Tom Wopat

Tom Wopat (folút: Thomas Steven Wopat; Lodi (Wiskonsin), 9 septimber 1951), is in Amerikaansk akteur en sjonger. Hy is benammen bekend wurden troch de lang rinnende Amerikaanske tillefyzjesearje The Dukes of Hazzard, wêryn't er mei John Schneider de haadrollen fertolke. Sûnt it stopsetten fan dy searje yn 1985 hat er fral yn toanielmusicals spile, hoewol't er ek byrollen hân hat yn tillefyzjesearjes en films. As sjonger makket er muzyk fan it countrysjenre. Hy hat ferskate albums útbrocht en hie yn 'e 1980-er en 1990-er jierren tuskenbeiden súkses mei in stikmannich singles.

Tom Wopat
akteur
Tom Wopat yn 1979, yn 'e tiid fan The Dukes of Hazzard, sa't er de measte minsken foar de geast stiet.
persoanlike bysûnderheden
echte namme	Thomas Steven Wopat
nasjonaliteit	Amerikaansk
berne	9 septimber 1951
berteplak	Lodi (Wiskonsin)
etnisiteit	Tsjechysk
jierren aktyf	1970 – no
offisjele webside
www.wopat.com

Libben en karriêre

Jonkheid en oplieding

Tom Wopat waard yn 1951 berne yn Lodi, yn 'e steat Wiskonsin, as it fyfde fan acht bern yn 'e húshâlding fan Albin en Ruth Wopat. Syn heit wie in melkfeehâlder fan etnysk Tsjechysk komôf. Wopat studearre oan 'e Universiteit fan Wiskonsin-Madison.

Aktearkarriêre

Ein 1970-er jierren makke Wopat syn debút op 'e Amerikaanske tillefyzje as in figurant yn 'e soapsearje One Live to Live. Hy briek yn 1979 troch mei de populêre aventoeresearje The Dukes of Hazzard, dy't rûn fan 1979 oant 1985. Wopat spile yn dy searje de rol fan 'e brúnhierrige Luke Duke, dy't mei syn blonde neef Bo Duke (spile troch John Schneider) de korrupte countykommissaris Boss Hogg (Sorrell Booke) en de net oersnoade sheriff Roscoe P. Coltrane (James Best) altyd te fluch ôf wie.

Nei't The Dukes of Hazzard opholden wie, berikte Wopat nea wer itselde nivo fan ferneamdheid en populariteit. Hy spile troch de jierren hinne yn ferskate searjes, meast gastroltsjes, lykas yn 'e detektivesearjes Murder, She Wrote en Elementary, de komeedzjesearje Home Improvement en de plysjesearje Blue Bloods. Fan 1995 oant 1998 hied er in fêste rol yn 'e komeedzjesearje Cybill, mei û.o. Cybill Shepherd. En fan 2012 oant 2017 hied er yn 'e neo-westernsearje Longmire in weromkearende rol as sheriff Jim Wilkins fan it oanbuorjende Cumberland County.

Dêrnjonken spile Wopat yn in stikmannich tillefyzjefilms en guon spylfilms, wêrûnder Jonah Hex (2010) en Quentin Tarantino syn Django Unchained (2012). Ferskate kearen kaam er fierders gear mei de rest fan 'e âlde cast fan The Dukes of Hazzard om reünyfilms op te nimmen foar de tillefyzje. Wopat waard ek in cameo oanbean yn 'e bioskoopfilm The Dukes of Hazzard (2005), wêryn't Johnny Knoxville de rol fan Luke Duke oernaam. Hy betanke lykwols foar de ear om't er it senario net goed genôch fûn.

Fierders sette Wopat ek útein mei in karriêre as musicalakteur. Syn earste Broadway-musical wie I Love My Wife, út 1977, mar syn earste haadrol spile er yn 'e revival út 1999 fan Annie, Get Your Gun (oer Annie Oakley). Datselde jiers noch waard er nominearre foar in Tony Award foar syn rol as Frank Butler (Oakley har man). Neitiid spile Wopat ek yn oare topmusicals, lykas Chicago, 42nd Street en Glengarry Glen Ross.

Sjongkarriêre

Njonken syn aktearkarriêre is Wopat ek aktyf as sjonger, wêrby't syn muzyk foar it meastepart ta it countrysjenre rekkene wurde kin, al hat er ek wol rock n' roll songen. Syn earste album, út 1981, wie de soundtrack fan The Dukes of Hazzard. Yn 2017 kaam syn tolfde album út, dat ienfâldichwei Wopat hiet. Hoewol't syn sjongkarriêre net sa súksesfol wie as dy fan syn Dukes of Hazzard-"neef" John Schneider, hie Wopat, fral oan 'e ein fan 'e 1980-er jierren, dochs ferskate singles yn 'e wichtichste country-hitlist, de Hot Country Songs. Syn bêst prestearjende single wie The Rock and Roll of Love, út 1986, wêrmei't er it 16e plak helle

Tom Wopat yn 2024.

Priveelibben

Wopat hat twaris troud west. Syn earste houlik, mei Vickie Allen, einige yn in skieding. Neitiid wertroude er mei Kirsten S. Larvick, in filmmakster en audiofisueel argivaris. Wopat hat út syn beide houliken fiif bern.

