Guy Gavriel Kay

Guy Gavriel Kay (Weyburn (Saskatchewan), 7 novimber 1954) is in Kanadeesk skriuwer en dichter, dy't him benammen taleit op it skriuwen fan romans fan it sjenre fan 'e fantasy. Nettsjinsteande syn eigen útsprutsen foarkar om sjenreklassifikaasjes te mijen, is er dêrby fral ferneamd wurden om syn histoaryske fantasy, wêrby't er û.m. fuortborduerret op 'e skiednis fan it Byzantynske Ryk, de Spaanske Reconquista, it Angelsaksyske Ingelân fan Alfred de Grutte en de Sineeske Tang-dynasty. Foarôfgeande oan syn eigen karriêre as skriuwer wie Kay as redakteur belutsen by postume útjeften fan it wurk fan 'e grutte Ingelske fantasy-auteur J.R.R. Tolkien.

Guy Gavriel Kay
skriuwer
Guy Gavriel Kay yn 2011.
persoanlike bysûnderheden
echte namme	Guy Gavriel Kay
nasjonaliteit	Kanadeesk
berne	7 novimber 1954
berteplak	Weyburn (Saskatchewan)
etnisiteit	Ingelsk
wurk
taal	Ingelsk
sjenre	fantasy, poëzij
bekendste   wurk(en)	The Fionavar Tapestry The Sarantine Mosaic Under Heaven
útjouwer	Eos, Roc Books, Voyager, Simon & Schuster
prizen	World Fantasy Award 2008
jierren aktyf	1984 – no
offisjele webside
www.brightweavings.com

Libben en karriêre

Jonkheid en oplieding

Kay waard yn 1954 berne yn Weyburn, yn 'e Kanadeeske provinsje Saskatchewan, mar groeide op yn Winnipeg, de haadstêd fan 'e oanbuorjende provinsje Manitoba. Nei't er de middelbere skoalle ôfrûne hie, studearre er filosofy oan 'e Universiteit fan Manitoba. Doe't Christopher Tolkien ferlet hie fan in assistint by it redigearjen fan it noch net útjûne wurk fan syn heit, de ferneamde Ingelske fantasyskriuwer J.R.R. Tolkien silger, keas er foar Kay. Dy ferfear dêrop yn 1974 nei Oxford ta, en wie as redakteur behelle yn it reemeitsjen foar publikaasje fan wat The Silmarillion waard.

Karriêre as jurist

Yn 1975 kearde Kay werom nei Kanada, dêr't er foar abbekaat learde oan 'e Universiteit fan Toronto. Nei it beheljen fan syn masterskip yn 'e rjochten, waard er yn 1981 talitten ta de oarder fan abbekaten fan Ontario. Neitiid fûn Kay wurk by de Kanadeeske steatsomrop Canadian Broadcasting Corporation (CBC), en waard er redakteur en assistint-produsint fan it radioprogramma oer wet en rjocht The Scales of Justice. Yn 1985 waard him foar dat wurk de Scales of Justice Award takend troch de Canadian Law Reform Commission, foar de bêste berjochtjouwing troch de media oer in juridyske kwestje.

Skriuwkarriêre

Underwilens wie Kay úteinset mei syn karriêre as skriuwer. Syn earste wurk wie de trilogy The Fionavar Tapestry, in miks fan urban fantasy en hege fantasy dy't sterk op it wurk fan Tolkien linet. Yn 1984 kaam it earste diel út, dat as titel The Summer Tree hie. Dêryn waard de lêzer yn 'e kunde brocht mei fiif jonge minsken út ús wrâld, dy't út Toronto wei nei in parallelle wrâld reizgje en dêr oan kop en earen ta belutsen reitsje by in striid tusken goed en kwea. It twadde diel wie The Wandering Fire (1986), dat bekroane waard mei in Prix Aurora, en de trilogy einige mei The Darkest Road (1986).

Yn it grutste part fan syn lettere wurk soe Kay syn ferhalen hielendal yn in selsbetochte wrâld spylje litte. Nettsjinsteande syn eigen útsprutsen foarkar om sjenreklassifikaasjes te mijen, kinne dy boeken dúdlik yndield wurde by it subsjenre fan 'e histoaryske fantasy, mei't de skriuwer dêryn in ôfspegeling jout fan beskate perioaden út 'e skiednis fan ús eigen wrâld sûnder dy as sadanich te beneamen. De oerienkomsten binne lykwols oerdúdlik, en boppedat hat Kay nea in geheim makke fan syn boarnen fan ynspiraasje.

Yn 1990 publisearre er syn fjirde roman, Tigana, in op himsels steand fantasywurk dat yn in lân spilet dat sterk de sfear en kultuer fan it Itaalje út 'e Renêssânse opropt. Dit boek waard nominearre foar de World Fantasy Award yn 'e kategory bêste roman. A Song for Arbonne (1992), dat ek alhiel op himsels stiet, is winliken in werjefte (en oanpassing) fan it hichtepunt fan 'e kultuer fan 'e Provâns út 'e Hege Midsiuwen en de Albiginzyske Krústocht (tsjin 'e kataren) dy't oan dy kultuer in ein oan makke. Foar dit wurk krige Kay syn twadde Prix Aurora.

