Haadmenu iepenje

Sofia Boutella (Arabysk: صوفيا بوتلة, Sufya Butelah, sekuerdere transliteraasje: Ṣufya Butelaẗ; Algiers, 3 april 1982) is in Algerynsk-Frânsk dûnseresse, model en aktrise fan Arabysk etnysk komôf. Hja is bekend wurden mei rollen yn films as Kingsman: The Secret Service, Star Trek: Beyond, The Mummy en Atomic Blonde.

Sofia Boutella
Filmklapper.png akteur
Sofia Boutella (34705024651).jpg
persoanlike bysûnderheden
echte namme صوفيا بوتلة, Ṣufya Butelaẗ
nasjonaliteit Flag of Algeria.svg Algerynsk
Flag of France.svg Frânsk
berne 3 april 1982
berteplak Algiers (Algerije)
etnisiteit Flag of Algeria.svg Algerynsk-Arabysk
jierren aktyf 1998 – no
offisjele webside
Sofia Boutella op Twitter

Ynhâld

Libben en karriêreBewurkje

Jonkheid en opliedingBewurkje

Boutella waard yn 1982 berne yn Bab El Oued, in wyk fan 'e Algerynske haadstêd Algiers. Har heit is de jazz-muzikant Safy Boutella, en har mem is in arsjitekte. Boutella begûn mei 5 jier oan in klassike dûnsoplieding. Yn 1992, doe't se 10 jier wie, emigrearre se mei har âlden nei Frankryk, dêr't se úteinsette mei turnjen. Mei 18 jier waard se yn 2000 lid fan it Frânske nasjonale turnteam.

DûnskarriêreBewurkje

Yn har tinerjierren die Boutella al oan hiphopdûns en strjitdûns. Letter waard se lid fan 'e dûnsgroep Vagabond Crew, dy't yn 2006 de Battle of the Year wûn. Mei inkele oare leden fan 'e Vagabond Crew wie Boutella ek belutsen by in dûnsgroep mei de namme Chienne de Vie et Aphrodites. Fan har santjinde ôf wie Boutella yn trening by goreograaf Blanca Li. Sûnt hat se dûnse yn in ferskaat oan tillefyzjeprogramma's, reklamespotsjes en konserttoernees, sawol yn Frankryk as dêrbûten. Ek wie se te sjen yn fideoklips fan û.o. Cesária Évora (Nutridinha, 2001), Jamiroquai (Little L, 2001), de BodyRockers (I Like the Way (You Move), 2005), Madonna (Hung Up, 2005 en Sorry, 2006) en Rihanna (SOS, 2006).

Boutella har trochbraak kaam yn 2007, doe't se útkeazen waard foar in troch Jamie King goreografearre reklamespotsje foar it sportskuonmerk Nike. Neitiid waard se ek frege foar fideoklips fan û.o. Chris Brown (Wall tot Wall, 2007), Usher (Hey Daddy (Daddy's Home), 2009), Ne-Yo (Beautiful Monster, 2010 en Champagne Life, 2010), Michael Jackson (Hollywood Tonight, 2011), Take That (Get Ready for It, 2015), en Thirty Seconds to Mars (Rescue Me, 2018). Boutella die ek mei súkses audysje foar Michael Jackson syn toernee This Is It, mar koe dêr net oan meidwaan om't har toernee mei Madonna ferlinge waard en de data sadwaande oerlapen. Fierders wie Boutella yn 2010 te sjen yn in ôflevering fan 'e Amerikaanske realitytillefyzjesearje Dancing with the Stars.

AktearkarriêreBewurkje

Njonken har wurk as dûnseresse sette Boutella ek al ier útein mei aktearjen. Datoangeande makke se yn 2002 har debút yn 'e Frânske film Le Défi. Oare rollen folgen, û.m. yn 'e tillefyzjesearje Les Cordier, Juge et Flic (2004) en yn 'e film Permis d'Aimer (2005). Yn 2006 wurke se as stimaktrise mei oan 'e tekenfilm Azur et Asmar, wêryn't se in fee spile. Se fertolke de rol fan Eva yn 'e Amerikaanske dramafilm StreetDance 2 (2012), en wie te sjen as Ara yn 'e film Monsters: Dark Continent (2014).

Ien fan har bekendste en opmerklikste rollen hie Boutella yn 2014 yn 'e aksjekomeedzje en spionaazjefilm Kingsman: The Secret Service. Dêryn spile se de ûnmeilydsume moardneresse Gazelle, by wa't beide skonken amputearre wiene en ferfongen troch twa fjoerskerpe swurden. In oare tige bekende rol wie Boutella har fertolking yn 2016 fan 'e bûtenierdske kriichster en skipbreklinge Jaylah yn 'e science fiction-film Star Trek: Beyond. Yn 2017 hie se de rol fan prinsesse Ahmanet, de wichtichste smjunt yn 'e Dark Universe-film The Mummy. Datselde jiers spile se ek de Frânske geheim aginte Delphine Lasalle yn 'e film Atomic Blonde, fan regisseur David Leitch, wêrby't har tsjinspilers û.o. Charlize Theron en John Goodman wiene.

Yn maaie 2018 spile Boutella yn 'e HBO-tillefyzjefilm Fahrenheit 451, mei as tsjinspilers Michael B. Jordan en Michael Shannon. Yn july fan datselde jier wie se te sjen as de Frânske hiermoardneresse 'Nice', yn 'e science fiction-skriller Hotel Artemis, mei û.o. Jodie Foster en Jeff Goldblum. Dêryn is Boutella amper te sjen as se as in pylk troch it byld sjit yn in einsêne dy't healwei de ôftiteling ynpast is, suggerearjend dat se yn deselde rol weromkeare kin yn in ferfolchfilm.

PriveelibbenBewurkje

As har grutte foarbylden hat Boutella û.m. Fred Astaire en Daniel Day-Lewis neamd. Se wennet yn Los Angeles, en ûnderhâldt sûnt 2015 in relaasje mei de Ierske akteur Robert Sheehan.

Keppelings om utensBewurkje

Boarnen, noaten en referinsjesBewurkje

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.