Jenna Coleman

Jenna Coleman (folút: Jenna-Louise Coleman; Blackpool, 27 april 1986) is in Ingelsk tillefyzje-, film-, toaniel- en stimaktrise. Hja is benammen bekend wurden troch har tillefyzjerollen as Jasmine Thomas yn 'e soapsearje Emmerdale, Clara Oswald yn 'e science fictionsearje Doctor Who, keninginne Fiktoaria yn 'e biografyske dramarige Victoria en de santjinde-iuwske aventoersfrou Johanne Constantine yn 'e Netflix-searje The Sandman. Op it wite doek wie Coleman ûnder mear te sjen yn in byrol yn it romantysk drama Me Before You.

Jenna Coleman
akteur
persoanlike bysûnderheden
echte namme	Jenna-Louise Coleman
nasjonaliteit	Britsk
berne	27 april 1986
berteplak	Blackpool (Ingelân)
etnisiteit	Ingelsk
jierren aktyf	2005 – no
offisjele webside
Jenna Coleman op Twitter

Libben en karriêre

Jonkheid en oplieding

Coleman waard yn 1986 berne yn Blackpool, yn it greefskip Lancashire, as de dochter fan Keith Coleman en dy syn frou Karen. Se hat in âldere broer dy't Ben hjit. Har foarnamme waard betocht troch har beppe, dy't har ferneamde nei it personaazje Jenna Wade (spile troch Priscilla Presley, yn 'e bekende Amerikaanske soapsearje Dallas. Coleman folge fuortset ûnderwiis oan 'e Arnold School yn Blackpool, dêr't se lid wie fan it toanielselskip In Yer Space. Dêrmei fierde se it toanielstik Crystal Clear op ûnder it Edinburgh Festival, dêr't se in priis wûn foar har rol.

Jenna Coleman.

Aktearkarriêre

Doe't Coleman yn 2005 op audysje gie by ferskate toanielskoallen, waard har de rol fan Jasmine Thomas oanbean yn 'e Britske soapsearje Emmerdale. Se gie dêr op yn en spile dy rol 168 ôfleverings lang, fan 2005 oant 2009. Yn 2006 waard se nominearre foar de National Television Award yn de kategory populêrste nijynkommeling, en yn 2007 waard se by de útrikking fan 'e British Soap Awards útroppen ta bêste nijynkommeling. Yn 2009 waard se fierders nominearre foar de British Soap Awards yn de kategoryen bêste aktrise, meast seksy frou en bêste aktearprestaasje.

Yn 2009 hie Coleman in haadrol yn 'e Britske jongereinsearje Waterloo Road, as de ûnmeilydsume tiner Lindsay James. Mei't se doedestiden 23 jier wie, fertelde Coleman letter dat se it spyljen fan in skoalfamke "surreälistysk" fûn hie. Yn desimber 2010 waard bekendmakke dat Coleman de rol fan Susan Brown spylje soe yn 'e BBC-tillefyzjesearje Room at the Top, nei in roman fan John Braine. It wie oarspronklik de bedoeling dat dy rige yn april 2011 útstjoerd wurde soe, mar dat stûke doe't der in skeel oer de auteursrjochten ûntstie tusken de makkers en de erven Braine. Nei't de ûnienichheid yn 2012 bylein waard, koe de twadielige minysearje yn septimber fan dat jier dochs noch útstjoerd wurde.

Jenna Coleman yn 2013.

Underwilens hie Coleman doe yn 2011 har debút op it wite doek makke, mei in hiel lyts roltsje yn 'e Amerikaanske superheldefilm Captain America: The First Avenger. Datselde jiers liende se har stim oan it personaazje fan prinsesse Melia Antiqua yn 'e Ingelsktalige adaptaasje fan it Japanske fideospultsje Xenoblade Chronicles. Yn 2012 fertolke se de rol fan Annie Desmond yn 'e fjouwerdielige minysearje Titanic. Ek wie se yn 2012 as stimaktrise belutsen by de koarte film Imaginary Forces.

Yn maart 2012 waard Coleman yn ien fan har bekendste rollen cast as Clara Oswald, de selskipsfrou fan 'e Alfde Dokter (spile troch Matt Smith) en de Tolfde Dokter (spile troch Peter Capaldi), yn 'e populêre science fiction-searje Doctor Who. Coleman spile dy rol oant en mei 2015, yn 'e sânde oant en mei de njoggende searje fan Doctor Who, hoewol't se yn 2017 noch foar in kameo weromkearde yn Twice Upon a Time, de krystôflevering fan 2017. Foar de rol fan Clara Oswald waard Coleman yn 2015 nominearre foar in Saturn Award yn 'e kategory bêste byrol fan in aktrise op 'e tillefyzje. Dêrnjonken wie Coleman yn 2013 ek te sjen yn 'e tillefyzjesearjes Death Comes to Pemberley, in moardmystearje nei de roman mei deselde namme fan P.D. James, en Dancing on the Edge, oer it wol en wee fan in swarte jazz-band yn 'e 1930-er jierren. Datselde jiers begûn Coleman, dy't har oant doe ta 'Jenna-Louise Coleman' neamd hie, as artystenamme de ferkoarte foarm 'Jenna Coleman' te brûken.