Mei The Lions of Al-Rassan begûn Kay yn 1995 in rige romans dy't wol op harsels stiene, mar yn in mienskiplike wrâld spylje, dat in alternative ferzje fan ús eigen wrâld is. Sa is The Lions of Al-Rassan basearre op 'e Reconquista fan Spanje troch de kristenen op 'e moslims yn 'e Midsiuwen. The Sarantine Mosaic is in duology fan twa boeken: Sailing to Sarantium (1998) en Lord of Emperors (2000). Dêryn beskriuwt Kay it hichtepunt fan in ryk dat ynspirearre is troch it Byzantynske Ryk út 'e tiid fan 'e keizer Justinianus I. Beide dielen waarden nominearre foar in World Fantasy Award. The Last Light of the Sun (2004) spile ek wer dizze selde wrâld, en dêryn beskreau Kay in alternative ferzje fan it Angelsaksyske Ingelân út 'e tiid fan kening Alfred de Grutte.

Ysabel, út 2007, wie in hiel oar boek, ien fan it urban fantasy-sjenre dy't yn ús wrâld spilet. It ferhaal giet oer in opslûpen jonge dy't yn 'e Provâns yn oanrekking komt mei figueren út it fiere ferline. Yn 'e tekst wurdt dit wurk ferbûn mei The Fionavar Tapestry, mar dy bân stelt net folle foar en is boppedat ek net wichtich foar de plot. Mei Ysabel wûn Kay sawol de White Pine Award fan 2007 as de World Fantasy Award foar bêste roman fan 2008. Ek waard it boek nominearre foar in Mythopoeic Award yn 'e kategory bêste literatuer foar folwoeksenen.

Yn 2011 waard Kay fannijs nominearre foar in Mythopoeic Award, en teffens foar de fjirde kear foar in World Fantasy Award, foar de roman Under Heaven (2010). Dat ferhaal is basearre op 'e achtste-iuwske Tang-dynasty yn Sina en de foarfallen dy't oanlieding joegen ta de An Shi-opstân. River of Stars, út 2013, kin hiel dizenich as in ferfolch op Under Heaven beskôge wurde, mei't it yn deselde wrâld spilet (mar iuwen letter) en ynspirearre is troch de foarfallen om 'e Jin-Song-oarloggen hinne, ûnder de Sineeske Song-dynasty út 'e tolfde iuw. Yn 2016 folge Children of Earth and Sky, dat Kay basearre op it Kroaasje út 'e sechstjinde iuw.

Ein 2016 hie Guy Gavriel Kay in oeuvre fan trettjin romans op syn namme stean. Dêropta hat er yn 2003 in dichtbondel publisearre, mei as titel Beyond This Dark House. Syn wurk is yn mear as fiifentweintich ûnderskate talen oerset, wêrûnder it Nederlânsk. Yn 2014 waard Kay beneamd yn 'e Oarder fan Kanada "foar syn bydragen op it mêd fan 'e spekulative fiksje as in ynternasjonaal fierd auteur."

Wurk

• The Fionavar Tapestry-trilogy
  • 1984 – The Summer Tree
    • Nederlânske oersetting: De Zomerboom (fert. Renée C. Vink, 1989)
  • 1986 – The Wandering Fire
    • Nederlânske oersetting: Het Zwervend Vuur (fert. Renée C. Vink, 1990)
  • 1986 – The Darkest Road
    • Nederlânske oersetting: De Donkerste Weg (fert. Renée C. Vink, 1990)
• yn in mienskiplike wrâld
  • 1995 – The Lions of Al-Rassan
  • The Sarantine Mosaic-duology
    • 1998 – Sailing to Sarantium
    • 2000 – Lord of Emperors
  • 2004 – The Last Light of the Sun
  • 2010 – Under Heaven
  • 2013 – River of Stars
  • 2016 – Children of Earth and Sky
  • 2019 – A Brightness Long Ago
  • 2022 – All the Seas of the World
• op harsels steande wurken
  • 1990 – Tigana
    • Nederlânske oersetting: Tigana (fert. Renée C. Vink, 1991; werpr. 2001)
  • 1992 – A Song for Arbonne
    • Nederlânske oersetting: Een Lied voor Arbonne (fert. Renée C. Vink, 1993; werpr. 2001 as Een Lofzang voor Arbonne)
  • 2003 – Beyond This Dark House (dichtbondel)
  • 2007 – Ysabel
    • Nederlânske oersetting: Ysabel (fert. Renée C. Vink, 2009)

Prizen en nominaasjes

Jier	Priis	Resultaat	Kategory	Foar
1985	Scales of Justice Award (fan 'e Canadian Law Reform Commission)	wûn	bêste mediaberjochtjouwing oer in juridyske kwestje	Second Time Around
1987	Prix Aurora	wûn	bêste Ingelsktalige roman	The Wandering Fire
	Casper Award	wûn	bêste spekulative fiksje	The Wandering Fire
1991	World Fantasy Award	nominearre	bêste roman	Tigana
1993	Prix Aurora	wûn	bêste Ingelsktalige roman	A Song for Arbonne
1999	World Fantasy Award	nominearre	bêste roman	Sailing to Sarantium
2001	World Fantasy Award	nominearre	bêste roman	Lord of Emperors
2005	Geffen Award	nominearre	bêste oersetting yn it Hebriuwsk	The Lions of Al-Rassan
	Sunburst Award	nominearre	n.f.t.	The Last Light of the Sun
2007	White Pine Award	twadde plak	n.f.t.	Ysabel
2008	Mythopoeic Award	nominearre	bêste literatuer foar folwoeksenen	Ysabel
	World Fantasy Award	wûn	bêste roman	Ysabel
2011	IMPAC/Dublin Literary Prize	nominearre	n.f.t.	Under Heaven
	Mythopoeic Award	nominearre	bêste literatuer foar folwoeksenen	Under Heaven
	Sunburst Award	wûn	n.f.t.	Under Heaven
	World Fantasy Award	nominearre	bêste roman	Under Heaven

Keppelings om utens

• (in) Offisjele webside fan Guy Gavriel Kay

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.