Lucasfilm

Lucasfilm, eins Lucasfilm Ltd. LLC, is in Amerikaanske filmstudio en tillefyzjestudio dy't yn 1971 oprjochte waard troch filmmakker George Lucas en dy't nei him ferneamd is. It haadkantoar is fêstige yn San Francisco. Lucasfilm is it bekendst fan 'e Star Wars- en Indiana Jones-mediafranchises. Fia syn difyzje Industrial Light & Magic (ILM) is it bedriuw ek in pionier op it mêd fan special effects. Lucasfilm wie in selsstannige ûndernimming oant it yn 2012 foar de priis fan krapoan $6 miljard oernommen waard troch The Walt Disney Company. Sûnt makket it diel út fan 'e difyzje Walt Disney Studios.

Lucasfilm
algemien
nasjonaliteit	Amerikaansk
type	privaat
sektor	filmstudio, tillefyzjestudio
haadkertier	San Francisco (Kalifornje)
oprjochte	1971
oprjochter	George Lucas
mem	Walt Disney Studios
dochters	● Industrial Light & Magic ● Skywalker Sound ● Lucasfilm Games ● Lucasfilm Animation
sifers
aktyf yn	de Feriene Steaten
wurknimmers	2.000 (2015)
tal lokaasjes	6
offisjele webside
www.lucasfilm.com

Skiednis

Lucasfilm waard yn 1971 oprjochte troch de Amerikaanske filmmakker George Lucas en krige op 12 septimber 1977 syn hjoeddeistige bedriuwsfoarm as Lucasfilm Ltd. Mids 1970-er jierren wie it bedriuw fêstige yn in pakhûs yn 'e Los Angelynske wyk Van Nuys, dat Lucas hierde fan Universal Films. De earste film dy't Lucasfilm produsearre wie American Graffiti yn 1973. Dêr wie in budget fan $777.000 foar beskikber, en de film brocht $140 miljoen op. Lucasfilm waard wrâldferneamd mei de science fiction-film Star Wars, út 1977, dy't letter mei weromwurkjende krêft omneamd waard ta Star Wars: Episode IV – A New Hope. Dy brocht $775,8 miljoen op tsjin in budget fan $11 miljoen, en wûn sân Oscars en in Golden Globe.

George Lucas, de oprjochter fan Lucasfilm, yn 1986.

Lucas rjochte datselde jiers de Star Wars Corporation, Inc. op as in earste dochterûndernimming fan Lucasfilm, om 'e ferskate juridyske en finansjele aspekten fan Star Wars te behearen, wêrûnder de rjochten op it meitsjen fan ferfolchfilms en de lisinsjerjochten foar merchandising. Yn 1978 naam er fêstgoedspesjalist Charles Weber yn 'e earm om Lucasfilm foar him te bestjoeren, sadat er him sels mear talizze koe op it meitsjen fan films. Weber gie lykwols mei de studio in hiel oare kant út as Lucas woe: it management woeks yn grutte oan, wylst der minder jild en oandacht nei de eigentlik produksje fan films gie. Dêrop ûntsloech Lucas yn 1980 Weber en de helte fan 'e ûnderwilens 100 wurknimmers. Datselde jiers gie de Star Wars Corporation wer yn Lucasfilm op.

Yn 1980 kaam Star Wars: Episode V – The Empire Strikes Back út, it twadde diel fan 'e oarspronklike Star Wars-trilogy. Yn 1983 folge it trêde diel, Star Wars: Episode VI – Return of the Jedi. Dêrnei besleat Lucas om ôf te sjen fan fierdere Star Wars-films, mei't de stress fan it beävensearjen fan sokke grutte projekten in negative ynfloed op syn sûnens hie. Tusken 1981 en 1989 kamen de earste trije Indiana Jones-films út. Oare grutte films dy't Lucasfilm yn 'e 1980-er jierren produsearre, wiene Labyrinth, fan poppespiler Jim Henson, en Howard the Duck, fan Marvel Comics, beide yn 1986, en de fantasyfilm Willow, yn 1988.

Yn 'e iere 1990-er jierren besleat Lucas om dochs wer mei Star Wars fierder te gean, mei't de foarútgong op it mêd fan special effects it meitsjen fan 'e films sa't se him foar eagen stiene, mooglik makke hie. Hy begûn mei it folslein remasterjen fan 'e trije dielen fan 'e oarspronklike trilogy, dy't yn 1997 op 'e nij útbrocht waarden. Dêrnei gied er fierder mei de Star Wars-prequeltrilogy, wêrfan't it earste diel, Star Wars: Episode I – The Phantom Menace, yn 1999 útkaam. De beide oare film folgen yn 2002 en 2005. Hoewol't Lucas oarspronklik in "trilogy fan trilogyen" foar eagen stien hie, besleat er der nei de sechsde film op 'e nij mei op te hâlden. Ynstee makke er in fjirde Indiana Jones-film en, fia dochterûndernimming Lucasfilm Animation, in lange tekenfilm oer Star Wars, dy't allebeide yn 2008 yn 'e bioskoop kamen. Underwilens wiene yn 'e 1980-er jierren en yn 'e 2000-er jierren ek ferskate tekenfilmsearjes yn it ramt fan Star Wars produsearre.

