Panhandle

In panhandle, letterlik: "panhânsel", is in ynformele Amerikaansk-Ingelske term foar in skerp útstykjend geografysk part fan in Amerikaanske steat. De oantsjutting is ûntliend oan in stâlpanne of in stropanne, dy't beide lange, fansiden útstykjende hânsels hawwe.

De tsien panhandles oanjûn op in kaart fan 'e Feriene Steaten.

Amerikaanske panhandles

De Feriene Steaten telle tsien gebieten dy't wol omskreaun wurde as panhandles:

gebiet	omskriuwing	oerflak	ynwenners	grutste stêd
de Panhandle fan Alaska	it útstykjende súdeastlike diel fan 'e steat Alaska	91.010 km²	72.000	Juneau
de Panhandle fan Floarida	it útstykjende noardwestlike diel fan 'e steat Floarida	29.275 km²	1.400.000	Tallahassee
de Panhandle fan Idaho	it útstykjende noardlike diel fan 'e steat Idaho	54.419 km²	318.000	Coeur d'Alene
de Panhandle fan Konettikut	it (tige lytse) útstykjende súdeastlike diel fan 'e steat Konettikut	249 km²	224.000	Stamford
de Panhandle fan Marylân	it útstykjende westlike diel fan 'e steat Marylân	5.682 km²	493.000	Frederick
de Panhandle fan Nebraska	it útstykjende noardwestlike diel fan 'e steat Nebraska	36.925 km²	88.000	Scotsbluff
de Panhandle fan Oklahoma	it útstykjende noardwestlike diel fan 'e steat Oklahoma	14.728 km²	29.000	Guymon
de Panhandle fan Teksas	it útstykjende noardlike diel fan 'e steat Teksas	66.884 km²	428.000	Amarillo
de Eastlike Panhandle fan West-Firginia	it útstykjende eastlike diel fan 'e steat West-Firginia	9.062 km²	261.000	Martinsburg
de Noardlike Panhandle fan West-Firginia	it útstykjende noardlike diel fan 'e steat West-Firginia	1.556 km²	132.000	Wheeling

Dêrby moat oantekene wurde dat de Panhandle fan Alaska ornaris bekend stiet as Súdeast-Alaska en dy fan Marylân as West-Marylân. Hoewol't ek de steat Utah yn it noardwesten in útstykjend diel hat, wurdt dat frjemd genôch nea in panhandle neamd.

Oar gebrûk fan 'e term

It gebrûk fan 'e term panhandle is yn 'e regel beheind ta de Feriene Steaten. Soms wurdt yn Amerikaanske literatuer in útstykjend diel fan in oar lân of subnasjonaal gebiet foar in panhandle oanmurken, lykas it noardlike diel fan it Kanadeeske Yukon-territoarium, it westlike part fan Eastenryk (besteande út Foararlberch, Tiroal en Saltsburch) of de Kaprivy-stripe fan Namybje. As men nei de kaart fan Fryslân sjocht, dan soe bygelyks it âlde Skoatterlânske diel fan 'e gemeente It Hearrenfean (mei plakken as Nijhoarne en Jobbegea) foar in panhandle oanmurken wurde kinne. In skiereilân, dat op deselde manear útstykje kin, wurdt lykwols nea as panhandle oantsjutten; it gebrûk fan 'e term is beheind ta gebieten dy't (fierhinne) omjûn wurde troch lân.

Bootheels

In útstykjend diel fan in Amerikaanske steat dat minder breder is as dat it lang is, wurdt yn 'e regel net in panhandle, mar in bootheel ("learshakke") neamd. Foarbylden fan sokke kriten binne de Hakke fan Missoery, yn súdeastlik Missoery; de Hakke fan Alabama, yn súdwestlik Alabama; de Hakke fan Mississippy, yn súdeastlik Mississippy; en de Hakke fan Nij-Meksiko, yn súdwestlik Nij-Meksiko.

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.