Nasjonaal Faunareservaat Seedskadee
It Nasjonaal Faunareservaat Seedskadee (útspr.: [siːʣkəˈdiː], likernôch: "siidz-kuh-dii"; Ingelsk: Seedskadee National Wildlife Refuge) is in beskerme natoergebiet yn it súdwesten fan 'e Amerikaanske steat Wyoming mei de status fan in nasjonaal faunareservaat. It leit krapoan 10 km bewesten de stêd Green River. Seedskadee komt fan it Sjosjoanske wurd sisk-a-dee-agie, dat "rivier fan 'e prêrjehin" betsjut. It natoergebiet, dat oprjochte waard yn 1965, hat in oerflak 106 km² en stiet ûnder it behear fan 'e United States Fish and Wildlife Service.
| Nasjonaal Faunareservaat Seedskadee Seedskadee National Wildlife Refuge | ||
| ||
| lokaasje | ||
| lân |  Feriene Steaten
| |
| steat |  Wyoming
| |
| county |  Sweetwater County
| |
| neiste plak | Green River (Wyoming) | |
| koördinaten | 41°51′25″ N 109°50′14″ W | |
| oare ynformaasje | ||
| status | nasjonaal faunareservaat | |
| oerflak | 106 km² | |
| stifting | 1965 | |
| behear | U.S. Fish and Wildlife Service | |
| webside | https://www.fws.gov/refuge/seedskadee | |
| kaart | ||
  Lokaasje yn 'e legere 48 steaten.
| ||
Skiednis bewurkje seksje
De krite dy't no it Nasjonaal Faunareservaat Seedskadee is, waard sûnt likernôch 1300 bewenne troch de Sjosjoanen, in Yndiaansk folk fan 'e Platokultuer fan Noard-Amearika. It gebiet waard yn 1811 foar it earst oandien troch blanke ûntdekkingsreizgers en letter wie it in krúspunt fan it Oregon Trail, dat hûnderttûzenen kolonisten út it easten fan 'e Feriene Steaten wei nei it Wylde Westen folgen, en it Mormon Trail, dat troch de mormoanen folge waard nei Utah. Hjir en dêr kinne yn Seedskadee noch altyd wrakken fan kapweinen oantroffen wurde dy't troch de kolonisten efterlitten binne.
Op 1 jannewaris 1965 krige Seedskadee de status fan nasjonaal faunareservaat. It beslút dêrta waard nommen om it ferlies oan habitat foar de pleatslike floara en fauna goed te meitsjen dy't it gefolch wie fan 'e oanlis fan twa keardammen yn 'e Griene Rivier. Dêrby gie it om 'e Fontenelledaam streamop en de Flaming Gorgedaam streamôf fan Seedskadee.
Beskriuwing bewurkje seksje
It Nasjonaal Faunareservaat Seedskadee hat in oerflak fan 106 km² en omfettet in lingte fan 56 km fan 'e Griene Rivier. De rivier is in wetterboarne foar pompelieren en strewelleguod yn in fierders drûge, woastinige krite. Yn 'e rivier libje fisken lykas de readkielforel (Oncorhynchus clarkii), de (gewoane) forel (Salmo trutta) en de reinbôgeforel (Oncorhynchus mykiss).
Der komme 220 soarten fûgels foar yn Seedskadee, wêrûnder trekfûgels dy't it natoergebiet as tuskenstop brûke tusken harren briedgebiet yn it hege noarden en harren oerwinteringsgebieten yn it suden. Oare trekfûgels keare elts jier werom nei Seedskadee om dêre te brieden. Foarbylden fan fûgels dy't yn it natoergebiet foarkomme, binne de trompetswan (Cygnus buccinator), de Amerikaanske see-earn (Haliaeetus leucocephalus), de waaierhin (Centrocercus urophasianus), de stikelsturthin (Tympanuchus phasianellus), de spjirresopspjocht (Sphyrapicus thyroideus) en gâns ûnderskate soarten einen.
Yn Seedskadee libje ek in protte soarten sûchdieren, wêrûnder de prêrjewolf (Canis latrans), de reade lynks (Lynx rufus), de Kanadeeske lynks (Lynx canadensis), de Amerikaanske harmeling (Mustela richardsonii), de Amerikaanske nerts (Neogale vison), de gaffelantilope (Antilocapra americana), de wapity (Cervus canadensis), it mûldierhart (Odocoileus hemionus), de eland (Alces alces), de Kanadeeske bever (Castor canadensis), de oerzon (Erethizon dorsatum), de muskusrôt, (Ondatra zibethicus), de prêrjehazze (Lepus townsendii), de wytsturtprêrjehûn (Cynomys leucurus), it goudmantelgrûniikhoarntsje (Spermophilus lateralis), it lytse wangpûdiikhoarntsje (Tamias minimus) en de langsturtwrotmûs (Microtus longicaudis).
Keppelings om utens bewurkje seksje
| Boarnen, noaten en/as referinsjes: | ||
|
Foar boarnen en oare literatuer, sjoch ûnder: References, op dizze side.
|