It haadkantoar fan Lucasfilm yn it Letterman Digital Arts Center te San Francisco.

Yn jannewaris 2012 makke Lucasfilm bekend dat Lucas foargoed opholden wie mei it meitsjen fan grutte filmprojekten, en dat er him tenei allinnich noch mar dwaande hâlde soe mei lytse ûnôfhinklike films. Kathleen Kennedy, dy't jierrenlang mei Lucas syn freon Steven Spielberg gearwurke hie en ek as filmprodusinte fan 'e Indiana Jones-films fungearre hie, naam it wurk fan Lucas foar in grut part oer. Hja soene teminsten ien jier mei syn beiden as algemien direkteur fan Lucasfilm oparbeidzje, wêrnei't Lucas ôftrede en Kennedy him opfolgje soe. Dat krige yn juny 2013 syn beslach. Op 8 july 2012 waard it haadkantoar fan Lucasfilm ferhuze nei it nije Letterman Digital Arts Center yn it Presidio fan San Francisco. (Lucas hie eins fan doel west om al syn bedriuwen gear te bringen troch in útwreiding fan syn Skywalker Ranch op it plattelân fan Marin County, deunby San Francisco, mar seach dêrfan ôf nei't syn buorlju har dêrtsjin oankanten.)

Yn maaie 2011 knope Lucasfilm mei The Walt Disney Company ferkennende besprekkings oan oer de mooglikheid fan in oername fan 'e filmstudio troch Disney. Dat barde nei't Lucas in ynformeel petear hân hie mei Bob Iger, de algemien direkteur fan Disney, dy't er troffen hie by de iepening fan Star Tours, in attraksje mei in Star Wars-tema yn ferdivedaasjepark Disneyland. Dêrby hied er ferteld dat er neitocht oer syn pinsjonearring. Op 30 oktober 2012 waard bekendmakke dat Lucasfilm en Disney ta oerienstimming kommen wiene: Disney soe Lucasfilm keapje foar $4.050.000 yn kontanten en nochris $1.855.000 yn oandielen. Mei de oername krige Disney Star Wars en Indiana Jones yn 'e hannen, twa fan 'e lukratyfste mediafranchises út 'e filmskiednis. Kathleen Kennedy gie mei oer nei Disney en bleau oan it haad te stean fan Lucasfilm, dat no in dochterûndernimming waard, dy't ûnderbrocht waard by de difyzje Walt Disney Studios.

Under it bewâld fan Disney waard daliks úteinset mei de produksje fan nije Star Wars-films, wat resultearre yn 'e Star Wars-ferfolchtrilogy en ferskate op harsels steande films. Ek waarden der nije tekenfilmsearjes yn it ramt fan Star Wars produsearre en yn 2019 waarden de earste ôfleverings fan The Mandalorian, de earste live-actiontillefyzjesearje fan Star Wars, publisearre fia Disney+, de eigen streamingtsjinst fan Disney.

Bedriuwsopbou

• Lucasfilm
  • Industrial Light & Magic (ILM) – special effects
    • ILM Londen
    • ILM Sydney
    • ILM Singapoer
    • ILM Vancouver
    • ILMxLAB
  • Lucasfilm Animation – tekenfilms en tekenfilmsearjes
  • Lucasfilm Games – fideospultsjes
  • Lucas Licensing – lisinsjeferliening en merchandising
    • Lucas Books – ymprint fan Del Rey Books ûnder lisinsje fan Lucasfilm
  • Lucasfilm Story Group – ûntwikkeling en preproduksje
  • Skywalker Sound – lûdsmixing yn postproduksje

Films

Spylfilms

• American Graffiti (1973)
• Star Wars: Episode IV – A New Hope (1977)
• More American Graffiti (1979)
• Star Wars: Episode V – The Empire Strikes Back (1980)
• Indiana Jones and the Raiders of the Lost Ark (1981)
• Star Wars: Episode VI – Return of the Jedi (1983)
• Twice Upon a Time (1983)
• Indiana Jones and the Temple of Doom (1984)
• Latino (1985)
• Mishima: A Life in Four Chapters (1985)
• Labyrinth (1986)
• Howard the Duck (1986)
• Willow (1988)
• Tucker: The Man and His Dream (1988)
• The Land Before Time (1988)

