The Karate Kid (film út 2010)

The Karated Kid is in Amerikaansk-Sineesk-Hongkongsk sportdrama út 2010 ûnder rezjy fan Harald Zwart, mei yn 'e haadrollen Jaden Smith en Jackie Chan. De titel betsjut "De Karatejonge", hoewol't de film eins net oer karate giet, mar oer kung fu. De eins dus mispleatste titel wurdt ferklearre út it feit dat it om in remake giet fan 'e klassike sportdramafilm The Karate Kid, út 1984. It ferhaal folget de jonge Dre Parker, dy't mei syn mem Sherry nei Sina emigrearret, dêr't er yn konflikt rekket mei in stikmannich Sineeske leeftydsgenoaten dy't him narje en kung fu brûke om him te mishanneljen. Dre kriget help fan 'e konsjerzje fan it appartemintekompleks dêr't hy en syn mem wenje, menear Han. Dy traint him foar in kung fu-toernoai, sadat er yn in behearske sitewaasje mei syn narders ôfweve kin. The Karate Kid krige oer it algemien positive resinsjes fan 'e filmkritisy en wie in grut kommersjeel súkses yn 'e bioskopen.

The Karate Kid
film
(Filmposter yn 'e Ingelske Wikipedy)
makkers
regisseur	Harald Zwart
produsint	Jerry Weintraub Will Smith Jada Pinkett Smith James Lassiter Ken Stovitz
senario	Christopher Murphey
basearre op	The Karate Kid (film út 1984)
kamerarezjy	Roger Pratt
muzyk	James Horner
filmstudio	Columbia Pictures Overbrook Entertainment Jerry Weintraub Productions China Film Group Corporation
distribúsje	Sony Pictures Releasing (ynternasj.) EDKO (Sina en Hongkong)
spilers
haadrollen	Jaden Smith Jackie Chan
byrollen	Han Wenwen Wang Zhenwei Taraji P. Henson Yu Ronguang
skaaimerken
lân/lannen	Feriene Steaten Sina Hongkong
premiêre	11 juny 2010
foarm	langspylfilm
sjenre	sportdrama
taal	meast Ingelsk, ek Mandarynsk
spyltiid	140 minuten
budget en resultaten
budget	$40 miljoen
opbringst	$358,7 miljoen

Plot

De tolvejierrige Dre Parker en syn mem Sherry, in widdo, emigrearje út Detroit, yn 'e Feriene Steaten, nei Peking, yn Sina, dêr't Sherry hinne oerpleatst is troch it autofabryk wêrby't se wurket. Deselde middeis dat se arrivearje, giet Dre mei Harry, in oare Westerske jonge dy't yn itselde appartemintekompleks wennet, nei in park fuortby it flatgebou om basketbal te spyljen. Dre rekket dêr ûnder de tsjoen fan 'e fioeliste Meiying, in famke fan syn jierren dat ek belangstelling foar him hat. Cheng, in fjirtjinjierrige jonge waans famylje tige goed befreone is Meiying harres, nimt dêr oanstjit oan en wiist Meiying te plak. As Dre foar har opkomt, eskalearret de konfrontaasje binnen de koartste kearen ta slaanderij, wêrby't Cheng gebrûk makket fan syn kennis fan 'e fjochtsport kung fu om Dre in wan bruien te jaan.

De oare deis giet Dre foar it earst nei skoalle en ûntdekt er dat sawol Meiying as Cheng en syn maten op deselde skoalle sitte. Om't Meiying de iennichste is dy't er dêr ken, siket er har selskip op, wat ta nei represailles fan Cheng-en-dy liedt. Hja begjinne in ûnmeilydsume kampanje fan narjen tsjin Dre, oant dy it foar de moade kriget om him foar harren te ferskûljen. Nei in ekskurzje nei de Ferbeane Stêd treft Dre Cheng-en-dy yn in strjitte dêr't er lâns moat om thús te kommen. Wylst er efter in rige parkearre auto's lâns slûpt om ûnsjoen foarby te kommen, sjocht er in amer mei smoarch wetter stean dat fan 'e dakken rûn is. Gebrûk meitsjend fan in passearjende auto komt er Cheng en syn maten oer it mad en smyt er de amer wetter oer harren hinne om dêrnei hurd út te naaien.

