Robert Loggia

Robert Loggia (wiere namme: Salvatore Loggia; New York, 3 jannewaris 1930 – Los Angeles, 4 desimber 2015) wie in Amerikaansk akteur en regisseur fan Sisyljaansk komôf. Hy waard bekend mei rollen yn films as Scarface, Prizzi's Honor en An Officer and a Gentleman en yn tillefyzjesearjes as Mancuso, FBI en The Sopranos. Loggia waard nominearre foar in Oscar en twa kear foar in Emmy Award, en wûn yn 1988 in Saturn Award.

Robert Loggia
akteur
persoanlike bysûnderheden
echte namme	Salvatore Loggia
nasjonaliteit	Amerikaansk
berne	3 jannewaris 1930
berteplak	New York (New York)
stoarn	4 desimber 2015
stjerplak	Los Angeles (Kalifornje)
etnisiteit	Italjaansk
reg. identiteit	Sisyljaansk
jierren aktyf	1951 – 2015
prizen	Saturn Award 1988
offisjele webside
Robert Loggia yn 'e IMDb

Libben en karriêre

Jonkheid en oplieding

Salvatore Loggia waard yn 1930 berne op Staten Island, in borough fan 'e stêd New York. Hy wie de soan fan 'e skuonmakker Beniamino Loggia, dy't berne wie yn it doarp Palma di Montechiaro, op Sisylje, en dy syn frou Elena Blandino, berne yn Vittoria, ek op Sisylje. Loggia groeide op yn 'e Italjaanske ymmigrantebuert Little Italy, op Manhattan, en wie fan hûs út Italjaansktalich.

Loggia trochrûn de middelbere skoalle oan 'e New Dorp High School, en learde neitiid fierder oan it Wagner Kolleezje. Hy studearre in blaumoandei sjoernalistyk oan 'e Universiteit fan Missoery, mar stapte al rillegau oer nei de Noardwestlike Universiteit, yn Evanston, ûnder de reek fan Chicago, dêr't er ûnder Alvina Krause aktearlessen folge. Letter learde er fierder ûnder Stella Adler oan 'e Actor's Studio, yn New York. Hy ûnderbriek syn stúdzjetiid om yn it Amerikaanske Leger te tsjinjen, dêr't er de rang fan luitenant berikte en wurke as nijslêzer op tillefyzje en radio foar it Southern Command Network yn 'e Panamakanaalsône.

Karriêre

Fan 1951 ôf stie Loggia yn New York op 'e planken, en yn 1955 makke er syn debút op Broadway yn it toanielstik The Man with the Golden Arm. In jier letter hied er syn earste roltsje yn in film, wêrfoar't er lykwols net op 'e ôftiteling fermelden waard. Yn 1958 briek er troch mei syn rol as sheriff Elfego Baca yn 'e Disney-tillefyzjesearje The Nine Lives of Elfego Baca.

Yn 1966 hie Loggia fierders de haadrol yn 'e etektivesearje T.H.E. Cat, oer in ynbrekker dy't sirkusartyst wurden is en yn syn frije tiid misdieden oplost. Doe't dy searje fanwegen ôffallende sjochsifers al rillegau stopset waard, makke Loggia in midlifekrisis troch dy't er letter omskriuwe soe as in "Dante-eske delgong yn 'e hel." Hy rekke al syn selsfertrouwen kwyt en seis jier lang liek syn karriêre oan diggels te lizzen. Syn earste houlik gie der úteinlik oan stikken en hy klaude pas wer by de wâl op doe't er yn 'e kunde kaam mei Audrey O'Brien, dy't letter syn twadde frou wurde soe.

Loggia yn 1966.

Yn 'e 1960-er en 1970-er jierren hie Loggia gastrollen yn û.m. de plysjesearjes The Untouchables, Starsky and Hutch, Columbo, Kojak en Hawaii Five-0, de westernsearjes Gunsmoke, The High Chaparral, The Big Valley en Rawhide, de detektivesearje Ellery Queen, en de aksjesearje Charlie's Angels. Letter wied er ek te sjen yn gastrollen yn 'e westersearje The Little House on the Prairie, de soapsearje Falcon Crest, de detektivesearje Magnum, P.I. en de komeedzjesearjes Dharma & Greg, Frasier en Malcolm in the Middle. Yn 2004 hied er in weromkearende rol yn 'e misdiesearje The Sopranos, yn 'e rol fan 'e gewelddiedige maffioso Feech La Manna. Dêrnjonken wie Loggia ek as tillefyzjeregisseur aktyf, û.m. fan ôfleverings fan 'e detektivesearjes Quincy M.E., Magnum, P.I. en Hart to Hart.