• Indiana Jones and the Last Crusade (1989)
• Radioland Murders (1994)
• Star Wars: Episode I – The Phantom Menace (1999)
• Star Wars: Episode II – Attack of the Clones (2002)
• Star Wars: Episode III – Revenge of the Sith (2005)
• Indiana Jones and the Kingdom of the Crystal Skull (2008)
• Star Wars: The Clone Wars (2008)
• Red Tails (2012)
• Strange Magic (2015)
• Star Wars: Episode VII – The Force Awakens (2015)
• Rogue One: A Star Wars Story (2016)
• Star Wars: Episode VIII – The Last Jedi (2017)
• Solo: A Star Wars Story (2018)
• Star Wars: Episode IX – The Rise of Skywalker (2019)

Tillefyzjefilms

• Star Wars Holiday Special (1978)
• Caravan of Courage: An Ewok Adventure (1984)
• Ewoks: The Battle for Endor (1985)
• The Great Heep (1986)
• Defenders of Dynatron City (1992)
• The Adventures of Young Indiana Jones: Hollywood Follies (1994)
• The Adventures of Young Indiana Jones: Treasure of the Peacock's Eye (1995)
• The Adventures of Young Indiana Jones: Attack of the Hawkmen (1995)

• The Adventures of Young Indiana Jones: Travels with Fathers (1996)
• Robot Chicken: Star Wars (2007)
• Robot Chicken: Star Wars Episode II (2008)
• Robot Chicken: Star Wars Episode III (2010)
• The Lego Star Wars Holiday Special (2020)
• Lego Star Wars: Terrifying Tales (2021)
• Lego Star Wars: Summer Vacation (2022)
• Star Wars: A Droid Story (202?)

Dokumintêres

• The Making of "Star Wars" (1977)
• SP FX: The Empire Strikes Back (1980)
• The Making of "Raiders of the Lost Ark" (1981)
• Classic Creatures: Return of the Jedi (1983)
• From "Star Wars" to "Jedi": The Making of a Saga (1983)
• The Making of "Indiana Jones and the Temple of Doom" (1985)
• The Making of "Captain Eo" (1986)
• R2-D2: Beneath the Dome (2001)
• Star Wars at 30 (2007)
• Star Wars: The Legacy Revealed (2007)
• Star Wars Tech (2007)
• Indiana Jones and the Ultimate Quest (2008)
• Star Wars: The Clone Wars Preview Special (2008)

• The Star Wars Comic Con '09 Spectacular (2009)
• The Making of Star Wars: In Concert (2009)
• Double Victory: The Tuskegee Airmen at War (2012)
• Transmission CVI: August 23, 2012 (2012)
• Star Wars: The Force Awakens World Premiere Red Carpet (2015)
• Daisy Ridley Exclusive Q&A (2016)
• Rogue One: A Star Wars Story – World Premiere (2016)
• Live from the Red Carpet of Star Wars: The Last Jedi (2017)
• Live from the Red Carpet of Solo: A Star Wars Story (2018)
• Come Behind the Scenes of "Star Wars: The Rise of Skywalker" (2019)
• The Skywalker Legacy (2020)
• More than Robots (2022)
• Disney Gallery: The Book of Boba Fett (2022)

Tillefyzjesearjes

Tekenfilmsearjes

• Star Wars: Droids (1985-1986)
• Ewoks (1985-1986)
• Star Wars: Clone Wars (2003-2005)
• Star Wars: The Clone Wars (2008-2014 en 2020)
• Lego Star Wars: The Yoda Chronicles (2013-2014)
• Star Wars: Rebels (2014-2018)
• Lego Star Wars: Droid Tales (2015)
• Lego Star Wars: The Resistance Rises (2016)
• Lego Star Wars: The Freemaker Adventures (2016-2017)
• Star Wars: Blips (2017)

• Star Wars: Forces of Destiny (2017-2018)
• Lego Star Wars: All-Stars (2018)
• Star Wars: Galaxy of Adventures (2018-2020)
• Star Wars: Resistance (2018-2020)
• Star Wars: Roll Out (2019-2020)
• Star Wars: Galaxy of Creatures (2021)
• Star Wars: Visions (2021)
• Star Wars: The Bad Batch (2021-20??)
• Star Wars: Galactic Pals (2022)
• Star Wars: Tales of the Jedi (2022)

Live-actiontillefyzjesearjes

• Maniac Mansion (1990-1993)
• The Young Indiana Jones Chronicles (1992-1993)
• The Mandalorian (2019-20??)
• The Book of Boba Fett (2021-20??)
• Obi-Wan Kenobi (2022)
• Andor (2022-2024)

• Willow (2022-20??)
• Ahsoka (2023-20??)
• Star Wars: Skeleton Crew (2023-20??)
• The Acolyte (20??-20??)
• Lando (20??-20??)
• Rangers of the New Republic (20??-20??)

Keppelings om utens

• (in) Offisjele webside fan Lucasfilm

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: Notes en References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Lucasfilm fan Wikimedia Commons.