Silver Borne

Silver Borne (letterlik: "Ut Sulver Berne") is it fyfde diel fan 'e Mercy Thompson-rige fan 'e Amerikaanske skriuwster Patricia Briggs. It is in fantasyroman fan it subsjenre fan 'e urban fantasy, dy't skreaun is yn it ik-perspektyf, en ferhellet oer de Amerikaanske monteur Mercedes "Mercy" Thompson, in jonge frou fan heal-Yndiaansk komôf dy't harsels feroarje kin yn in prêrjewolf. Silver Borne waard foar it earst publisearre yn 2010, troch de New Yorkske útjouwerij Ace Books, as hardcoveredysje. Letter ferskynden der ek werprintingen yn paperbackfoarm by de Britske útjouwerij Orbit Books. Krekt as de oare dielen fan 'e rige wie Silver Borne in grut súkses en helle it de bestsellerlist fan 'e krante de New York Times.

Silver Borne
algemiene gegevens
auteur	Patricia Briggs
taal	Ingelsk
foarm	roman
sjenre	fantasy
1e publikaasje	2010, New York
oarspr. útjwr.	Ace Books
rige
rige	Mercy Thompson
● foarich diel	Bone Crossed
● folgjend diel	River Marked
kodearring
ISBN	978-0 44 10 18 192

Ynhâld

Mercedes "Mercy" Thompson is in jonge frou dy't fan in Yndiaanske heit dy't se nea kennen hat, it fermogen urven hat om harsels yn in prêrjewolf (coyote) te feroarjen. Hja hie yn 'e Tri-Cities (Richland-Kennewick-Pasco), yn 'e Amerikaanske steat Washington, as monteur en eigneresse fan in garaazje in relatyf normaal bestean opboud oant se yn 'e foargeande dielen fan 'e searje almar djipper behelle rekke yn 'e oangelegenheden fan 'e pleatslike boppenatuerlike mienskip. Boppedat hat se ûnderwilens in relaasje krigen mei har buorman Adam Hauptman, in skieden heit mei in tinerdochter, dy't ek de alfa (lieder) fan 'e pleatslike Kolumbia-troep fan wearwolven is.

Yn Silver Borne kriget Mercy te meitsjen mei swierrichheden binnen de wearwolvetroep dy't feroarsake binne troch it feit dat Adam har, in prêrjewolvinne, útsocht hat as partner. Yn 'e natoer is de prêrjewolf in lytsere en solitêr libjende konkurrint fan 'e wolf, dy't dêrom geregeldwei troch wolveridels deade wurdt. In protte fan 'e wearwolven hawwe dêrom in wjersin tsjin Mercy, nammenste mear om't se har as de partner fan 'e alfa hearrigens ferskuldige binne. As der by har garaazje in mooglike moardoanslach feridele wurdt, rjochte op Adam, sa wurdt earst tocht (dy't in befeiligingsbedriuw runt), docht wer bliken dat der ek bûten de troep al fijannen genôch binne. Underwilens ferdwynt Phineas "Phin" Brewster, in bekende fan Mercy har freon Tad, sûnder spoar. Tad, dy't oan 'e oare kant fan it lân studearret, freget Mercy dêrop om ris yn Phin syn antikariaat en by him thús te sjen.

Phin is in minske mei hiel fier yn syn foargeslacht wat ierdgeastebloed, wat betsjut dat er oer in protte gefaarlike kennis beskikt, mar frijwol gjin magy hat om himsels te ferdigenjen. Mercy ûntdekt dat syn hûs yn 'e rekken holden wurdt troch guon ierdgeasten, wylst se yn syn saak in ûnbekende frou oantreft, dat ek in ierdgeast is. Se beslút om by nacht werom te kearen om temûk it spul nochris better nei te rinnen. Dêrby nimt se har pleechbroer en húsgenoat mei, de wearwolf Samuel Cornick. Yn 'e kelder fan it antikariaat wurde se oerfallen troch in ierdgeast dy't harren besiket te deadzjen, mar Samuel, dy't foar de ynbraak syn wolvefoarm oannommen hat, weeft mei him ôf. As se neitiid wer thúskomme, stiet Mercy har hûs yn ljochterlôge en is Adam ôffierd nei it sikehûs nei't er yn 'e flammen sprongen is om't er miende dat Mercy thús wie.

Tink derom: Yn de tekst hjirûnder wurdt de ôfrin fan it ferhaal beskreaun. As jo it ferhaal sels lêze wolle, is it mooglik better dat jo it no folgjende diel fan 'e plotbeskriuwing (earst noch) net lêze.