Yn 2016 wie Coleman op 'e tillefyzje te sjen as de njoggentjinde-iuwske Britske keninginne Fiktoaria yn 'e biografyske kostúmdramarige Victoria. Yn in fraachpetear joech Coleman letter ta dat se net alhiel op 'e hichte wie mei it Fiktoriaanske Tiidrek doe't se yn 'e rol fan 'e foarstinne cast waard, en dat se harsels by de tiid bringe moatten hie troch har yn 'e rol yn te lêzen. Ek sei se dat de rol fan Fiktoaria har einlik útbriek út it fakje fan "fanke út 'e arbeidersklasse út Noard-Ingelân" dêr't se troch har rol yn Emmerdale yn bedarre wie. Victoria waard in grut súkses, net inkeld yn it Feriene Keninkryk, mar ek dêrbûten. Coleman wûn der sadwaande ynternasjonale bekendheid mei. Produsint ITV besleat yn 2016 om in twadde seizoen fan Victoria te meitsjen, en yn desimber 2017 waard besletten ta in trêde seizoen. Foar har rol as keninginne Fiktoaria wûn Coleman yn 2017 in Golden Nymph Award foar bêste aktrise yn in dramasearje, en waard se yn 2017 en 2018 nominearre foar in National Television Award foar bêste optreden yn in dramasearje.

Jenna Coleman yn 2015.

Ek yn 2016 spile Coleman de byrol fan Katrina Clark, de suster fan haadpersoan Lou Clark (spile troch Emilia Clarke), yn 'e romantyske dramafilm Me Before You. Fierders wie Coleman yn 2016 as stimaktrise belutsen by in ôflevering fan de animaasjerige Thunderbirds Are Go. Yn 2018 fersoarge se de voice-over foar in reklamekampanje fan Royal Caribbean International. Datselde jiers spile se ek yn 'e BBC-minysearje The Cry, nei in roman fan Helen FitzGerald út 2013. Yn 2019 stie Coleman op 'e planken yn it Londenske Old Vic Theatre mei in produksje fan it toanielstik Al My Sons. Coleman spile yn 2022 de santjinde-iuwske aventoersfrou Johanne Constantine yn 'e Netflix-searje The Sandman.

Priveelibben

Coleman hat foar it One To One Children's Fund, dêr't se ambassadrise foar is, in protte goeddiedichheidswurk dien yn Súd-Afrika, op it mêd fan it bewust meitsjen fan 'e befolking fan 'e gefaren fan it HIV-firus. Hja is ek ambassadrise foar Place2Be, in goed doel dat psychoterapy op skoallen yn it Feriene Keninkryk fersoarget foar learlingen dy't dêr ferlet fan hawwe.

Filmografy

Filmografy as aktrise
jier	titel	rol of funksje	opmerkings
tillefyzje
2005–2009	Emmerdale	Jasmine Thomas	fêste rol
2009	Waterloo Road	Lindsay James	weromkearende rol
2012	Titanic	Annie Desmond	weromkearende rol
2012	Room at the Top	Susan Brown	tillefyzjefilm
2012–2015	Doctor Who	Oswin Oswald / Clara Oswald	fêste rol, searje 7–9 (38 ôfl.)
2013	Dancing on the Edge	Rosie Williams	weromkearende rol
2013	The Five(ish) Doctors Reboot	harsels	in Doctor Who-parody ta gelegenheid fan it 50-jierrich bestean fan 'e searje
2013	Death Comes to Pemberley	Lydia Wickham	haadrol
2016	Thunderbirds Are Go	Baines	gastrol; as stimaktrise; ôfl. Earthbreaker
2016–2019	Victoria	keninginne Fiktoaria	titelrol; 25 ôfl.
2017	Doctor Who	Clara Oswald	tillefyzjespecial
2018	The Cry	Joanna Lindsay	haadrol
2020	Inside No. 9	Beattie	ôfl. Death Be Not Proud
2021	The Serpent	Marie-Andrée Leclerc	haadrol
2021	Billion Pound Bond Street	n.f.t.	fertelster
2022	The Sandman	Johanna Constantine I / Johanna Constantine II	weromkearende rol; 3 ôfl.
2022	The War Rooms	Joan Bright	haadrol; ek útfierend produsinte
2023	Wilderness	Liv Taylor	haadrol
films
2011	Captain America: The First Avenger	Connie	tige lyts roltsje
2016	Me Before You	Katrina Clark
2019	Corporate Monster	Ellen	koarte film
2022	Klokkenluider	Flo
2023	Jackdaw	Bo
fideospultsjes
2005	Drakengard 2	Manah
2010	Xenoblade Chronicles	prinsesse Melia Antiqua	Ingelsktalige neisyngronisearring
2015	Lego Dimensions	Clara Oswald	haadspultsje en Doctor Who-expansion
2020	Xenoblade Chronicles: Definitive Edition	prinsesse Melia Antiqua	Ingelsktalige neisyngronisearring, mei nije Future Connected-epilooch

Keppelings om utens

• (in) Jenna Coleman op Twitter
• (in) Folsleine filmografy fan Jenna Coleman yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Jenna Coleman fan Wikimedia Commons.