Regisseur Blake Edwards caste Loggia fierders gauris yn byrollen yn syn films, wêrûnder Revenge of the Pink Panther (1978) en S.O.B. (1981). Om dyselde tiid hinne wie Loggia ek te sjen yn 'e slapstickfilm Flatfoot in Egypt, mei Bud Spencer. Ek spile Loggia yn 'e film Mercy Mission: The Rescue of Flight 771 (1983), dy't basearre wie op in wierbard ynsidint mei Air New Zealand-flecht 103. Begjin 1980-er jierren waard er fierders wrâldferneamd mei rollen yn 'e maffiafilms Scarface (1983) en Prizzi's Honor (1985), en as in gewelddiedige sûplap (de heit fan it personaazje fan haadrolspiler Richard Gere) yn An Officer and a Gentleman (1982).

Ek mei syn rol as generaal William Grey, de sjef fan 'e generale stêf fan 'e Amerikaanske Striidkrêften yn 'e science fiction-film Independence Day (1996), krige Loggia in protte bekendheid. Yn 2016 kroep er foar in cameo yn 'e film Independence Day: Resurgence nochris yn 'e hûd fan Grey. Fierders wied er yn 'e 1990-er jierren û.m. te sjen yn 'e science fiction-film Lifepod (1993), de westernfilm Bad Girls (1994) en de aksjefilm I Love Trouble (1994).

Loggia waard yn 1986 nominearre foar in Oscar (de wichtichste Amerikaanske filmpriis) foar syn rol fan 'e gnoarrige privee-detektive Sam Ransom yn 'e skriller Jagged Edge (1985). Yn 1990 folge in nominaasje foar in Emmy Award (de wichtichste Amerikaanske tillefyzjepriis) foar syn rol fan 'e FBI-agint Nick Mancuso yn 'e plysjesearje Mancuso, FBI. Yn 2001 waard Loggia jitris nominearre foar in Emmy foar syn byrol fan pake Victor yn 'e komeedzjesearje Malcolm in the Middle. Fierders wûn er yn 1988 in Saturn Award yn 'e kategory bêste byrol fan in akteur foar syn optreden yn 'e film Big.

Robert Loggia mei syn twadde frou Audrey yn 2012 op it Ynternasjonaal Filmfestival fan Miami.

Mei syn djippe, gnarsende stim krige Loggia ek in protte wurk as stimakteur. Sa wurke er yn 1988 mei oan 'e Disney-tekenfilm Oliver & Company. Letter wied er as stimakteur û.m. belutsen by de produksje fan 'e kompjûterspultsjes FreeSpace 2 (1999), Scarface: The World is Yours (2006) en Grant Theft Auto III (2010), en de tekenfilm The Dog of Flanders (1997). Teffens hied er in weromkearende rol yn 'e tekenfilmsearje Tom Goes to the Mayor (2004-2006).

Priveelibben

Loggia troude yn 1954 mei Marjorie Sloan, mei wa't er trije bern krige: Tracey, John en Kristina. Syn soan waard produksje-ûntwerper, en syn beide dochters aktrise. Troch Loggia syn midlifekrisis rekke syn houlik mei Sloan yn 'e twadde helte fan 'e 1960-er jierren yn 'e swierrichheden, en dat kaam nea wer goed. Uteinlik skieden se yn 1981. It jiers dêrop wertroude Loggia mei de sakefrou Audrey O'Brien, dy't in dochter út in eardere relaasje hie, Cynthia Marlette. Dyselde waard sadwaande Loggia syn styfdochter. Loggia en O'Brien bleaune oant syn ferstjerren byinoar.

Op 17 desimber 2011 ûntfong Loggia in earedoktoraat fan 'e Universiteit fan Missoery, dêr't er as jongeman oan studearre hie.

Ferstjerren

Yn 2010 waard by Loggia de sykte fan Alzheimer fêststeld. Likegoed gied er suver oan syn dea ta troch mei aktearjen. Hy ferstoar op 4 desimber 2015 yn syn hûs yn 'e Los Anzjelynske wyk Brentwood, oan komplikaasjes feroarsake troch syn krupsje. Robert Loggia waard 85 jier.

