Tawny Kitaen

Tawny Kitaen (útspr.: [ˈtɔːni kɪ'te:n], likernôch: "tâ-ny kit-teen"; wiere namme: Julie Ellen Kitaen; San Diego, 5 augustus 1961 – Newport Beach, 7 maaie 2021) wie in Amerikaansk aktrise, presintatrise en model. Hja waard it bekendst fan har byrollen yn 'e spylfilm Bachelor Party en de tillefyzjesearje Hercules: The Legendary Journeys. Dêrnjonken wurke Kitaen ek mei oan fideoclips fan ferskate foaroansteande bands. Nei de milenniumwiksel wie se ek in protte te sjen yn realitytillefyzjeprogramma's.

Tawny Kitaen
akteur
Tawny Kitaen yn 1984.
persoanlike bysûnderheden
echte namme	Julie Ellen Kitaen
nasjonaliteit	Amerikaansk
berne	5 augustus 1961
berteplak	San Diego (Kalifornje)
stoarn	7 maaie 2021
stjerplak	Newport Beach (Kalifornje)
etnisiteit	Iersk Joadsk Skotsk
jierren aktyf	1983 – 2017
offisjele webside
Tawny Kitaen yn 'e IMDb

Libben

Jonkheid

Kitaen waard yn 1961 berne yn San Diego, yn Súdlik Kalifornje, as de dochter fan Linda Taylor, in húsfrou en eardere dielnimster oan skientmewedstriden, en Terry Kitaen, in wurknimmer by in fabryk dêr't neönreklames makke waarden. Oan har memme kant wie se fan mingd Iersk en Skotsk etnysk komôf. Fia har heit wie se etnysk Joadsk en stamme se ôf fan 'e Asjkenazyske Joaden fan Ruslân. Kitaen waard grutbrocht yn har heite joadske religy, al wie se strikt nommen (neffens de regels fan it joadendom sels, dy't soks inkeld fia de mem rekkenje) gjin joadinne. Doe't se tolve jier wie, naam se op eigen manneboet de bynamme "Tawny" (likernôch: "Brúntsje") oan as de iennichste foarnamme dy't se tenei noch brûke woe.

Karriêre

Kitaen begûn har karriêre yn 'e iere 1980-er jierren as model. Se wie te sjen yn ferskate doedestiden bekende reklamespotsjes op 'e Amerikaanske tillefyzje, yn 't bysûnder foar Jack LaLanne's European Health Spas, in keatling fan welnesssintra. It ferskinen foar de kamera yn dy spotsjes ynspirearre Kitaen derta, sa skreau se yn jannewaris 2021 op Instagram, om aktrise wurde te wollen.

Yn dy snuorje stie Kitaen ek op 'e cover fan 'e EP Ratt (1983) en it album Out of the Cellar (1984) fan 'e glam metal-band Ratt, mei't se op dat stuit in relaasje hie mei de gitaris fan Ratt, Robbin Crosby. Kitaen wie ek te sjen yn 'e fideoclip fan it nûmer Back for More (1984) fan Ratt.

Har wurkpaad as aktrise sette Kitaen yn 1983 útein mei in lyts roltsje yn 'e tillefyzjefilm Malibu. It jiers dêrop spile se de haadrol yn 'e eroatysk tinte aventoerefilm The Perils of Gwendoline in the Land of the Yik-Yak. Ien fan har bekendste rollen hie se, ek yn 1984, yn 'e komeedzjefilm Bachelor Party (betsjutting: "frijfeintefeest"), as de breid fan in jonge Tom Hanks. Yn 1986 hie se fierders de haadrol yn 'e horrorfilm Witchboard.

Yn 1987 ferskynde Kitaen yn ferskate fideoclips foar nûmers fan 'e band Whitesnake, te witten: Still of the Night, Here I Go Again en Is This Love? Krektsa wie se letter te sjen yn noch twa oare fideoclips fan dyselde band: yn 1989 yn dy fan it nûmer Fool for Your Loving en yn 1990 yn dy foar it nûmer The Deeper the Love.

