Rebecca Romijn

Rebecca Romijn (folút: Rebecca Alie Romijn; Berkeley (Kalifornje), 6 novimber 1972) is in Amerikaansk model en aktrise dy't fierhinne fan etnysk Nederlânsk komôf is. Se is it bekendst wurden as mannekên foar it linzjerymerk Victoria's Secret, as glamourmodel foar it tydskrift Sports Illustrated en as aktrise yn 'e rol fan Mystique yn 'e X-Men-superheldefilms. Fierders wie Romijn û.m. te sjen yn tillefyzjesearjes as Ugly Betty, King & Maxwell en The Librarians. Under har houlik mei akteur John Stamos stie hja bekend as Rebecca Romijn-Stamos.

Rebecca Romijn
Filmklapper.png akteur
Rebecca Romijn yn 2019.
Rebecca Romijn yn 2019.
persoanlike bysûnderheden
echte namme Rebecca Alie Romijn
nasjonaliteit Flag of the United States.svg Amerikaansk
berne 6 novimber 1972
berteplak Berkeley (Kalifornje)
etnisiteit Flag of the Netherlands.svg Nederlânsk
Flag of England.svg Ingelsk
jierren aktyf 19912001 & 2012 (model)
1997 – no (aktrise)
prizen Saturn Award 2000
offisjele webside
Rebecca Romijn op Twitter

Libben en karriêreBewurkje

Jonkheid en opliedingBewurkje

Romijn waard yn 1972 berne yn Berkeley, yn 'e Amerikaanske steat Kalifornje. Har heit, Jaap Romijn, is in meubelmakker dy't oarspronklik út it Nederlânske Barneveld komt. Har mem, Elizabeth Kuizenga, is in Amerikaansk dosinte Ingelsk as twadde taal en skriuwster fan skoalboeken, dy't fan mingd Nederlânsk en Ingelsk komôf is. Romijn har âlden kamen mei inoar yn 'e kunde doe't har mem as studinte meidie oan in útwikselingsprogramma, en in jier yn Nederlân trochbrocht. Romijn har pake oan memmekant is Henry Bernard Kuizenga, in presbyteriaansk predikant en heechlearaar teology.

Yn fraachpetearen hat Romijn oanjûn dat se as bern tige ûnwis fan harsels wie, en op 'e middelbere skoalle oant kop en earen behelle wie yn 'e toanielklub, mei as gefolch dat se beslist net by de 'populêre' learlingen hearde. Boppedat makke se yn dy tiid in groeispurt troch dy't har skolioaze (in ferkromming fan 'e rêchbonke) besoarge, sadat se allegeduerigen pine hie. Neffens in protte boarnen stie Romijn fanwegen har lingte (1.80 m) op skoalle bekend as de 'Fleurige Blonde Reus' (Jolly Blonde Giant), mar se hat opbychte dat se dat ferhaal by wize fan grap sels yn omrin brocht hat. Doe't se yn 1990 en 1991 muzyk studearre oan 'e Universiteit fan Kalifornje, Santa Cruz, krige se in bybaantsje as mannekên, dat útgroeide ta in karriêre. Fan gefolgen briek se úteinlik har stúdzje ôf, wêrnei't se goed twa jier yn Parys wenne.

 
Rebecca Romijn yn 2009.

KarriêreBewurkje

Romijn sette yn 1991 útein mei har karriêre as model. As mannekên liet se klean en linzjery sjen fan Anna Molinari, Giorgio Armani en Victoria's Secret, yn moadeshows dêr't ek ferneamde modellen as Claudia Schiffer, Kate Moss, Naomi Campbell en Cindy Crawford yn meirûnen. Teffens wurke Romijn mei oan reklamekampanjes fan û.o. Victoria's Secret, bebe en Miller Lite-bier. Fierders posearre se ferskate kearen as bikinymodel foar de jierlikse baaikleanedysje fan it ferneamde Amerikaanske sporttydskrift Sports Illustrated. Romijn stie jierrenlang boppe-yn 'e listen fan meast seksy froulju fan 'e wrâld, bgl. fan 2000 oant 2005 yn dy fan FHM, en fan 2003 oant 2007 yn dy fan Maxim. Fan 1998 oant 2000 presintearre se it tillefyzjeprogramma House of Style.