Filmografy

Filmografy as akteur
jier	titel	rol of funksje	opmerkings
films
1956	Somebody Up There Likes Me	Frankie Peppo	net fermeld op 'e ôftiteling
1957	The Garment Jungle	Tulio Renata
1958	Cop Hater	resjersjeur Steve Carelli
1958	The Lost Missile	dr. David Loring
1963	Cattle King	Johnny Quatro
1965	The Greatest Story Ever Told	Joazef fan Nazaret
1966	The Three Sisters	Solyony
1966	Elfego Baca: Six Gun Law	Elfego Baca
1969	Che!	Faustino Morales
1974	Two Missionaries	Marches Gonzaga
1977	Speedtrap	Spillano
1977	First Love	John March
1978	Revenge of the Pink Panther	Al Marchione
1980	The Ninth Configuration	luitenant Bennish
1980	Flatfoot in Egypt	Edward Burns
1981	S.O.B.	Herb Maskowitz
1982	An Officer and a Gentleman	Byron Mayo
1982	Trail of the Pink Panther	Bruno Langois
1983	Psycho II	dokter Bill Raymond
1983	Curse of the Pink Panther	Bruno Langois
1983	Scarface	Frank López
1985	Prizzi's Honor	Eduardo Prizzi
1985	Jagged Edge	Sam Ransom	nom. Oscar foar bêste byrol fan in akteur
1986	Armed and Dangerous	Michael Carlino
1986	That's Life!	pastoar Baragone
1987	Over the Top	Jason Cutler
1987	Hot Pursuit	"Mac" MacClaren
1987	The Believers	ynspekteur Sean McTaggert
1987	Gaby: A True Story	Michel Brimmer
1987	Amazon Women on the Moon	generaal McCormick	net fermeld op 'e ôftiteling; segmint The Unknown Soldier
1988	Big	MacMillan	Saturn Award foar bêste byrol fan in akteur
1988	Oliver & Company	Sykes	as stimakteur
1989	Relentless	Bill Malloy
1989	Triumph of the Spirit	pastoar Arouch
1990	Opportunity Knocks	Milt Malkin
1991	The Marrying Man	Lew Horner
1991	Necessary Roughness	coach Wally Rig
1992	Gladiator	"Pappy" Jack
1992	Innocent Blood	Sallie "The Shark" Macelli
1992	Spies Inc.	Mac
1993	Lifepod	direkteur Banks
1994	Bad Girls	Frank Jarrett
1994	The Last Tattoo	kaptein-luitenant-op-see Conrad Dart
1994	I Love Trouble	Matt Greenfield
1995	Coldblooded	Gordon
1995	Man with a Gun	Philip Marquand
1996	Independence Day	generaal William Grey
1997	Lost Highway	Dick Laurent / Eddy
1997	Smilla's Sense of Snow	Moritz Jasperson
1997	The Dog of Flanders	pake Jehan	oarspronklike Japanske titel: Furandāsu no Inu; stimakteur yn 'e Ingelske neisyngronisearring
1997	The Don's Analyst	don Vito Leoni
1998	Wide Awake	pake Beal
1988	The Proposition	Hannibal Thurman
1988	Holy Man	John McBainbridge
1988	Hard Time	Connie Martin
1999	The Suburbans	Jules
1999	Flypaper	Marvin
1999	American Virgin	Ronny
2000	Return to Me	Angelo Pardipillo
2001	Dodson's Journey	Opti Dodson
2001	The Shipment	Frank Colucci
2001	All Over Again	Zack
2005	The Deal	Jared Tolson
2006	Funny Money	Feldman
2006	Rain	Jake Marvin
2006	Forget About It	Carl Campobasso
2006	Wild Seven	Mackey Willis
2008	The Boneyard Collection	?
2008	The Least Of These	pastoar William Jennings
2009	Shrink	dokter Robert Carter
2010	Harvest	Siv
2010	Obituary of the Sun	Samuel Levine
2011	Fake	Seamus White
2011	The Grand Theft	generaal McAvoy
2011	The Great Fight	dr. Salvatore Reno
2011	The Life Zone	John Lation / Satan
2012	Apostle Peter and the Last Supper	de apostel Petrus
2012	Tim and Eric's Billion Dollar Movie	Tommy Schlaaang
2012	The Diary of Preston Plummer	John Percy
2012	Margarine Wars	pake Griswold
2013	Real Gangsters	Tanno
2014	Snapshot	Paul Grady
2014	Scavenger Killers	dokter Montgomery
2014	An Evergreen Christmas	Pops
2014	The Big Fat Stone	pastoar Walter
2015	Bleeding Hearts	sheriff Wilson
2015	No Deposit	Sydney Fischer
2015	Sicilian Vampire	Santino Trafficante sr.
2016	Independence Day: Resurgence	generaal William Grey	cameo; postúm útbrocht
2016	The Red Maple Leaf	Patrick Adams sr.	postúm útbrocht
2017	Cries of the Unborn	Lation	postúm útbrocht