Oan 'e ein fan 'e 1980-er en it begjin fan 'e 1990-er jierren hie Kitaen gastrollen yn ferskate tillefyzjesearjes, wêrûnder de soapsearje Santa Barbara en de komeedzjesearjes Seinfeld en Married… with Children. Teffens hie se as Mona Loveland in fêste rol yn 'e komeedzjesearje The New WKRP in Cincinnati. Fan 1992 oant 1994 presintearre Kitaen mei Dave Coulier it home video-programma America's Funniest People.

Yn 1994 hie Kitaen ien fan har bekendste rollen as Deïaneira, de frou fan 'e Grykske held en healgod Herkules (spile troch Kevin Sorbo), yn 'e tillefyzjefilms Hercules and the Circle of Fire, Hercules in the Underworld en Hercules in the Maze of the Minotaur. Dy blieken sa populêr dat der in tillefyzjesearje fan makke waard, Hercules: The Legendary Journeys, wêryn't Kitaen fan 1995 oant 1997 in weromkearende rol as Deïaneira hie.

Nei de milenniumwiksel wie Kitaen mear yn realitytillefyzjeprogramma's te sjen. Sa wurke hja fan 2006 ôf mei oan The Surreal Life. Yn 2008 wie se te sjen wie yn Celebrity Rehab with Dr. Drew, wêryn't se fan har ferslaving oan medisinen besocht ôf te kommen. Yn 2017 ferskynde se yn Botched (oer plastyske sjirurzjy) om har boarste-ymplantaten ferwiderje te litten. Fierders hie Kitaen yn 2011 noch in gastrol yn in ôflevering fan 'e plysjesearje CSI: Crime Scene Investigation.

Priveelibben

Kitaen hie dysleksy.

Relaasjes

Op 'e middelbere skoalle en dêrnei, yn 'e iere 1980-er jierren, hie Kitaen in relaasje mei Robbin Crosby, de gitarist fan 'e metalband Ratt. Dêrnei wie hja de mêtresse fan Amerikaansk fuotbalstjer en akteur O.J. Simpson yn in oerhuorrige ferhâlding dy't in ier lang duorre wylst Simpson doe troud wie mei Nicole Brown Simpson. Dat wie op dat stuit geheim, mar kaam oan it ljocht by it proses tsjin Simpson yn 1997 foar de moard op syn frou en har minner Ron Goldman.

Yn 1989 troude Kitaen mei David Coverdale, de sjonger fan 'e band Whitesnake, mar dat houlik einige yn 1991 yn in skieding. Neitiid krige se in relaasje mei honkballer Chuck Finley, mei wa't se yn 1997 wertroude. Mei him krige se twa dochters, Wynter (1993) en Raine (1998). Dit houlik rûn op 'e klippen nei't Finley yn 2002 oanjefte tsjin Kitaen die foar húslik geweld. De saak waard bûten de rjochtbank om skikt, wêrby't Kitaen tasei in kursus folgje te sillen foar dieders fan húslik geweld. Ek mocht se net mear besykje kontakt op te nimmen mei Finley.

Oanfarrings mei justysje

Yn novimber 2006 waard Kitaen by har thús yn San Juan Capistrano arrestearre foar it besit fan 15 g kokaïne. Se ûntrûn fannijs strafferfolging troch akkoart te gean mei in seis moannen duorjend rehabilitaasjeprogramma om fan har drugsferslaving ôf te kommen. Op 26 septimber 2009 waard Kitaen op 'e nij oppakt, diskear yn Newport Beach, foar riden ûnder ynfloed. Se bekende skuld en waard feroardiele ta twa dagen finzenisstraf, 64 oeren taakstraf en it folgjen fan in rehabilitaasjekursus. Op 22 july 2019 waard Kitaen wer yn Newport Beach oppakt foar riden ûnder ynfloed. Op 'e nij bekende se skuld, mar se ferstoar ear't de saak foarkomme koe.