Cheng-en-dy komme efter him oan en nei in lange efterfolging troch Peking komt Dre fuortby syn appartemintekompleks fêst te sitten yn in dearinnende strjitte. Dêr begjinne Cheng en de oaren him yninoar te slaan sa't er noch nea yninoar slein is, oant se tsjinholden wurde troch de konsjerzje fan it flatgebou, menear Han. Cheng-en-dy geane de man te liif, mar Han blykt in kung fu-master te wêzen, dy't harren agresje tsjin harsels brûkt en harren inoar yninoar slaan lit. Nei't de jonges úteinlik slûksturtsjend de ôftocht blaasd hawwe, behannelet menear Han de ferwûnings dy't Dre oprûn hat mei de âlde Sineeske genêswize fan fjoerkopjen. Hy fertelt Dre dat Cheng-en-dy yn 'e grûn gjin ferkearde jonges binne, mar dat se ferkearde dingen leard hawwe. Der besteane nammentlik gjin minne learlingen, allinne mar minne learmasters.

Tink derom: Yn de tekst hjirûnder wurdt de ôfrin fan de film beskreaun. As jo de film sels sjen wolle, is it mooglik better dat jo it no folgjende diel fan 'e plotbeskriuwing (earst noch) net lêze.

Dre freget menear Han om mei te gean nei master Li, de kung fu-master fan Cheng en syn maten, om dyselde te fregen om it near op it narjen te lizzen. Han fielt der earst net folle foar om him fierder mei de saak te bemuoien, mar jout úteinlik ta. Li wol lykwols neat witte fan it fredesoanbod; ynstee stelt er foar dat de jonges it hjir en no útfjochtsje yn syn dojo. Han docht in tsjinfoarstel: Dre sil meidwaan oan in oankommend kung fu-toernoai, wêrfan't Li in poster oan 't lewant hingjen hat. As er dêr Cheng en de oaren ferslacht, hâldt it narjen op, mar ek oan it toernoai ta, sil der net mear narre wurde. Li stimt dêrmei yn, mar heakket der de warskôging oan ta dat er syn learlingen net inkeld efter Dre, mar ek efter Han oan stjoere sil as Dre net opdaagjen komt op it toernoai.

Hoewol't it him net oanlokket, nimt menear Han neitiid syn ferantwurdlikheid troch ta te sizzen en lear Dre kung fu. De training begjint, ta Dre syn teloarstelling, mei it ophingjen fan syn jas, om dy dêrnei wer fan 'e kapstôk ôf te heljen, oan te dwaan, út te dwaan, oer de grûn te smiten, op te pakken en oan 'e kapstôk te hingjen, ensfh., oeren lang oant ferfelens ta. Troch eltse dei oeren efterinoar dyselde bewegings te meitsjen, traint Dre sûnder erch syn spierûnthâld foar de basisbewegings fan kung fu. Letter nimt Han Dre mei yn 'e trein nei in taoïstyske timpel yn it Wudangberchtme, dêr't er him boarnewetter drinke lit út in hillige welle op in berchtop. Yn 'e timpel sjocht Han in kung fu-masteresse dy't mei in kobra 'dûnset', troch sekuer de bewegings fan it bist nei te bearen. As er dêr wat oer seit tsjin menear Han, leit dy him lykwols út dat er net goed sjoen hat: de frou beart de kobra net nei, mar de kobra de frou. Dat berikt se troch folslein stil te wêzen, sadat it bist har as in spegel sjocht.