2019	The Savant	dokter Salvatore Reno	postúm útbrocht
tillefyzje
1959	Wagon Train	José Maria Moran	gastrol; ôfl. The Jose Maria Moran Story
1959	Alcoa Presents: One Step Beyond	Tom Grant	gastrol; ôfl. The Hand
1962	The Untouchables	Leo Mencken	gastrol; ôfl. Takeover
1963	Alfred Hitchcock Presents	sjauffeur	gastrol; ôfl. You'll Be the Death of Me
1965	Combat!	Etienne	gastrol; ôfl. The Tree of Moray
1965	Gunsmoke	luitenant Cal Tripp	gastrol; ôfl. Chief Joseph
1965	The Wild Wild West	Warren Trevor	gastrol; ôfl. The Night of Sudden Death
1966–1967	T.H.E. Cat	Thomas Hewitt Edward Cat	fêste rol; 26 ôfl.
1968	The Big Valley	Vern Hickson	gastrol; ôfl. The Profit and the Lost
1968	The High Chaparral	Chio	gastrol; ôfl. The Deceivers
1974	Cannon	?	gastrol; 1 ôfl.
1974	Mannix	ynspekteur Varga	gastrol; ôfl. Bird of Prey
1975	Starsky & Hutch	Ben Forest	gastrol; ôfl. The Fix
1975	S.W.A.T.	Joe Stevens	gastrol; ôfl. Hit Men
1976	Cannon	?	gastrol; 1 ôfl.
1976	Columbo	Harry	gastrol; ôfl. Now You See Me
1976	The Moneychangers	Tony "Tony Bear"	weromkearende rol; 2 ôfl.
1976–1977	The Rockford Files	Manny Arturis	weromkearende rol; 2
1976	Wonder Woman	Hans Eichler	gastrol; ôfl. Wonder Woman vs Gargantua
1976	Street Killing	Louis Spillane	tillefyzjefilm
1977	Raid on Entebbe	Yigal Allon	tillefyzjefilm
1978	The Rockford Files	Russell Nevitt	gastrol; ôfl. Rosendahl and Gilda Stern Are Dead
1980–1986	Magnum, P.I.	Philippe Trusseau	weromkearende rol; 3 ôfl.
1981	Fantasy Island	Porter Brockhill	gastrol; ôfl. The Heroine/The Warrior
1982	A Woman Called Golda	presidint Anwar Sadat fan Egypte	minysearje
1982	Little House on the Prairie	Thomas Stark	gastrol; ôfl. Rage
1983–1984	Emerald Point N.A.S.	Yuri Bukharin	fêste rol; 16 ôfl.
1987	Echoes in the Darkness	Jay Smith	weromkearende rol; 2 ôfl.
1987	Conspiracy: The Trial of the Chicago 8	William Kunstler	tillefyzjefilm
1988	Favorite Son	Nick Mancuso	gastrol; ôfl. Part One
1989–1990	Mancuso, F.B.I.	FBI-agint Nick Mancuso	fêste rol; 20 ôfl. nom. Emmy Award foar bêste akteur yn in dramasearje
1991	Sunday Dinner	Ben Benedict	minysearje; 6 ôfl.
1993	Wild Palms	senator Anton Kreutzer	minysearje; 5 ôfl.
1993	Mercy Mission: the Rescue of Flight 771	Gordon Vette	tillefyzjefilm
1994	Picture Windows	Merce	gastrol; ôfl. Armed Response
1996	The Right to Remain Silent	ynspekteur Mike Brosloe	tillefyzjefilm
1996	Mistrial	kaptein Lou Unger	tillefyzjefilm
1999	Joan of Arc	pastoar Monet	minysearje; 2 ôfl.
2000	Dharma & Greg	generaal Kirby	gastrol; ôfl. Hell No, Greg Can't Go
2000	Malcolm in the Middle	pake Victor	gastrol; ôfl. The Grandparents nom. Emmy Award foar bêste gastrol fan in akteur yn in komeedzjesearje
2000	Frasier	Stefano	gastrol; ôfl. The Three Faces of Frasier
2000	The Outer Limits	rjochter Earl Clayton	gastrol; ôfl. Final Appeal
2000	Touched by an Angel	Chandler Crowne	gastrol; ôfl. Restoration
2003	Queens Supreme	rjochter Thomas O'Neill	fêste rol; 13 ôfl.
2004	The Sopranos	Feech La Manna	weromkearende rol; 4 ôfl.
2006	Tom Goes to the Mayor	Lew Petersen	as stimakteur; gastrol; ôfl. Saxman
2008	Monk	Louie Flynn	gastrol; ôfl. Mr. Monk Takes a Punch
2010	Hawaii Five-0	boatsman 1e klasse Ed McKay	gastrol; ôfl. Ho'apano
2010–2011	Men of a Certain Age	Artie	weromkearende rol; 3 ôfl.
2011–2013	Family Guy	himsels	live-action cameo; weromkearende rol; 2 ôfl.
fideospultsjes
1999	Freespace 2	admiraal Petrarch	as stimakteur
2001	Grand Theft Auto III	Ray Machowski	as stimakteur
2006	Scarface: The World Is Yours	ferteller / boarger	as stimakteur

Keppelings om utens

• (in) Folsleine filmografy fan Robert Loggia yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Robert Loggia fan Wikimedia Commons.