Yn 2000 hie Romijn har earste grutte rol as aktrise as Mystique yn 'e superheldefilm X-Men. Hja kearde yn 2003 en 2006 yn dyselde rol werom yn 'e ferfolgen X2: X-Men United en X-Men: The Last Stand. Yn 'e fjirde X-Men-film, X-Men: First Class (2011), hie se net mear as in cameoroltsje. As Mystique bestie har kostúm út blauwe make-up dy't op har fierders neakene lichem plamuerd waard, mei op strategyske plakken wat stikken útris. Foar har rol yn 'e earste X-Men-film wûn Romijn in Saturn Award yn 'e kategory bêste froulike byrol. Yn 2002 hie se har earste haadrol yn 'e film Femme Fatale, fan regisseur Brian De Palma. Oare films dêr't se yn meispile, wiene Rollerball (2002), The Punisher (2004), Godsend (2004), The Alibi (2006), The Con Artist (2010), Larry Gaye: Renegade Male Flight Attendant (2015) en Endangered Species (2021).

 
Rebecca Romijn yn 2012 as mannekên yn in moadeshow.

Har earste tillefyzjerol hie Romijn yn 1997, yn in ôflevering fan 'e komeedzjesearje Friends. Yn 1999 en 2000 hie se in weromkearende rol yn acht ôfleverings fan 'e komeedzjesearje Just Shoot Me!, en yn 2006 fertolke se de titelrol yn 'e trettjin ôfleverings fan 'e rige Pepper Dennis. Fan 2006 oant 2008 spile Romijn it personaazje fan 'e transseksuele Alexis Meade yn 'e soapsearje Ugly Betty. Foar dy rol waard se mei de rest fan 'e cast nominearre foar in Screen Actors Guild Award. Neitiid spile se fan 2009 oant 2010 de rol fan Roxanne Torcoletti yn 'e rige Eastwick, yn 2011 en 2012 spile se Jessie Nichols yn 'e satiryske plysjesearje NTSF:SD:SUV::, en yn 2013 wie se de tsjinspylster fan John Tenney yn 'e detektivesearje King & Maxwell, wêryn't se Michelle Maxwell spile, in earder lid fan 'e Secret Service dy't no as privee-detektive wurket.

Yn 2014 en 2015 spile Romijn de rol fan Eva Baird yn 'e rige The Librarians. Dêrfoar waard se twaris nominearre foar de Saturn Award foar bêste aktrise. Se wie fan 2014 oant 2016 ek presintatrise fan it realitytillefyzjeprogramma Skin Wars. Fan 2018 ôf wie Romijn as stimaktrise belutsen by it DC Animated Movie Universe. Yn dy filmsearje liende se har stim oan Lois Lane, de faam fan Superman. Yn 2019 hie Romijn in weromkearende rol yn trije ôfleverings fan 'e science fiction-tillefyzjesearje Star Trek: Discovery, wêryn't se 'Number One' spile, de earste ofsier fan it romteskip de USS Enterprise. Deselde rol fertolke se yn twa ôfleverings fan 'e rige koarte tillefyzjespecials Star Trek: Short Treks. Romijn kriget yn 'e mande mei Anson Mount en Ethan Peck ien fan 'e haadrollen yn 'e nije Star Trek-searje Star Trek: Strange New Worlds, in spin-offsearje fan Star Trek: Discovery. De opnamen foar it earste seizoen fûnen plak fan febrewaris oant july 2021.

PriveelibbenBewurkje

Romijn troude op 19 septimber 1998 mei de Amerikaanske akteur John Stamos. Under dat houlik brûkte se de namme Rebecca Romijn-Stamos, sawol privee as profesjoneel. Yn april 2004 kundigen sy en har man oan dat se útinoar giene, en op 1 maart 2005 waard de skieding útsprutsen, wêrnei't Romijn har famkesnamme wer oannaam.

Nei oanlieding fan har rol yn 'e film Femme Fatale waard Romijn yn april 2002 troch it tydskrift Elle frege oft hja troch dy rol ek nije ideeën oer har eigen seksualiteit krigen hie. Har antwurd wie: "Witst, doe't ik in jier as tweintich wie, frege ik my ôf oft ik ek belangstelling foar froulju hie, dat doe haw ik, no ja... myn húswurk dien. En it die bliken dat ik behoarlik heteroseksueel bin."

