Sondel

Sondel Provinsje Fryslân Gemeente De Fryske Marren Ynwenners (2021) 400 (2021) Koördinaten 52°52'16.5"N 5°35'54.5"E Netnûmer 0514 Postkoade 8565 Webstee sondel.nl

Sondel is in doarp yn de gemeente De Fryske Marren, east fan de bosken. Oant 2014 lei it yn 'e gemeente Gaasterlân-Sleat. It doarp hat in lytse 400 ynwenners.

Oan de súdkant fan Sondel lizze de grutte landerijen dy't grinzje oan de seedyk dêr’t de Iselmar efter leit. West fan Sondel lizze de Gaasterlânske bosken, besuden leit it natoergebiet "de Leien".

Skiednis

Pleats Jacobus Boomsmastrjitte 5

It doarp Sondel is tusken 1200 en 1300 ûntstien en ûntlient syn namme oan in sânich plak by in boskje. Yn âlde geskriften wurdt it ek Sendel, Senderaland, Sindel, Syndel, Sonderaland, Sundel en Sûndel neamd. Yn 1429 hat der in fjildslach west by Sondel tusken Skieringers en Fetkeapers. Yn Sondel stie it ferneamde slot Beuckenswyk. Hjoed-de-dei stiet op it stee in pleats mei twa grutte wapenstiennen út de foarige iuwen.

Yn de Twadde Wrâldoarloch wie dêr in Dútsk barakkekamp mei ôflúster- en radarapparatuer en twa militêre stellingen.

Mienskip

It doarp hat in feriening foar Doarpsbelang dy't har gearkomsten hat yn it doarpshûs. Sûnt 2004 is der in feestkommisje. Fjouwer kear yn 't jier ferskynt it boekje "Praat". De basisskoalle, dy't "Op 'e Terp" hjitte, is yn 2020 sletten. Der is in pjutteboarterplak, "Hummelterp".

Tsjerke

PKN-tsjerke De Haven

De Wikipedy hat ek in side De Haven (Sondel).

De Haven is de eardere herfoarme tsjerke fan Sondel. Sûnt 2007 is it ien fan de trije tsjerken fan de PKN-Aldemardum-Nijemardum-Sondel. De tsjerke datearret út de 19e iuw en ferfong in âlder tsjerkegebou. De skiednis fan de tsjerke giet werom op in foarse tsjerke út de 12e of 13e iuw, dy't oan de apostel Andréas wijd wie.

Ferienings

Pleats Beuckenswykstrjitte 8

• Bilsjongers - koar
• De Tsjasker - toulûken

Befolkingsferrin

Jier	1954	1959	1964	1969	1973	2004	2021
Ynwenners	382	488	466	284	249	390	400

Eveneminten

De Sondeler Bil is in middenstânsbeurs foar de Súdwesthoeke dy't om de twa jier yn Sondel holden wurdt.

Ferskaat

• Oan de Noarderreed, tichteby de Bremer Wyldernis, is in selspluktún.

Iepenbier ferfier

• Busline 44 (Connexxion): Boalsert - Tsjerkwert - Parregea - Warkum - Hylpen - Bakhuzen - Murns - Riis - Aldemardum - Nijemardum - Sondel - Wikel - Sleat - Tsjerkgaast - Spannenburch vv.
• Busline 47: Snits - Jutryp - De Hommerts - Wâldsein - Ypekolsgea - Harich - Balk - Sondel - De Lemmer.

Strjitten

Beamkamp, Beuckenswykstrjitte, Delbuersterwei, It Gaastdyk, J Boomsmastrjitte, Krúspaad, Noarderreed, Sondelerdyk, Sondelerleane, Swaaigat.

Berne yn Sondel

• Pieter Boomsma (1941), predikant
• Jacobus Q. Smink (1954), skriuwer en ûnderwizer

Sjoch ek

• Fryske doarpen
• Slach by Sondel.

Boarnen, noaten en referinsjes

Boarnen, noaten en/as referinsjes:

Webstee Sondel digitaal Commons Wikimedia Commons  Ofbylden dy't by dit ûnderwerp hearre, binne te finen yn de kategory Sondel fan Wikimedia Commons.