Belgorod (oblast)

De oblast Belgorod (Russysk: Белгородская область, Belgorodskaja oblast) is in bestjoerlike ienheid yn 'e Russyske Federaasje.

Belgorod oblast Белгородская область
flagge	wapen
polityk
soarte gebiet	Oblast
lân	Ruslân
federaal distrikt	Sintraal
ekonomyske regio	Sintraal-Tsjernozjom
haadplak	Belgorod
grutste plak	Belgorod
taal	Russysk
Etnyske groepen	Russen (91,66  %), Oekraïners (2,73 %) (stân: 2010)
sifers
ynwennertal	1.531.917 (2022)
oerflak	27.134 km²
befolkingstichtens	56,46 ynw. / km²
oar
stifting	1954
tiidsône	UTC +3
koördinaten	50° 46' N 37° 27' E
webside	www.belregion.ru

Belgorod is it bestjoerlike sintrum fan de oblast. De stêd leit sa'n 70 kilometer fan de Oekraynske stêd Charkov. Oare grutte plakken binne Stary Oskol en Gûbkin.

Geografy

De oblast leit oan de grins mei de Oekraïne, op sa'n 500 oant 700 kilometer súdlik fan Moskou. Fan noard nei súd is de oblast maksimaal 190 kilometer lang en fan west nei east likernôch 270 kilometer. Yn it noarden grinzget de oblast oan de oblast Koersk, yn it easten oan de oblast Voronezj en yn it westen en suden oan de 540 kilometer lange grins mei de Oekraïne.

Natoerreservaat Belogorje (dielgebiet Stenki-Izgorja)

Geologysk leit de oblast oan de súdlike râne fan it Sintraal-Russysk Plato. It gebiet leit yn de rivierbekkens fan de Don en de Dnjepr. Meiïnoar hat de oblast likernôch 480 gruttere of lytsere rivieren. It grutste diel fan it gebiet bestiet út bosk en greide, fral it súdlike diel bestiet út greide en steppe. Fan de sûchdieren dy't der foarkomme kinne swinen, reeën, elanden, hazzen, foksen, marters, murden en wolven. It natoerreservaat Belogorje (Белогорье) bestiet út ferskillende aparte dielen en lânskipstypes tichteby de grins mei de Oekraïne. Yn it gebiet komme in soad seldsume fûgels foar. De boaiem bestiet foar trijefearnspart út de fruchtbere swarte ierde.

Yn de oblast wurde izererts, bauksyt, apatyt, kalk, klaai, goud, grafyt en oare metalen fûn.

It klimaat is tuskenbeide kontinintaal mei relatyf sêfte winters en lange simmers. De oblast hat trochsnit temperatueren yn jannewaris fan −8 °S oant yn july likernôch 20 °S. It froastfrije tiidrek is 155 oant 160 dagen lang. Yn it jier falt alle jierren 540 oant 550 mm delslach, it easten is lykwols trochstrings droeger.

Skiednis

Yn de 8e iuw libben yn it gebiet de Alanen, dy't opfolge waarden troch de Chazaren. De earste Slaven kamen út it noarden en setten harren yn 'e twadde helte fan it earste millenium yn 'e oblast nei wenjen. Yn de tiid fan de Kiëvske Rûs foarme it gebiet ûnderdiel fan it Foarstedom Tsjernigov. De Mongoalske ynvaazje brocht ek yn dit gebiet terreur. Yn dy tiid gyng it gebiet oer yn it besit fan it sterk nei it easten útwreidzjende Gruthartochdom Litouwen, mar sûnt 1500 hearde it gebiet by it Grutfoarstedom Moskou en foarme it de súdlike liny tsjin de Krimtataren, dy't fral troch de Kozakken ferdigene waard.

Kriichsmonumint Prochorovka

Troch de ekspânsje fan Ruslân ferlear de ferdigeningsliny oan betsjutting.

Sûnt 1708 wie it gebiet ûnderdiel fan it gûvernemint Kiëv en it gûvernemint Azov. Yn 1727 waard it gûvernemint Belgorod út dielen fan it Kiëvske gûvernemint stifte. It wie doe folle grutter as de hjoeddeiske oblast Belgorod. Yn dy tiid hie it nije gûvernemint Belgorod mear as ien miljoen ynwenners mei stêden as Koersk, Orjol, Brjansk en Valûjki. Tusken 1775 en 1776 waard de oblast opdield. It gebiet om Belgorod hinne waard diel fan it gûvernemint Koersk. Tusken 1917 en 1919 hearde it gebiet fan de tsjintwurdige oblast by de Oekraynske Sosjalistyske Sovjetrepublyk.

Yn de twadde helte fan de 19e iuw begûn de yndustrialisaasje en de oanlis fan it spoar.

Yn de Twadde Wrâldkriich waard der slim fochten yn Belgorod yn omkriten. By de Slach om Koersk wiene der by Prochorovka swiere tankgefjochten.

Yn 1954 waard de oblast Belgorod út de oblasten Koersk en Voronezj stifte.

Bestjoerlike yndieling en stêden

De oblast is ûnderferdield yn de trije stedsdistrikten Belgorod, Gûbkin en Stary Oskol en 19 rajons. Der binne meiïnoar alve stêden yn de oblast en 18 plakken mei in stedsk karakter.

Grutste stêden

Namme	Russysk	Ynwenners (2022)	Wapen	Lokaasje
Belgorod	Белгород	391.804 (2022)		50° 36' N 36° 36' E
Stary Oskol	Старый Оскол	223.921 (2020)		51° 17' N 37° 50' E
Gûbkin	Губкин	86.229		51° 17' N 37° 33' E
Sjebekino	Шебекино	40.870		50° 24' N 36° 53' E
Aleksejevka	Алексеевка	37.811		50° 37' N 38° 41' E
Valûjki	Валуйки	34.159		50° 11' N 38° 07' E
Stroitel	Строитель	24.104	Gjin	50° 47' N 36° 29' E

Befolkingsferrin

Jier	1926	1939	1959	1970	1979	1989	2002	2022
Ynwenners	563.240	1.440.000	1.226.328	1.261.140	1.308.231	1.378.287	1.511.620	1.531.917

Boarnen, noaten en referinsjes

Boarnen, noaten en/as referinsjes:

Dizze side is alhiel of foar in part in oersetting fan de Dútsktalige Wikipedyside; sjoch foar de bewurkingsskiednis: de:Oblast Archangelsk Commons Wikimedia Commons  Ofbylden dy't by dit ûnderwerp hearre, binne te finen yn de kategory Oblast Belgorod fan Wikimedia Commons.