Op 19 septimber 2005 makke Romijn har ferloving mei akteur Jerry O'Connell bekend. Hja trouden op 14 july 2007 op harren ranch yn Súdlik Kalifornje. Op 28 desimber 2008 krigen Romijn en O'Connell de twillingdochters Dolly Rebecca Rose en Charlie Tamara Tulip. Dolly waard ferneamd nei countrysjongster Dolly Parton, en Charlie nei O'Connell syn broer.

FilmografyBewurkje

Filmografy as aktrise
jier titel rol of funksje opmerkings
tillefyzje
1997 Friends Cheryl ôfl. The One with the Dirty Girl
1999 Hefner: Unauthorized Kimberly Hefner tillefyzjefilm
1999–2000 Just Shoot Me! Adrienne Barker 8 ôfl.
2000 Jack & Jill Paris Everett ôfl. Starstruck
2002 MADtv n.f.t. presintatrise; ôfl. #7.14
2006 Pepper Dennis Pepper Dennis haadrol; ek ko-produsinte
2007 Drawn Together Charlotte ôfl. Charlotte's Web of Lies
2007 Carpoolers Joannifer ôfl. A Divorce to Remember
2007–2008 Ugly Betty Alexis Mead haadrol
2009 Project Runway n.f.t. gastsjuerylid; ôfl. We Expect Fashion
2009–2010 Eastwick Roxie Torcoletti haadrol
2011 Chuck Robin Cunnings ôfl. Chuck Versus the Curse
2011 The Cleveland Show omropper / ôfstudearde as stimaktrise; ôfl. Back to Cool
2011 Possessing Piper Rose Joanna Maxwell tillefyzjefilm
2011 Special Agent Oso Miss Garcia as stimaktrise; ôfl. Lost and Get Found/A View to the Truth
2011–2012 NTSF:SD:SUV:: Jessie Nichols haadrol seizoen 1 en 2
2013 Burning Love Katie 2 ôfl.
2013 King & Maxwell Michelle Maxwell haadrol
2014 The Pro Margot tillefyzjefilm
2014–2016 Skin Wars n.f.t. presintatrise en sjuerylid
2014–2018 The Librarians Eve Baird haadrol
2015 Adventure Time de keizerinne as stimaktrise; 2 ôfl.
2015 Key & Peele seerôverkaptein ôfl. Y'all Ready for This?
2015 RuPaul's Drag Race n.f.t. gastsjuerylid; ôfl. Hello, Kitty Girls!
2016 Gay for Play Game Show Starring RuPaul n.f.t. tillefyzjekwis; ôfl. Featuring Rebecca Romijn
2017 Love Locks Lindsey Wilson tillefyzjefilm
2018 Carter Cassidy Lenox ôfl. The Ring
2019 Star Trek: Discovery Number One 3 ôfl.
2019 Star Trek: Short Treks Number One 2 ôfl.
2020 Curb Your Enthusiasm Penelope ôfl. The Surprise Party
2022? Star Trek: Strange New Worlds Number One haadrol
films
1998 Dirty Work dame mei burd
1999 Austin Powers: The Spy Who Shagged Me harsels
2000 X-Men Mystique / Raven Darkhölme
2002 Femme Fatale Laure Ash / Lily Watts
2002 Rollerball Aurora
2002 Run Ronnie Run harsels
2002 Simone Faith net fermelden op 'e ôftiteling
2003 X2 Mystique / Raven Darkhölme ek bekend as X2: X-Men United
2004 Godsend Jessie Duncan
2004 The Punisher Joan
2006 The Alibi Lola ek bekend as Lies and Alibis
2006 Man About Town Nina Giamoro
2006 X-Men: The Last Stand Mystique / Raven Darkhölme
2008 Lake City Jennifer
2010 The Con Artist Belinda
2011 X-Men: First Class Mystique / Raven Darkhölme cameo; net fermelden op 'e ôftiteling
2012 Good Deeds Heidi
2012 The Producers Ulla
2014 Phantom Halo frou Rose
2015 Larry Gaye: Renegade Male Flight Attendant Sally
2018 The Death of Superman Lois Lane as stimaktrise
2018 The Swinging Lanterns Stories Malia
2019 Batman: Hush Lois Lane as stimaktrise
2019 Reign of the Supermen Lois Lane as stimaktrise
2019 Satanic Panic Danica Ross
2020 Justice League Dark: Apokolips War Lois Lane as stimaktrise
2021 Endangered Species Lauren Halsey

Keppelings om utensBewurkje

Boarnen, noaten en referinsjesBewurkje

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.