Sioux Valley Dakota Naasje

De Sioux Valley Dakota Naasje (Ingelsk: Sioux Valley Dakota Nation; Dakota: Tokátakiya Dakhóta Oyáte; útspr.: [to'ka:takija da'kʰo:ta o'ja:te]) is in Yndiaanske stamme-organisaasje yn Kanada, mei eigen reservaten yn it suden fan 'e provinsje Manitoba. Foarhinne stie dizze stamme bekend ûnder de namme fan Oak River Earste Naasje (Oak River First Nation); hjoed de dei wurdt soms noch wol de alternative namme Sioux Valley Earste Naasje (Sioux Valley First Nation) brûkt. ("Earste naasje" is in Kanadeeske oantsjutting foar in Yndianestam of -troep.)

Sioux Valley Dakota Naasje
Ingelsk Sioux Valley Dakota Nation
lânseigen Tokátakiya Dakhóta Oyáte
flagge
algemiene ynformaasje
lân Kanada
provinsje Manitoba
haadkertier Griswold (Manitoba)
etnisiteit Eastlike Dakota
ledetal 2.300 (2013)
oprjochting 1873
status erkend
erkenning Kanada
reservaat
reservaat Sioux Valley Dakota Naasje Res.
Fishing Station Reservaat 62A
lokaasje súdlik Manitoba
oerflak 42,0 km²
ynwennertal 1.400 (2013)
offisjele webside
www.svdngovernance.com
kaart
Sioux Valley Dakota Naasje (Manitoba)
Sioux Valley Dakota Naasje
Lokaasje yn Manitoba.

Algemien bewurkje seksje

De Sioux Valley Dakota Naasje waard as offisjele stamme-organisaasje oprjochte yn 1873, en hie neffens gegegevens út 2013 likernôch 2.300 leden. It haadkertier is fêstige yn Griswold, yn Manitoba, dat westlik fan 'e stêd Brandon leit. De leden fan 'e Sioux Valley Dakota Naasje besteane út etnyske (Sioux), nammentlik Eastlike Dakota fan 'e Sisseton-, Mdewakanton-, Wahpeton- en Wahpekûte-stammen.

Reservaten bewurkje seksje

De Sioux Valley Dakota Naasje hat in eigen reservaat, te witten: it Sioux Valley Dakota Naasje Reservaat (Sioux Valley Dakota Nation Reserve), dat foarhinne bekendstie as it Oak River Reservaat (Oak River Reserve), en dat 50 km bewesten de stêd Brandon leit. It hat in oerflak fan 41,4 km² en wurdt folslein omsletten troch de plattelânsgemeente Woodworth. Mei de Birdtail Sû Earste Naasje en de Canupawakpa Dakota Naasje dielt de Sioux Valley Dakota Naasje fierders it folle lytsere Fishing Station Reservaat 62A (Fishing Station 62A Reserve). Mei-inoar hawwe de beide reservaten in oerflak fan 42 km².

Fan 'e 2.300 leden fan 'e stamme wennen der yn 2013 justjes mear as 1.400 yn it eigen reservaat. De wichtichste delsetting fan 'e Sioux Valley Dakota Naasje is sitewearre op 49°51′ noarderbreedte by 100°29′58″ westerlingte. Sioux Valley beskikt oer in eigen bestjoersgebou, in pjutteboartersplak, in beukerskoalle, in legere skoalle (de Tatiyopa Maza Wayawa Tipi-skoalle), in middelbere skoalle, in klinyk, in fersoargingstehûs (de Dakota Oyate Lodge) en in arkadehal anneks miny-kasino (sûnt 1997). Sioux Valley hearde foarhinne, mar no net mear, ta de Dakota-Odjibwe Stammeried (Dakota Ojibway Tribal Council), in gearwurkingsferbân fan Dakota- en Odjibwe-stammen yn súdlik Manitoba.

