Haadmenu iepenje
Jouswier
Flagge fan Jouswier Wapen fan Jouswier
Flagge Wapen
Lokaasje fan Jouswier
Gemeente Noardeast-Fryslân
Ynwennertal (2004) 52
Webstee
Jouswier mei de tsjerke en Súd Ie op'e foargrûn
Eardere buorkerij yn Jouswier

Jouswier is in lyts terpdoarp dat sûnt 2019 yn de gemeente Noardeast-Fryslân leit, dêrfoar lei it yn de gemeente Dongeradiel. Jouswier leit wat fansiden de wei fan Ie nei Mitselwier, oan de N358. Dy dyk roan eartiids oer de Reidswâl en hie by Jouswier in heakske bocht. Yn 1949 waard útein set mei it rjochtlûken fan dy wei en kaam der in nije brêge oer de Súdie: de Kowebrêge (yn de folksmûle: Nije Brêge)[1]

Oant de gemeentlike weryndieling yn 1984 makke Jouswier diel út fan de gemeente East-Dongeradiel.

Alear hie it doarp trije states: Eernsmastate, Winiastate en Jangastate. Se wienen yn 1800 al ôfbrutsen. It doarp hie eartiids mar 6 stimmen.

NammeBewurkje

Jouswier waard yn 1495 fernijd as Juusweer; letter ek as Jwsweer (1511), Juyswier (1543), Ionswie (1588) en Iuswier (1622). De namme soe sokssawat as 'wierde fan Juw' betsjutte kinne.

De tsjerkeBewurkje

  De Wikipedy hat ek in side Petrustsjerke (Jouswier).
 
De tsjerke augustus 1972

It pronkstik fan Jouswier is de tsjerke. De tsjerke wie wijd oan St. Petrus. De bou fan de tsjinwurdige tsjerke wie yn 1557. Yn 'e rin fan 'e tiid is er faak ferboud. Yn 1978 hat der in restauraasje plak fûn en is de bepleistering fuorthelle. De tsjerke stiet der no wer yn syn âlde gloarje.

De tsjerke is oerdroegen oan de Stifting Alde Fryske Tsjerken.

De tsjerke hat gjin elektryske ferljochting. Op de banken steane bleakers en der hingje kearsekroanen.

Opfallend binne de trije roubuorden foar de Bergsma's. De Bergsma's hawwe as wapen trije bargen. Dêrtroch wurdt de tsjerke ek wol de "Bargetsjerke" neamd.

De toerBewurkje

It bintwurk fan de toer is fernijd yn 1752. Hy hat in sealdaktoer en der hinget in klok út 1395 yn, getten troch Hermanus. Yn 1915 is de toer opklampe mei nije bakstien, útsein de eastlike muorre dy't bepleistere waard.

De Bergsma'sBewurkje

De Bergsma's stamme ôf fan Pyter Arriens (1668- om 1735 hinne). Bergsma urf fan syn beppe de state Berghwegen (Barwegen) ûnder Ingwierrum en it wapen mei de trije bargen.

Pyter waard sa in man fan stân, mei in protte lân. Hy waard notaris yn Dokkum. Syn neiteam brocht it fier. Willem Bergsma hat it ta grytman fan East-Dongeradiel brocht.

 
Jouswier en Marlannen, 1718

De Jouswierster polderBewurkje

Iuwenlang leinen súdeast fan it doarp twa lytse markes. It Jouswierster mar en it Mellema Meertje, ferneamd nei Mellemastate. Dy leine oan in natuelik wetter, de Mûzeryd, dat fan súdwest nei noardeast troch de Marlannen rint en op 'e Suderie útkomt. It part fan dy ryd, noard fan de wei Mitselwier-Ie, is in soarte fan opfeart. It Jouswierster marke is yn 1855 drûchmeald. Sûnt lost in mûne it wetter troch in tochtsleat, westlik, op 'e Suderie. De wynmûne is yn 1926 ferfongen troch in elektrysk gemaal.

MienskipBewurkje

It doarp hat in feriening foar Doarpsbelang. De tsiisbuorkerij fan de famylje van Zelderen is ferneamd nei de eardere mar; 'it Marlânner Tsiishûs'. De bekende Fryske dichter A.M. Wybenga (1881 - 1948), ferwurde it doarp en syn omkriten mei it fers:

     

Jouswier,

Dou bist mar in pjut fan in doarpke,
Hwat sobers oan d’ ein fan in wei,

Seis huzen en in âld tsjerkje,
En dêr is nou alles mei sei.

Dou hast mar in himpen fatsoentsje:
Hja groeven dyn terp amper wei;

Nou steane op it oerbleaune klobke
Dyn huzen elkoarren sa nei.

Mar dochs, as yn leaflike jounen
De dauwe oer dyn Marlannen tynt,

Dan likest in eilân yn ‘t sulver,
Dat wyt om dyn wenten him wynt.

Do leist dêr yn ‘t mids fan dyn greiden
Sa fredich, sa stil en sa blier;

Wol bistou de lytse fan trettjen,
Mar dochs sa’n romantysk Jouswier.

BefolkingBewurkje

StrjittenBewurkje

Bergsmawei, Humaldawei, Winia's Reed.

Boarnen, noaten en referinsjesBewurkje

Boarnen, noaten en/as referinsjes:
  1. Ljouwerter Krante, 5 novimber 1951. Commissaris der Koningin opent nieuwe weg

Keppeling om utensBewurkje