Ferstjerren

Tawny Kitaen kaam op 7 maaie 2021 thús yn Newport Beach te ferstjerren. Se waard 59 jier. De deadsoarsaak wie net fuortendaliks dúdlik, en de plysje liet in ferklearring útgean om geroften de kop yn te drukken en dúdlik te meitsjen dat der gjin oanwizings fûn wiene dat it om in oerdoazis drugs gie. Yn oktober 2021 waard bekendmakke dat út 'e lykskôging bleken wie dat Kitaen stoarn wie oan dilatative kardiomyopaty, in gauris foarkommende foarm fan hertsykte. Der waard steld dat har ferslaving oan ferskate soarten medisinen, wêrûnder mirtazapine, alprazolam, acetaminophen, pregabaline en hydrocodone, oan har hertfalen bydroegen hie, mar net direkt ferantwurdlik foar har dea wie.

Filmografy

Filmografy as aktrise
jier	titel	rol of funksje	opmerkings
tillefyzje
1983	Malibu	faam fan Mahoney	tillefyzjefilm
1985	California Girls	Karen Malone	tillefyzjefilm
1986–1987	Capitol	Meredith Ross	weromkearende rol
1987	Glory Years	Melinda Murphy	tillefyzjefilm
1989	Santa Barbara	Lisa DiNapoli	weromkearende rol fan 28 febrewaris oant en mei 21 july 1989
1989	Booker	Skylar Samperton	gastrol; ôfl. Someone Stole Lucille
1991	They Came from Outer Space	Monica Bates	gastrol; ôfl. Sex, Lies & UFOs: Part 2
1991	Veronica Clare	ûnbekend	gastrol; 1 ôfl.
1991	Seinfeld	Isabel	gastrol; ôfl. The Nose Job
1991–1993	The New WKRP in Cincinnati	Mona Loveland	fêste rol; 19 ôfl.
1992–1994	America's Funniest People	n.f.t.	as presintatrise
1992–1996	Eek! The Cat	Annabelle	as stimaktrise; fêste rol; 39 ôfl.
1994	Married... with Children	Dominique	ôfl. Shoeway to Heaven
1994	Hercules and the Circle of Fire	Deïaneira	tillefyzjefilm
1994	Hercules in the Underworld	Deïaneira	tillefyzjefilm
1994	Hercules in the Maze of the Minotaur	Deïaneira	tillefyzjefilm
1995	The Naked Truth	harsels	gastrol; ôfl. Real Life Henry Higgins Turns Dork into Duke!
1995	Burke's Law	Rhonda Dooley	gastrol; ôfl. Who Killed Cock-a-Doodle Dooley?
1995	Hercules: The Legendary Journeys	Deïaneira	weromkearende rol; ôfl. The Wrong Path, The Other Side
1997	Hercules: The Legendary Journeys	Deïaneira	weromkearende rol; ôfl. When a Man Loves a Woman
2006	The Surreal Life	harsels	realitytillefyzjeprogramma
2006	Behind the Music	harsels	dokumintêresearje; ôfl. Ratt
2008	Celebrity Rehab with Dr. Drew	harsels	realitytillefyzjeprogramma
2011	CSI: Crime Scene Investigation	Lydia Kole	gastrol; ôfl. Father of the Bride
2012	Life@Large	Diane Kaplan	websearje, minysearje
2017	Botched	harsels	realitytillefyzjesearje; ôfl. Boob Trains and Big Butts
films
1984	The Perils of Gwendoline in the Land of the Yik-Yak	Gwendoline
1984	Bachelor Party	Debbie Thompson
1986	Witchboard	Linda Brewster
1986	Crystal Heart	Alley Daniels
1986	Instant Justice	Virginia
1987	Happy Hour	Misty Roberts
1989	White Hot	Vanessa
1993	Three of Hearts	frou yn bar
1996	Playback	Sara Burgess
1997	Dead Tides	Nola
2011	Here We Go Again	harsels	koarte film
2014	After Midnight	Rikki
2015	Come Simi	Dee Dee
fideoclips
1984	Back for More		fan Ratt
1987	Still of the Night		fan Whitesnake
1987	Here I Go Again		fan Whitesnake
1987	Is This Love?		fan Whitesnake
1989	Fool for Your Loving		fan Whitesnake
1990	The Deeper the Love		fan Whitesnake

Keppelings om utens

• (in) Folsleine filmografy fan Tawny Kitaen yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Tawny Kitaen fan Wikimedia Commons.