Nei wiken fan training, dy't no ek krêfttraining, skoppen en ôfwarren omfiemet, jout menear Han Dre in dei frij. Dre brûkt de ûnferwachtse frije tiid troch Meiying op te sykjen, mei wa't er wilens min ofte mear ferkearing krigen hat. Hoewol't se eins oefenje moat mei de fioele, mei't se de oare deis audysje dwaan moat foar it konservatoarium, bepraat Dre har om ynstee mei him te skoaltsjeskûljen. Se geane de stêd yn en hawwe in protte wille, oant Meying har heit har opskillet op har mobile tillefoan mei it boadskip dat har audysje ferset is nei hjoed en de fraach wêr't se yn 'e frede úthinget. Meiying wurdt troch har heit en mem mei de auto ophelle en mei tûzen hasten nei skoalle riden foar de audysje. Dre draaft de hiele stêd troch en arrivearret noch op 'e tiid om it lêste stikje fan har audysje by te wenjen. Neitiid twinge Meying har âlden har om tsjin Dre te sizzen dat se net mear mei-inoar omgean kinne om't hy in minne ynfloed op har is.

Alhiel ferbûke giet Dre op hûs oan, dêr't er leven út it appartemint fan menear Han kommen heart. As er sjocht wat der te rêden is, blykt dat Han de auto, dy't er mei safolle muoite krekt sa moai opknapt hie, hielendal oan grôt slacht. De dronken Han leit de feralterearre jonge út dat it deselde auto is dêr't syn frou en tsienjierrige soan in tal jierren lyn yn ferûngelokke binne. Elts jier knapt er de auto hielendal op, om him dan op 'e dei fan it ûngemak wer folslein te ferrinnewearjen. Dat is Han syn manear om mei it ferlies fan wiif en bern om te gean. De ôfwizing troch Meiying en de hertferskuorrende oanblik fan 'e dronken Han ynspirearje Dre om noch hurder te trainen as er al die. Inkele wiken letter freget er Han om help by it skriuwen en opsizzen fan in ûntskuldiging yn it Mandarynsk, dêr't er mei nei Meiying har hûs giet om har heit ta te sprekken. Dyselde wurdearret de skuldbewustens fan Dre en syn besykjen om it goed te meitsjen. Hy ûnthjit dat Meiying op it kung fu-toernoai oanwêzich wêze sil om Dre oan te moedigjen.

Op it kung fu-toernoai sit Dre syn mem sadwaande mei Meiying en har heit yn it publyk. Dre, dy't it oan selsfertrouwen ûntbrekt, hat der yn 't earstoan klauwen oan om syn tsjinstanners te belykjen. Nei't er syn earste oerwinning behelle hat, giet it lykwols better en begjint er him in paad nei de finale te klearjen. Cheng docht itselde, mar op in folle gewelddiediger manear. Nei't Dre ferskate learlingen fan master Li ferslein hat, jout Li opdracht oan Liang, dy't yn 'e heale finale tsjin Dre útkomt, om Dre te ferwûnjen. Mei tsjinnichheid docht Liang wat him sein is en bringt Dre in rige hurde slaggen op itselde plak op syn skonk ta. Dat resultearret yn 'e diskwalifikaasje fan Liang, wylst Dre nei de klaaikeamers ôffierd wurdt om ûndersocht te wurden troch in dokter. Dy stelt fêst dat de ferwûning sa slim is dat er him earfol út it toernoai weromlûke kin. Mei't Cheng, dy't de oare heale finale wûn hat, dan automatysk kampioen wurde soe, is Dre noch net ree om op te jaan. Hy bepraat menear Han om troch fjoerkopjen syn skonk safierhinne te genêzen dat er fierder kin.