Skiednis bewurkje seksje

De Sioux Valley Dakota Naasje is ien fan acht lytse Sû-stammen yn súdlik Manitoba en Saskatchewan, dy't dêr oan 'e ein fan 'e Dakota-Oarloch fan 1862 fêstige binne troch almeast Eastlike Dakota, nei harren flecht út 'e Amerikaanske steat Minnesota wei. It Kanadeeske regear erkent dizze "earste naasjes" en hat oan harren reservaten tawiisd, mar hâldt út dat se eins Amerikaanske flechtlingen binne, dy't inkeld yn Kanada tahâlde om't de Kroan sa freonlik is om dat ta te stean. Neffens dy riddenearring kinne de Sû yn Kanada dus gjin lânrjochten jilde litte. De Sû-stammen, oan 'e oare kant, hawwe lânkaarten en offisjele dokuminten fan foàr de kolonisaasje fan súdlik Manitoba en Saskatchewan, dêr't út blike soe dat dy krite doe wol deeglik ta harren wengebiet hearde. Dit is in juridysk toulûken dat al geande is sûnt de 1870-er jierren en dêr't mei koarten grif ek gjin ein oan komme sil.

Keppelings om utens bewurkje seksje

Boarnen, noaten en referinsjes bewurkje seksje

Boarnen, noaten en/as referinsjes:

Foar boarnen en oare literatuer, sjoch ûnder: Notes, op dizze side.

de Sû (Sioux)
Etnyske groepen
Sû (Sioux): Dakota (Eastlike Dakota of Santy • Westlike Dakota of Jankton-Janktonai) ● Lakota
Talen
Sû (Sioux): Dakota (Eastlik Dakota • Westlik Dakota) ● Lakota (Noardlik Lakota • Sintraal Lakota • Súdlik Lakota)
Tradisjonele stammen
Eastlike Dakota: Mdewakanton ● Sisseton ● Wahpekûte ● Wahpeton ● Westlike Dakota: Jankton ● Janktonai (Neder-Janktonai • Opper-Janktonai) ● Lakota: Titon (Brulee • Hûnkpapa • Minnikonzjû • Oglala • Sâns Arks • Swartfuotten • Twatsjettels)
Hjoeddeistige stamme-organisaasjes
Feriene Steaten
Assiniboin en Sû fan it Fort Peck Yndianereservaat fan Montana ● Feriene Sû Stammen (Cheyenne River Sû Stamme • Crow Creek Sû Stamme • Flandreau Santy Sû Stamme fan Súd-Dakota • Jankton Sû Stamme • Neder-Brulee Sû Stamme • Oglala Sû Stamme fan it Pine Ridge Reservaat fan Súd-Dakota • Rosebud Sû Stamme • Santy Sû Naasje • Sisseton en Wahpeton Sû Stamme • Spirit Lake Stamme • Standing Rock Sû Stamme) ● Neder-Sû Yndianemienskip ● Opper-Sû Mienskip ● Prairie Island Yndianemienskip ● Shakopee Mdewakanton Dakota Mienskip ● Mendota Mdewakanton Sû Mienskip (net erkend)
Kanada
Birdtail Sû Earste Naasje ● Canupawakpa Dakota Naasje ● Dakota Plains Wahpeton Naasje ● Dakota Tipi Earste Naasje ● Sioux Valley Dakota Naasje ● Standing Buffalo Dakota Naasje ● Wahpeton Dakota Naasje ● White Bear  Earste Naasjes ● Whitecap Dakota/Sû Earste Naasje ● Wood Mountain Lakota Earste Naasje
Reservaten
Feriene Steaten
Cheyenne River ● Crow Creek ● Flandreau ● Fort Peck ● Jankton ● Lake Traverse ● Neder-Brulee ● Neder-Sû ● Opper-Sû ● Pine Ridge ● Prairie Island ● Rosebud ● Santy ● Shakopee ● Spirit Lake ● Standing Rock
Kanada
Birdtail Creek ● Birdtail Hay Lands ● Dakota Plains ● Dakota Tipi ● Ferdrach Nû. 4 Reservaatgrûnen ● Fishing Station ● Oak Lake 59A ● Oak Lake 59B ● Sioux Valley ● Standing Buffalo ● Wahpeton ● White Bear ● Whitecap ● Wood Mountain
Oar
Grutte Sû Naasje ● Grutte Sû Reservaat ● Lakota Frijheidsdelegaasje ● Nakota ● Republyk Lakota