Op 2 augustus 2017 waard Wopat yn Waltham (Massachusetts), in foarstêd fan Boston, dêr't er yn it Reagle Music Theater optrede soe yn 'e musical 42nd Street, arrestearre troch de pleatslike plysje foar seksueel oer de grins geand gedrach, doe't er by it repetearjen in froulik lid fan 'e cast by de stuten pakt hie. Neffens de toanielprodusint fan it stik wie dat net de earste kear dat er him misdroegen hie, en wied er dêr al ferskate kearen op oansprutsen. By it trochsykjen fan syn auto trof de plysje fierders twa pûdsjes kokaïne oan. Wopat joech ta dat er kokaïne snúfde, dy't er neffens eigen sizzen yn gruttere kwantiteiten oanskafte en by de tiid lâns op opbrûkte. Hy waard nei syn foarlieding op 3 augustus op boarchtocht frijlitten. By syn berjochting bekende Wopat dat er twaris froulju lestichfallen hie, en waard er feroardiele ta in jier proeftiid.

Albums

• 1981 – The Dukes of Hazzard Soundtrack (soundtrack)
• 1983 – Tom Wopat
• 1987 – A Little Bit Closer
• 1990 – Don't Look Back
• 1992 – Learning to Love
• 1995 – Hands On
• 2000 – The Still of the Night
• 2005 – Tom Wopat Sings Harold Arlen: Dissertation on the State of Bliss
• 2009 – Consider it Swung
• 2013 – I've Got Your Number
• 2014 – Home for Christmas (mei John Schneider)
• 2017 – Wopat

Singles

• 1982 – Full Moon, Empty Pockets
• 1983 – (Till) I Kissed You
• 1983 – Sha-Marie
• 1986 – True Love (Never Did Run Smooth)
• 1986 – I Won't Let You Down
• 1986 – The Rock and Roll of Love
• 1987 – Put Me Out of My Misery
• 1987 – Susannah
• 1988 – A Little Bit Closer
• 1988 – Hey Little Sister
• 1988 – Not Enough Love
• 1991 – Too Many Honky Tonks (on My Way Home)
• 1991 – Back to the Well

Filmografy

Filmografy as akteur
jier	titel	rol of funksje	opmerkings
tillefyzje
1979–1985	The Dukes of Hazzard	Luke Duke	fêste rol; 128 ôfl.
1980	Fantasy Island	David Chilton	gastrol; ôfl. Flying Aces en The Mermaid Returns
1983	The Dukes	Luke Duke	fêste rol; as stimakteur; 7 ôfl.
1984	Story, Songs and Stars	ûnbekend	tillefyzjefilm
1984	Burning Rage	Tom Silver	tillefyzjefilm
1987	Christmas Comes to Willow Creek	Pete	tillefyzjefilm
1988	Blue Skies	Frank Cobb	weromkearende rol; 8 ôfl.
1989	A Peaceable Kingdom	dokter Jed McFadden	fêste rol; 12 ôfl.
1992	Just My Imagination	Bobby Rex	tillefyzjefilm
1995–1998	Cybill	Jeff Robbins	fêste rol; 22 ôfl. nom. Screen Actors Guild Award foar bêste cast (mei Christine Baranski, Dedee Pfeiffer, Alan Rosenberg, Cybill Shepherd en Alicia Witt)
1996	Murder, She Wrote	Bill Dawson	gastrol; ôfl. Kendo Killing
1997	Contagious	Sam	tillefyzjefilm
1997	Crisis Center	Chuck Goodman	gastrol; ôfl. Someone to Watch Over Me
1997	The Dukes of Hazzard: Reunion!	Luke Duke	tillefyzjefilm
1997–1998	Home Improvement	Ian	weromkearende rol; 2 ôfl.
1998	Meteorites!	Tom Johnson	tillefyzjefilm
2000	The Dukes of Hazzard: Hazzard in Hollywood	Luke Duke	tillefyzjefilm
2001	100 Centre Street	Hanley Rand	gastrol; ôfl. Lost Causes
2001–2002	All My Children	Hank Pelham	weromkearende rol; ûnbekend tal ôfl.
2005	Smallville	senator Jack Jennings	gastrol; ôfl. Exposed
2006	Standoff	Rick Keeslar	pilotôflevering
2008	The Hive	Bill	tillefyzjefilm
2009	Taking Chance	John Phelps	tillefyzjefilm
2010–2011	Phineas and Ferb	Wilkins-broer #2	as stimakteur; weromkearende rol; 2 ôfl.
2012	Blue Bloods	Craig Iverson	gastrol; ôfl. Women With Guns
2012–2017	Longmire	sheriff Jim Wilkins	weromkearende rol; 6 ôfl.
2013	Lovestruck: The Musical	Ryan Hutton	tillefyzjefilm
2016	Elementary	Soble	gastrol; ôfl. Murder Ex Machina
2020	The Blacklist	finzenisdirekteur Roy Cain	gastrol; ôfl. Roy Cain
films
2006	Bonneville	Arlo
2007	The History of Wisconsin Football	n.f.t.	voice-over by in dokumintêre
2008	The Understudy	resjersjeur Jones
2010	Jonah Hex	kolonel Slocum
2010	Main Street	Frank
2012	Django Unchained	U.S. marshal Gill Tatum
2012	Mariachi Gringo	Ron
2015	All in Time	toskedokter
2016	Fair Haven	Richard Grant
2017	Lost Cat Corona	Jimmy Pipes
2017	New Money	John Breckner
2018	County Line	Alden Rockwell
2019	Delight in the Mountain	Guido
2022	County Line: All In	Alden Rockwell
2023	County Line: No Fear	Alden Rockwell
fideospultsjes
1999	The Dukes of Hazzard: Racing for Home	Luke Duke	as stimakteur
2004	The Dukes of Hazzard: Return of the General Lee	Luke Duke	as stimakteur
2007	Manhunt 2	The Bloodhounds	as stimakteur

Keppelings om utens

• (in) Offisjele webside fan Tom Wopat
• (in) Folsleine filmografy fan Tom Wopat yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.