De finale skuort hinne en wer wylst noris Cheng en dan wer Dre de oerhân hat. By in time-out oarderet master Li Cheng om Dre syn skonk te brekken. Dêrop skopt Cheng Dre nochris op itselde plak dêr't Liang him al gnjirde hie. Dre klaut lykwols wer oerein. Op dat stuit hawwe beide dielnimmers twa punten en binne sadwaande noch mar in punt fan 'e oerwinning ôf. Dre besiket de technyk fan 'e frou mei de kobra nei te bearen, dy't er by it besyk oan 'e timpel sjoen hat, troch folslein stil te wêzen. Cheng rekket yn betizing om er net begrypt wat Dre docht, mar hy nimt in oanrin om Dre út te skeakeljen. Dre docht in salto en skopt, wylst er ûnderstboppest hinget, Cheng tsjin 'e holle oan. Cheng knoffelet del en Dre behellet it winnende punt. Dêrmei hat er net inkeld it toernoai wûn, mar ek it respekt fan Cheng en syn maten. Cheng freget de skiedsrjochter oft hy Dre de trofee útrikke mei, wat tastien wurdt. Neitiid bûge Cheng-en-dy foar menear Han, wêrmei't se him, ta konsternaasje fan master Li, as harren nije learaar oannimme. Dre en menear Han ferlitte tegearre de seal.

Jaden Smith.

Jackie Chan.

Han Wenwen.

Rolferdieling

haadrollen

personaazje	akteur/aktrise
Dre Parker	Jaden Smith
menear Han	Jackie Chan

byrollen

personaazje	akteur/aktrise
Meiying	Han Wenwen
Cheng	Wang Zhenwei
Sherry Parker	Taraji P. Henson
master Li	Yu Rongguang
Harry	Luke Carberry
Liang	Lü Shijia
direktrise Po	Wang Ji
Meiying har heit	Wu Zhensu
Meiying har mem	Wang Zhiheng
Zhuang	Zhao Yi
Song	Zhang Bo

Produksje en distribúsje

Produksje

The Karate Kid waard regissearre troch Harald Zwart nei in senario fan Christopher Murphey. Dat wie basearre op it skript fan Robert Mark Kamen foar The Karate Kid út 1984. De nije ferfilming wie in tige sekuere remake fan 'e oarspronklike film, mei as wichtichste ferskillen de leeftyd fan 'e haadpersoanen (hjir 12 jier, yn 'e oarspronklike film 17 jier); it feit dat it ferhaal yn Sina spilet ynstee fan yn Kalifornje; en it feit dat it oer de Sineeske fjochtsport kung fu giet ynstee fan oer de Japanske fjochtsport karate. De film waard ta in stjerrefehikel makke foar Jaden Smith, de soan fan it akteurspear Will Smith en Jada Pinkett Smith.

As produsinten wiene Jerry Weintraub, Will Smith, Jada Pinkett Smith, James Lassiter en Ken Stovitz by it projekt belutsen foar de filmstudio's Columbia Pictures, Overbrook Entertainment, Jerry Weintraub Productions en de Sineeske China Film Group Corporation. De film wie dêrmei in Amerikaansk-Sineesk-Hongkongske ko-produksje. Foar The Karate Kid wie in budget beskikber fan $40 miljoen. De kamerarezjy wie yn 'e hannen fan Roger Pratt, en de filmmuzyk waard fersoarge troch James Horner (as ferfanger foar de ûntsleine Iislânske komponist Atli Örvarsson).

Opnamen

De opnamen foar The Karate Kid setten yn july 2009 útein en duorren oant en mei 6 oktober fan dat jier. Der waard filme op lokaasje yn Peking (û.m. yn 'e Ferbeane Stêd), en fierders yn it Wudangberchtme en by de Sineeske Muorre. De begjinsêne waard opnommen yn Detroit.

Distribúsje

De distribúsje fan The Karate Kid waard yn 'e measte lannen en territoaria fersoarge troch Sony Pictures Releasing, de distribúsjepoat fan Sony Pictures, dat de memme-ûndernimming fan Columbia Pictures is. Yn Sina en Hongkong waard de film distribuëarre troch EDKO. De film gie op 26 maaie 2010 yn Chicago yn premiêre, en iepene dêrnei op 11 juny yn 'e Amerikaanske bioskopen. The Karate Kid waard op 5 oktober 2010 útbrocht dvd en blu-ray.

