Quermianen

Quermianen (inkeltal: Quermiaan) binne in fiktyf ras fan bûtenierdske wêzens út 'e Star Wars-franchise, dy't yntrodusearre waarden yn 'e film Star Wars: Episode I – The Phantom Menace. Hja komme fan Quermia, in planeet yn 'e Bûtenrâne fan it Stjerrestelsel, en libje tige lang (teminsten 300 jier en mooglik langer).

In Quermiaan (Yarael Poof).

Fan uterlik binne Quermianen rank boude, meager útsjende wêzens mei in uterst lange, tinne hals, dy't in yn ferhâlding ta harren lichem tige lytse holle ûnderstipet. Harren hûdskleur is wyt niigjend nei grien. Hja hawwe reade kraaleachjes, in lytse mûle en gjin noas, mei't by harren de rookorganen yn 'e hânpalmen sitte. Quermianen hawwe twa stellen harsens: de behindige boppeharsens yn harren lytse plasse, en de folle gruttere ûnderharsens yn 'e boarstkas.

Quermianen hawwe gjin hier, en likemin beskikke se oer in wringe, sadat se tige bûchsum binne. Wol hawwe se twa pear earms, hoewol't guon fan harren it ûnderste pear leaver ferburgen hâlde ûnder de klean. De earms einigje syn ranke hannen mei in tomme en twa lange fingers. Oan 'e fuotten hawwe se trije grutte teannen. Troch de lange hals, dy't wol in fjirdepart fan harren lingte beslacht, tuorje Quermianen likernôch 90 sm boppe de measte oare soarten wêzens yn it Stjerrestelsel út.

Omreden fan 'e withoefolle fysike en genetyske oerienkomsten tusken de Quermianen en in oar ras fan bûtenierdske wêzens, de Xexto, binne ksenobiologen fan betinken dat hja in mienskiplike foarâldersoarte diele moatte.

Sjoch ek

• Yarael Poof

Keppelings om utens

• (in) Artikel oer Quermianen yn Wookieepedia, de offisjele Star Wars-Wikipedy

Boarnen, noaten en referinsjes

Boarnen, noaten en/as referinsjes:

Artikel oer Quermianen yn Wookieepedia, de offisjele Star Wars-Wikipedy