Dennis
2016	Knielen op een Bed Violen	Hans
2016	Siv Sover Vilse	Bastiaan
2017	HHhH	Karl Hermann Frank	ek bekend as The Man with the Iron Heart
2017	The Hitman's Bodyguard	oanklager fan it ICC Moreno
2018	Bankier van het Verzet	Walraven van Hall
2020	Engel	heit Engel
2021	The Hitman's Wife's Bodyguard	oanklager fan it ICC Moreno
2023	Klem	Hugo Warmond

Keppelings om utens

• (in) Offisjele webside fan Barry Atsma
• (in) Folsleine filmografy fan Barry Atsma yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Barry Atsma fan Wikimedia Commons.