De distributeurs holden foar de Westerske wrâld de titel The Karate Kid oan, fanwegen de bekendheid dêrfan, ek al giet dizze film oer kung fu ynstee fan karate. Neffens haadrolspiler Jackie Chan tsjutten de leden fan 'e cast de film ûnder de opnamen dêrom oan as The Kung Fu Kid. Yn Sina en Hongkong kaam de film offisjeel The Kung Fu Dream (功夫梦) te hjitten, wylst er yn Japan en Súd-Koreä Best Kid hjit (Japansk: ベスト・キッド; Koreaansk: 베스트 키드), sa't de oarspronklike Karate Kid-film dêr ek hiet.

Untfangst

Fan 'e filmkritisy krige The Karate Kid oer it algemien positive resinsjes. Sa joech Roger Ebert fan 'e Chicago Sun-Times de film 3¹/₂ fan 4 stjerren en neamde it "in prachtich en knaphandich makke ferhaal dat op eigen fuotten stean kin." Claudia Puig fan 'e krante USA Today en Owen Gleiberman fan it tydskrift Entertainment Weekly parten de film allebeide in 8 ta op in skaal fan 1 oant 10. Simon Abrams joech The Karate Kid yn Slant Magazine lykwols mar 1¹/₂ fan 4 stjerren. Hy skreau: "De personaazjes binne gewoan net âld genôch om oertsjûgjend oer te kommen yn harren troch hormoanen oandreaune ferlet om harsels te bewizen".

Op 'e webside Rotten Tomatoes, dy't resinsjes sammelet, hat The Karate Kid in goedkarringspersintaazje fan 66%, basearre op 210 ûnderskate resinsjes. De konsensuskrityk fan 'e webside, gearstald út al dy resinsjes, stelt: "Mooglik dat er net likefolle ynhouten hat as de edysje út 1984, mar The Karate Kid út 2010 leveret in ferrassend befredigjende update fan it orizjineel." Op Metacritic, de wichtichste konkurrint fan Rotten Tomatoes, behellet The Karate Kid in goedkarringspersintaazje fan 61%, basearre op 37 resinsjes.

Resultaat

Opbringst

The Karate Kid brocht yn 'e bioskopen yn 'e Feriene Steaten en Kanada $176,7 miljoen op, en yn alle oare lannen en territoaria $182,0 miljoen. Wrâldwiid kaam de opbringst dêrmei út op $358,7 miljoen. Ofset tsjin it budget fan $40 miljoen betsjut dat in winst fan $318,7 miljoen, hoewol't dêr de (grif mânske) marketingkosten noch wol ôf moatte.

Prizen

The Karate Kid wûn yn 2011 in Young Artist Award (Jaden Smith foar bêste jonge akteur yn in haadrol), in People's Choice Award (Jackie Chan foar favorite aksjestjer) en twa Kids' Choice Awards (favorite film en Jackie Chan foar favorite regaadmakker). De film waard ek noch nominearre foar twa oare People's Choice Awards, in Teen Choice Award, in MTV Movie Award en in trêde Kids' Choice Award.

Ferfolchfilm

Koart nei't The Karate Kid útkommen wie, waard bekendmakke dat der in ferfolchfilm yn produksje nommen wie. Dêryn soene Jackie Chan, Jaden Smith en Taraji P. Henson yn deselde rollen weromkeare. It projekt kaam lykwols fêst te sitten yn 'e preproduksjefaze. Yn oktober 2017 sei Chan dat de reden dêrfoar wie dat it senario net goed genôch wie. Anno 2022 is de ferfolchfilm noch altyd net makke.

Keppelings om utens

• (in) Offisjele webside fan The Karate Kid
• (in) Ynformaasje oer The Karate Kid yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.