Wylst Adam noch oan it opbetterjen is, wat by wearwolven lokkigernôch hiel hurd giet, kriget Mercy berjocht fan in kwea-aardige fee dy't efter de ferdwining fan Phin blykt te sitten om't se de 'Ut Sulver Berne' siket, in magysk foarwerp fan grutte macht dat Phin nei't it skynt yn syn besit hie. De fee mient dat Phin it oan Mercy jûn hat, mar it iennichste dat sy fan Phin hat, is in liend boek mei ferhalen oer ierdgeasten. Dat binne mearkes, mar dan fertelt út it eachpunt fan 'e 'mearkefigueren'. (Yn dat boek hat se ek in ferhaal fûn oer de magyske gongelstôk dy't almar wer yn har om-en-by opdûkt om't er sa âld is dat er in eigen wil ûntwikkele hat en blykber by Mercy wêze wol.) De fee fertelt Mercy dat se Gabriel Sandoval, in tinerjonge dy't by Mercy yn 'e garaazje wurket, ûntfierd hat. Se wol de jonge ruilje tsjin 'e Ut Sulver Berne.

Mercy ropt dan de help yn fan har âlde baas Siebold "Zee" Adelbertsmiter, dat in metaalbewurkjende ierdgeast is. Dy leit kontakt mei in oare ierdgeast dy't er tinkt dat helpe kin, wat de frou blykt te wêzen dy't Mercy earder troffen hat yn Phin syn antikariaat. Sy hat in persoanlik belang by de saak om't Phin fan har ôfstammet. Boppedat is se de makster fan 'e Ut Sulver Berne (har namme is Ariana, dat Welsk is foar "sulver"). Dat foarwerp blykt ûnder in falske skyn skûl te gean ûnder it boek dat Mercy fan Phin liend hie. It docht boppedat bliken dat Ariana de âlde leafde is fan Samuel Cornick, dy't se troch dizze gearrin fan omstannichheden nei mear as tûzen jier weromfynt.

Om Phin en Gabriel te befrijen, iepenet Zee in poarte nei it domein fan 'e fee, wêrnei't Mercy dêr yn 'e mande mei Ariana, Samuel en Jesse, Adam syn tinerdochter dy't fereale is op Gabriel, binnenkringt. Se treffe Gabriel en Phin libben oan, mar wurde dan sels finzen nommen troch de fee en har trewanten, dy't har foar it meastepart hearrich binne om't se harren betsjoend hat. Troch in útdaging oan te gean en te winnen, wit Ariana Phin, Gabriel, Jesse, Samuel en harsels frij te krijen, mar Mercy net, mei't de fee noch altyd yn 'e ûnderstelling ferkeard dat sy de Ut Sulver Berne yn har besit hat (yn wurklikheid hat Phin har it boek allinnich mar liend, en is hy dus noch altyd de eigner). Nei't de oaren frijlitten binne, hat de fee frijwat muoite om Mercy te betsjoenen, mei't se fierhinne ymmún foar magy is. Uteinlik slút de fee har dêrom op yn har eigen tinzen, as yn in dream dêr't men net út wekker wurde kin.

Hoewol't Mercy mar ien dei finzen holden wurdt, giet ûnderwilens bûten it domein fan 'e fee in moanne foarby wylst Adam en syn wearwolven en Mercy har oare freonen almar wanhopiger om har sykje. Uteinlik is it Bran Cornick, de marrok, Samuel syn heit en de lieder fan alle wearwolven yn Noard-Amearika, dy't har fia in geastlike konneksje weromfynt en har mystike bân mei Adam en de rest fan 'e wolvetroep, dy't de fee trochsnien hie, reparearret. Dat beëiniget ek mei-iens de tsjoen fan 'e fee, en sadree't se wer de behearsking oer har lichem hat, pakt Mercy har pistoal (dat net ien fan 'e trewanten fan 'e fee fuortbringe koe om't ierdgeasten gjin metaal oanreitsje kinne) en sjit de fee dea. Neitiid fertelt Bran har dat er lange tiid om 'e nocht nei in spoar fan har geast socht hie, oant er har op in stuit ynienen samar hie, doe't syn hân op it hânsel fan 'e magyske gongelstôk fallen wie dy't njonken him ferskynd wie.

Boarnen, noaten en referinsjes

Boarnen, noaten en/as referinsjes:

Offisjele webside fan Patricia Briggs Briggs, Patricia, Silver Borne, New York, 2010 (Ace Books), ISBN 978-0 44 10 18 192.